VOV4.Xơ Đăng - Kơ’nâi mâu hâi pơtê Têt, Ngế kơdrâi kăn Kuô̆k hô̆i hneăng 15 cho hdroâng kuăn ngo Brâu a kong pơlê Kon Tum cho Nàng Xô Vi vêh hnê hriâm ƀă vâi o hok tro ki hmâ.

Ing hngêi troh tíu pêi cheăng cho a phân hiệu dêi Hngêi trung Phôh thong hnê kuăn ngo ai tíu kâ koi ối pơtê kong pơlê Kon Tum a tơring tơkăng kong Ia H’Drai, ngế kơdrâi pro Kăn Kuô̆k hô̆i hneăng 15 cho Nàng Xô Vi thế prôk tơkâ luâ troăng hơngế 150km to rơxế hon đa. Tơdroăng ki tơviah mê, troăng prôk ki ngế kăn Kuô̆k hô̆i kơdrâi mê troh ƀă vâi o hok tro kơtâu drô troăng tơkăng kong ki achê ƀă péa kong têa Lếo ƀă Kul.

Vêh lăm hnê dêi a hngêi trung klêi pơtê Têt, trâm mâu vâi o hok tro cho kuăn ngo a mâu hngêi trung tíu tơkăng kong, Nàng Xô Vi kăn Kuô̆k hô̆i mê tối tơdroăng ki tơná  tơmâng ƀă tơmiât púi vâ:

‘’Tơdroăng hnê hriâm hdroâng kuăn ngo cho tơdroăng ki a tơchĕng tơmiât hên má môi. A púi vâ pro ti lâi pơtroh ăm rêm râ Đảng, troh Tíu xiâm mâu tơdroăng tô tuăn dêi thái cô hnê a kơpong tíu tơkăng kong ƀă mâu tơdroăng tơchĕng tơmiât dêi nôu pâ hok tro, malối cho tơmâng khât troh mâu tơdroăng xơpá dêi vâi o dế trâm.

Pơreăng COVID-19 kơvâ ngăn hnê hriâm  cho kơvâ cheăng ki tơdjâk tơdrêng ƀă kơvâ hnê hriâm cho kơvâ ki trâm pá hên xua tơdroăng tơchĕng tuăn tơmiât mê cho púi vâ pro ti lâi hiăng tâi pơreăng kố vâi o kô rĕng châ lăm hriâm tiah hmâ  ƀă ai mâu tơdroăng ki nếo tâ’’.

Pôa Y Thanh Hà Niê Kdăm, Kăn xiâm hnê ngăn Hô̆i đong kuăn ngo dêi Kuô̆k hô̆i rơtế ƀă Nàng Xô Vi  diâp tơmeăm mơngế Brâu drêng troh Têt Lo hơnăm nếo Nhâm Dần 2022

Cho cưh nhân Sư Phạm Địa lý, cô hnê a phân hiệu dêi hngêi trung Phôh thong hnê kuăn ngo ai tíu kâ koi ối pơtê kong pơlê Kon Tum a tơring Ia H’Drai, tối tơdroăng ối chôu pâ dêi tơná a rôh hôp má môi Kuô̆k hô̆i hneăng 15, cô Nàng  Xô Vi tối tơdrăng: ƀă môi ngế kơdrâi kŭn kĕnn tiah kố troh a pơlê xiâm, troh a hngêi Pêi cheăng Kuô̆k hô̆i  ki tâ tung hiâm tuăn tơná cho kơdrâ, kơxiâp kơmê ƀă hlối xâu há.

Klêi tơpui tơno ƀă mâu kăn, tung pơla pêi cheăng ƀă mâu Vi ƀan, tơdroăng ki Nàng Xô Vi hlo kal thế pêi tơdrêng mê cho pơ’lêh dêi tơná ƀă tơchĕng tơmiât tơ ê tâ:

“ Troh a rôh hôp má péa mê a hiăng ‘nâi hbrâ rơnáu tí tăng ‘nâi plĕng ƀă ‘nâi po ngăn hlá mơ-éa hên tâ. Ƀă troh drêng rôh trâm mâ kuăn pơlê vêh tối tơbleăng nếo tơdroăng dêi rôh hôp tơná mê a tâ khên tơnôu iâ, tung tuăn tơmiât tơná hiăng ‘nâi mơ-eăm ƀă mơni tung la ngiâ á kô mơ-eăm tâ nếo’’.

Nàng Xô Vi kăn hnê ngăn Kuô̆k hô̆i rơtế ƀă Khu kăn Kuô̆k hô̆i tung hneăng lăm pêi cheăng a cheăm Bờ Y, tơring Ngọc Hồi, kong pơlê  Kon Tum

Nàng Xô Vi ngế kơdrâi pro kăn Kuô̆k hô̆i, cho khu kăn Kuô̆k hô̆i kong pơlê Kon Tum cho ngế kuăn dêi hdroâng kuăn ngo Brâu ki iâ mơngế. Nôkố kuăn ngo Brâu ối a thôn Đăk Mế, cheăm tơkăng kong Pờ Y, tơring Ngọc Hồi, kong pơlê Kon Tum. Tâi tâng mâu  kuăn ngo bú ai 173  rơpŏng ƀă 558 pơ’leăng mâ mơngế. Cô Nàng Xô Vi  cho tơdroăng ki hâk tơngăm dêi mơngế Brâu ƀă xuân cho ngế ki djâ troăng lĕm ‘na tuăn mơ-eă tơkâ luâ xơpá ‘nâi mơnhông tơná ƀă tơdroăng púi vâ pleăng hnoăng tơná tung mơnhông mơdêk dêi kuăn pơlê.

Tối tơdroăng tô tuăn ƀă tơdroăng púi vâ dêi tơná apoăng hơnăm nếo  Nhâm Dần 2022, Nàng Xô Vi ngế kăn Kuô̆k hô̆i ăm ‘nâi:

‘’Rêm ngế Kăn Kuô̆k hô̆i xuân ai mâu tơdroăng tơpui tối, tơdroăng tơmiât, tơdroăng tô tuăn ‘na tung pơlê tơná pro ti lâi vâ kuăn pơlê pin kơdroh kơtiê xơpá. Tung hơnăm nếo púi vâ dêi tơná mê cho púi vâ rĕng kâi mơdât pơreăng COVID-19 vâ kuăn pơlê pin châ pêi cheăng kâ môi tiah hmâ. Cho ngế kăn Kuô̆k hô̆i hơnăm nếo a  kô mơ-eăm  pơtối rak vế pêi pro tơdroăng ki tro, hnê tro khât mâu tơdroăng púi vâ dêi kuăn pơlê ăm Kuô̆k hô̆i .

Gương tơplôu ƀă tơbleăng