Kơxê lơ 13/10, Hneăng hôp Đảng ƀô̆ Chin phuh rôh má môi hôp rôh hôp ki mơgêi. Hneăng hôp hiăng tơbleăng tơdroăng Pơkâ ƀă tâi tâng mâu kăn vâ môi tuăn. Tơdroăng Pơkâ Hneăng hôp mơhno tơdroăng púi vâ, hiâm mơno khŏm mơ-eăm dêi Đảng ƀô̆ Chin phuh tung hneăng cheăng nếo ƀă ivá khŏm mơ-eăm “Mơjiâng Đảng ƀô̆ Chin phuh krúa lĕm krá rơdêi; tơrŭm, djâ troăng ahdrối tung khoa hok kong ngê̆, pơhlêh nếo tơmiât pêi rơkê, pơhlêh kơxô̆; thăm mơnhông ki tơƀrê, mơnhông tơnêi têa rĕng ƀă krá tơniăn tung chal mơ-eăm tơná kro rơdêi, rơkê plĕng, hơniâp lĕm”.

Tơkŭm pơkuâ, hnê mơhno pêi pro kơtăng, tơdâng tơ’mô, tơƀrê mâu tơdroăng pơkâ pêi, tơdroăng pơkâ mơ’no ƀă 4 khu troăng hơlâ ‘na mơjiâng Đảng; 8 khu troăng hơlâ ‘na mơnhông cheăng kâ, rêh ối; 2 khu troăng hơlâ ‘na cheăng lêng, gâk kring, tơpui kâ; 6 khu cheăng ki kal ‘na mâu mơnhông tơƀrê tung la ngiâ. Mơ-eăm rak tơniăn mâu tơdroăng pơkâ pêi cheăng kâ kân, hbrâ mơdât pro mơhrê, rak tŭm mâu tơdroăng pro tơdâng tơ’mô kân dêi cheăng kâ liăn ngân; thăm mơnhông GDP châ dâng 10% tung môi hơnăm tơngi klêng.

Pơtối pêi pro klêi troăng hơlâ, luât; mơjiâng pro troăng klông tơdâng tơ’mô, rơkê plĕng ƀă hnê mâu ngế pêi cheăng rơkê. Mơnhông rơdêi xúa kơmăi kơmok, tiô chal nếo, troăng pêi cheăng kâ, mơnhên túa pêt thăm mơnhông nếo, mơnhông tơƀrê khoa hok kong ngê̆, pơhlêh nếo tơmiât pêi rơkê ƀă pơhlêh kơxô̆.

Tơtrŏng troh mâu kơvâ cheăng túa lĕm tro, rêh ối pơlê pơla, rak vế kong prâi mơdêk tơdroăng rêh ối kuăn pơlê. Pơtối ‘mâi mơnhông, thăm mơdêk cheăng lêng, gâk kring; rak tơniăn tung lâp pơlê pơla; mơdêk ki tơƀrê tung tơpui kâ, mot tơrŭm cheăng ƀă kong têa ê; rak vế tơniăn lĕm, tơniăn ăm mơnhông mơdêk tơnêi têa rĕng ƀă krá.