Tơdroăng ki nếo dêi Pơkâ cho pơhlêh sap ing rơdêi troăng hơlâ tŏng gum apoăng chiâng séa ngăn klêi kơ’nâi lăm ngăn, tơdrêng amê hlối klâ xoăng râ pơkuâ hbru ăm, vêh hbru ăm mah kơxô̆ kơpong pêt, mah kơxô̆ tíu tâ tung kơthung ăm Kăn hnê ngăn Vi ƀan râ cheăm. Tiah mê, khu tơrŭm, ngế krê pêi pro chêh tối ƀă pôu râng hnoăng cheăng ‘na tơdroăng ki tơdrăng tro dêi tơdroăng tơná chêh tối; kăn pơkuâ pêi pro pơkuâ ngăn, séa ngăn, xo tơvêh, pơtê pơtân lơ ‘mâi mơnhông mah kơxô̆ tiô pơkâ.

Ƀă mâu kơpong ki pêt to sầu riêng a Tây Nguyên, troăng hơlâ tŏng gum nếo châ tơngah lêi tah hên tơdroăng ki xơpá tung pơla chêh inâi mah kơxô̆ vâ tê ngi kong têa ê. Tung pơla chêh pro hlá mơ-éa châ chêh pro iâ hâi. Ƀă mâu khu tơrŭm, ngế krê ki ôh tá chêh inâi tê ngi kong têa ê, hâi khế chêh pro klêi kơdroh sap ing 14 hâi pêi cheăng chu ối 3 hâi; tâng tê ngi kong têa ki pơkâ thế ai mah kơxô̆, hâi khế chêh pro klêi hlá mơ-éa kơdroh chu ối 10 hâi.

Pôa Vũ Đình Cường, Phŏ pơkuâ Khu ngăn chiâk deăng ƀă Hyôh kong prâi kong pơlê Lâm Đồng tối tiah kố, Pơkâ kơxô̆ 36 dêi Chin phuh tơtro ƀă pơkâ thế ki ai khât, malối cho cho pơkâ ôh tá pơkâ ‘na ƀăng tơnêi pêt, pro tơ’lêi hlâu ăm mâu ƀăng tơnêi pêt hdrê loăng ki pêt tơvât, tung mê ai hdrê pêt xiâm ki vâ tê plâi ngi kong têa ê.

“Klêi kơ’nâi Pơkâ kơxô̆ 36 dêi Chin phuh châ mơ’no, kong pơlê Lâm Đồng hiăng pơkâ thế mâu cheăm bêng, kơ koan, tíu pêi cheăng ki ai tơdjâk tơkŭm hriăn ngăn mâu tơdroăng pơkâ nếo vâ tơbleăng pêi. Pơkâ kố châ pơkâ gá tơtro, tơleăng mơnhên mâu tơdroăng tơvâ tơvân tung pơla hdrối nah, malối cho ƀă kơpong pêt a ƀăng tơnêi kân rơdâ ƀă mâu ƀăng tơnêi pêt tơvât mâu túa hdrê loăng ki vâ tê ngi kong têa ê”.

Pôa Nguyễn Hoàng Hiệp, Phŏ Ngế xiâm ngăn chiâk deăng ƀă Hyôh kong prâi tối nhên, vâ troăng hơlâ pơkâ tŏng gum Pơkâ kơxô̆ 36 dêi Chin phuh rĕng châ mot tung tơdroăng rêh ối, mâu kong pơlê kal rĕng chêh pro túa pơkâ tơbleăng pêi, tŏng gum râ cheăm hnê hriâm, pêi pro pơhlêh mâu tíu pêt, tíu ki tâ plâ tung kơthung, lăm séa ngăn ƀă hnê tối. Tơdroăng ki pơhlêh túa pơkâ hbru ăm mah kơxô̆ ôh tá xê pro kơdroh kơxô̆ liăn ‘no hrê, hâi khế ăm ngế ki pêt, mê ối mơdêk tơdroăng ki tơdrăng, pôu râng hnoăng tung tơdroăng ki tê mơdró tơmeăm pêi lo ing chiâk deăng.

“Pơkâ thế mâu kong pơlê tơkŭm hnê tối vâ môi tuăn pêi pro. Tơdroăng nếo má môi rôh kố cho hnoăng cheăng pôu râng dêi rêm kơ koan, tíu pêi cheăng; pôu râng dêi ngế krê, kuăn pơlê veăng chêh inâi hbru ăm mah kơxô̆ kơpong pêt xuân hiăng nhên. Hbru ăm mah kơxô̆ kơpong pêt rôh kố cho pêi pro tâi tâng hâi khế chêh pro ƀă chiu pôu râng dêi hnoăng a ngiâ luât dêi rêm rơpŏng pêt”.

Ƀă Tây Nguyên cho kơpong pêt sầu riêng kân má môi dêi lâp tơnêi têa, Pơkâ kơxô̆ 36 dêi Chin phuh châ tơngah kô cho ivá mơnhông nếo vâ po rơdâ kơpong pêt tro tiô pơkâ, mơdêk ivá tơxup tơbriât, mơjiâng inâi sầu riêng Việt Nam tung kơchơ tê mơdró kong têa ê, tơdrêng amê hlối po rôh tơ’lêi hlâu pêt krá tơniăn tâ ăm kuăn pơlê ƀă khu mơdró kâ.