VOV4. Xơ Đăng - Vi ƀan hnê ngăn pơlê kong kơdrâm Đà Lạt, kong pơlê Lâm Đồng nếo ai hlá mơ-éa tối tơbleăng, pâ thế Vi ƀan hnê ngăn kong pơlê Lâm Đồng séa ngăn ăm phêp Kơchơ tê tơmeăm a kong măng Đà Lạt châ vêh tê nếo klêi kơ’nâi lối 8 khế pơtê xua pơreăng COVID-19. Vâ rak tơniăn tung tơdroăng ki hbrâ mơdât pơreăng COVID-19, Kơchơ ki tê a kong măng Đà Lạt hiăng pơtê tê sap ing hâi lơ 3/5/2021 troh nôkố. Tung pơla ton khế pơtê tê, tơdroăng rêh ối cheăng kâ dêi mâu rơpŏng ki tê mơdró a kơchơ kố trâm hên xơpá.

Hlo tơdroăng ki ai khât kố, vâ tơbleăng châ tơƀrê tơdroăng pơkâ pêi péa tơdroăng tung tơdroăng hơ’lêh nếo. Vi ƀan hnê ngăn Pơlê kong kơdrâm Đà Lạt tối tơbleăng, pơkâ mơ’no ƀă Vi ƀan hnê ngăn kong pơlê Lâm Đồng séa ngăn ăm phêp Kơchơ tê a kong măng Đà Lạt vêh tê tiah hmâ nếo, lơ tê ai tơdroăng ‘na hbrâ mơdât pơreăng ƀă hên ki ê.

Hdrối mê, teăng mâ lối 200 rơpŏng ki tê mơdró a Kơchơ tê tơmeăm a kong măng Đà Lạt hiăng ai đơn pâ thế pơtroh ăm Vi ƀan hnê ngăn pơlê kong kơdrâm Đà Lạt pơkâ thế khu kăn pơkuâ ăm phêp kơchơ châ vêh tê nếo tung rôh Têt Lo hơnăm nếo Nhâm Dần 2022.

Katarina Nga tơplôu ƀă tơbleăng