Hneăng hôp tơpui tơno ƀă tơdroăng ki veăng dêi mâu kăn teăng mâ mâu Khu xiâm, kơvâ cheăng, Viê̆n hriăn cheăng, hngêi trung, kong pơlê ai têa kơxĭ po tung pơla Chin phuh nếo tơbleăng Pơkâ kơxô̆ 218 'na Tơdroăng pêi pro tiô hlá mơ-éa Pơkâ kơxô̆ 20 dêi Khu xiâm pơkuâ hnê ngăn Đảng hneăng 14 'na mơjiâng, mơnhông Việt Nam chiâng tơnêi têa ai têa kơxĭ ki kân. Khoa hok, kŏng ngê̆, pơhlêh nếo tơmiât pêi rơkê ƀă pơhlêh kơxô̆ ôh tá xê to châ mơnhên veăng kum mê châ mơnhên cho môi tung mâu tơdroăng ki xiâm vâ mơdêk ivá tơnêi têa 'na têa kơxĭ.

Pôa Trần Tuấn Anh, Kăn xiâm phŏ hnê ngăn Viê̆n Hăn lâm Khoa hok ƀă Kŏng ngê̆ Việt Nam tối tiah kố, môi tơnêi têa ai têa kơxĭ ó rơdêi ôh tá xê to ai hên kơno têa kơxĭ, plong tuk lơ tơdroăng cheăng kâ hên a têa kơxĭ kân, mê athế hlê plĕng, tối hdrối ƀă pơkuâ ngăn têa kơxĭ, xúa tơniăn tơmeăm khoăng ƀă pro xiâm mâu kŏng ngê̆ têa kơxĭ ki hloh hlê, rơkê plĕng.

“Kal mơjiâng môi tơdroăng hriăn plĕng 'na têa kơxĭ tơnêi têa ki cho khât, môi tơnêi têa têa kơxĭ ó rơdêi ôh tá xê kơnôm to a môi tíu hriăn plĕng lơ môi Khu xiâm, kơvâ cheăng. Tơdroăng hriăn plĕng 'na têa kơxĭ ai tơdroăng veăng dêi mâu tíu hriăn plĕng, mâu hngêi trung đăi hok, mâu Khu xiâm, kơvâ cheăng pơkuâ tơnêi têa, mâu khu ki pêi cheăng a têa kơxĭ, mâu kong pơlê kĭng têa kơxĭ, mâu khu mơdró kâ 'na têa kơxĭ ƀă mâu khu tơrŭm cheăng".

Cho kong pơlê ki ai tơ'lêi hlâu 'na têa kơxĭ, Khánh Hòa ai vâ chê 490km kĭng têa kơxĭ, lối 200 to rơlố, mâu kung king têa kơxĭ trâu Vân Phong, Nha Trang, Cam Ranh ƀă kơpong Trường Sa, rơtế ƀă tíu pêi cheăng hriăn plĕng, hnê hriâm rơkê. Pôa Nguyễn Thanh Hà, Phŏ kăn hnê ngăn Vi ƀan kong pơlê Khánh Hoà tối ăm ngin 'nâi, pêi pro Pơkâ 20 pơkal thế pơ'lêh rơdêi ing pêi cheăng a têa kơxĭ chiâng pơkuâ ngăn têa kơxĭ rơkê plĕng, ing tuăn ngôa rơkê ƀă kŏng ngê̆.

Khánh Hòa pơkâ thế Tíu xiâm tơnêi têa tơmâng 'no liăn mâu tơmeăm khoăng hriăn plĕng xúa tơdjuôm râ tơnêi têa môi tiah tuk hriăn plĕng tung dế têa kơxĭ, kơbong hriăn plĕng ki xiâm, troăng kơxái on tơhrik ki rơkê plĕng; tơdrêng amê séa ngăn 'mot Tíu xiâm Hriăn plĕng tơnêi têa 'na kŏng ngê̆ têa kơxĭ a Khánh Hòa mot tung pơkâ mâu tíu xiâm, kơbong hriăn plĕng ki xiâm tơnêi têa 'na kŏng ngê̆ ki kal.

“Kong pơlê Khánh Hòa tơhrâ 'măn kơxô̆ liăn kơjo má môi, hbrâ rơnáu tíu pêi cheăng, luât pơkâ, hngêi trăng troăng klông xuân môi tiah tơrŭm krá tơniăn ƀă mâu kơ koan, hngêi trung tung kong pơlê vâ tơdah xo, tơbleăng tơƀrê mâu tơdroăng tơkêa bro hriăn plĕng, pơhlêh kŏng ngê̆".

Pôa Vũ Hải Quân, Ngế xiâm pơkuâ Khoa hok ƀă Kŏng ngê̆ tối tiah kố, Pơkâ 20 pơkâ troăng hơlâ ki pơhlêh nếo ƀă khoa hok, kŏng ngê̆ têa kơxĭ. Khu xiâm pơkuâ Khoa hok ƀă Kŏng ngê̆ kô tí tăng 'nâi plĕng ăm Chin phuh pơkâ pêi pro Pơkâ 20, tơkŭm rah xo mâu tơdroăng cheăng khoa hok, kŏng ngê̆, pơhlêh nếo tơmiât pêi rơkê ƀă pơhlêh kơxô̆ têa kơxĭ a tíu ki kal pơla hơnăm 2026-2030.

Khu xiâm ngăn ‘na Khoa hok-Kŏng ngê̆ kô tí tăng 'nâi plĕng ăm Chin phuh nhên tơdroăng tơbleăng pêi pro Pơkâ 20. Gá pơxúa khât păng 'nâng, gá ai hên kơvâ cheăng têa kơxĭ kân rơdâ, gá mơhnhôk tiah mê tung khoa hok kŏng ngê̆ mê gá xuân kân rơdâ. Khu xiâm ngăn ‘na Khoa hok, kŏng ngê̆ kô mơ-eăm xing xoăng tiô kơlo ki kal kơjo pêi ahdrối vâ khoh châ tơbleăng pêi pro châ tơƀrê hôm. Ai mâu tơdroăng ki pin thế pêi ton xŏn, pêi nhên, la ai mâu tơdroăng ki chiâng vâ mơ'no liăn cheăng vâ ăm châ tơƀrê".