VOV4.Xơ Đăng - Bu tung môi pơla măng tĭng achê kố, pơlê kong kơdrâm Ƀuôn Ma Thuột, kong pơlê Dak Lak hiăng ai 2.482 ngế tâ COVID-19, tung mê ai 2.245 ngế tâ tung pơlê pơla. Hlo tơdroăng ki ôh tá tơniăn dêi pơreăng, kơxê lơ 22/2, pơlê kong kơdrâm Ƀuôn Ma Thuột hiăng tơbleăng kơxô̆ 524 ‘na tơdroăng ki xúa mâu troăng hơlâ hbrâ mơdât pơreăng COVID-19 a pơlê kong kơdrâm sap ing 6 chôu hâi lơ 23/2/2022 tá troh drêng ai tơbleăng ki nếo.

Mâu hok tro râ má 1 ƀă lâm 6, 7, 8 kô vêh hriâm ing troăng hyôh Internet vâ hbrâ mơdât pơreăng

Tiah mê, pơlê kong kơdrâm Ƀuôn Ma Thuột pơkâ thế pơtê pơtân mâu tơdroăng cheăng tê mơdró ki mơni kô tơ’lêi ăm pơreăng tâ tú (tíu kơhnhon xoâng, karaoke, quăn bar, Internet, tíu xah điê̆n tưh), mâu tíu ki pro lĕm cho tíu ki poê kơnêi chêng kŏng, tíu ki rơnuâ, spa ƀă hên tíu ki ê. Pơtê pơtân mâu tơdroăng ki hnê hriâm tơdrêng ƀă râ mầm non ƀă tơbleăng cheăng hnê hriâm ing troăng hyôh Internet ƀă râ má môi, lâm 6, 7, 8 ƀă lâm 10, 11.

Krê lâm 12 ƀă mâu tíu hnê hriâm ki ê a pơlê kong kơdrâm tơkŭm hnê tơdrêng la ai tơdroăng pơkâ; rak tơniăn tung hnoăng cheăng hbrâ mơdât pơreăng COVID-19; giảng viên, sinh viên, hok tro hnê ƀă hriâm athế châ pâk tŭm 2 trum vaccine lơ hiăng pơlât prêi COVID-19 ôh tá luâ 6 khế.

Riân troh nôkố, a pơlê kong kơdrâm Ƀuôn Ma Thuột hiăng ai 7.540 ngế tâ COVID-19, tung mê ai 2620 ngế hiăng pơlât prêi. Ƀuôn Ma Thuột xuân cho pơlê kong kơdrâm ki má môi dêi kong pơlê Dak Lak dế cho kơpong khêi trĭng – râ má 3 (mơni kô tơ’lêi tâ tú hên)

Katarina Nga tơplôu ƀă tơbleăng