Mơ’nui khế 8 pơla kố nah, tơdroăng ngế Kơdrâi pro Kăn pơkuâ hnê ngăn cheăng Đảng livestream tê plâi sầu riêng rơtế ƀă kuăn pơlê a pơlê hiăng tơkŭm po a kơdrum plâi sầu riêng troăng pêi mơnúa dêi cheăm Ea Knuêč, kong pơlê Dak Lak. Sap ing kơxo má, mâu plâi sầu riêng tum trĭng châ ‘măn lế lĕm tung pong dêi hdrông Rơđế, ‘măn a kĭng livestream lêk gât ki teăn dêi vâi krâ.

A kơpƀâng ‘măn phôn po camera tơdrêng, tíu jâ H’Jih Kƀuôr (ối khĕn cho jâ Trúc) roh apoăng chiâng “ngế tê tơmeăm online’’ dêi pơlê. ‘Nân a ngiâ um phôn râng kŏng, jâ H’Jih rơtế ƀă ngế kơdrâi pro kăn pơkuâ cheăm hơ’muăn ‘na tơdroăng hơ’muăn pêt plâi sầu riêng ƀă rêm ngế ‘na mâu tơmeăm pêi lo ing chiâk deăng ki dâi lĕm xua rơpŏng pêi pêt. Jâ H’Jih Kƀuôr ai tối:

“Á troh akố ƀă ngế kơdrâi pro kăn pơkuâ hnê ngăn cheăng Đảng hơ’muăn tối ‘na tơdroăng roh rơnó pêt plâi sầu riêng. Kuăn pơlê tung pơlê pói vâ plâi sầu riêng kô châ yă kơnâ vâ ăm tơdroăng rêh ối dêi kuăn pơlê rế xông tơtêk ƀă mơnhông hên tâ kơ mê nếo’’.

Bu tung môi roh mơ’no tơdrêng tung um tiô troăng hyôh măng, 60 tâ̆n plâi sầu riêng hiăng châ tê. Mâu tơmeăm vâi kok rôe pơtối dêi pó, mâu rơkong pơtroh, ‘’tiê ăm plâi nuih’’ ing tơmối hlo um phôn râng kŏng pro kuăn pơlê hâk vâ. Ƀă inâi ‘’Sầu riêng Amĭ kâo’’, nâl Rơđế cho ‘’plâi sầu riêng dêi nôu á’’, pơlê ôh tá xê to tê plâi sầu riêng, mê ối hơ’muăn tơdroăng pêt mơjiâng, ƀă tơdroăng ki mơnhên tơkêa ‘na ki dâi lĕm.

Sap ing kố, môi troăng prôk nếo ‘na tơdroăng mơdêk inâi tơmeăm pêi lo ing chiâk deăng tung kŏng ngê̆; troăng châ achê tơmối ki nếo, tơdrêng tâ dế chôa ‘lâng po mơjiâng.

Pôa Nguyễn Công Điềm, hdroâng kuăn ngo Nùng, kăn pơkuâ nguăn ‘na túa pêi plâi sầu riêng châ rah xo pro tíu tơkŭm po tê tơmeăm, hlo nhên ki pơxúa nhên dêi xiâm rêi tê rôe, mơdró tung điê̆n tưh xuân pro tơdroăng tơmiât dêi tơná chiâng môi túa tê tơmeăm tơniăn krê.

“Á xuân pói vâ la ngiâ pro ti lâi ai môi túa tê krê vâ tơdjêp pơla ngế pêt mơjiâng ƀă ngế rôe xúa, á kô hmiân tuăn cho ôh tá hluâ kŏng mơngế rôe ngế tê’’.

Tơdroăng livestream kố cho tơdroăng pêi apoăng vâ pêi pro Tơdroăng tơkêa bro Rêm cheăm, bêng môi KOL, nâl Ăng-glê tối Key Opinion Leader  - Cho Tíu ki ai tơdjâk xiâm, djâ tơmeăm, kong kế Dak Lak to a tíu mơđah tơbleăng kŏng ngê̆ dêi cheăm Ea Knuếč. Um môi ngế kăn pơkuâ hnê ngăn cheăm chiâng ‘’KOL pêi chiâk deăng’’ hiăng pơtroh tơdroăng ki hâk vâ kân ăm kuăn pơlê. Kố xuân cho troăng pêi nếo ‘na ‘’lâm hriâm kuăn pơlê hriâm xúa kŏng ngê̆’’ vâ kuăn pơlê pêi chiâk deăng, ki rơhêng vâ tối cho kuăn pơlê hdroâng kuăn ngo, khên tơnôu hên tâ tung tơdroăng châ achê tê mơdró điê̆n tưh.

Jâ Ngô Thị Minh Trinh, Kăn pơkuâ hnê ngăn cheăng Đảng cheăm Ea Knuếč mơnhên: Tơdrêng rơtế kuăn pơlê livestream tê plâi sầu riêng, ôh tá xê to tơdroăng tŏng gum tê a rơnó mê ối cho tơdroăng pơtâng hnê tối rơdêi: kăn pơkuâ prôk hdrối, djâ troăng, djâ rêm ngế rơtế mot tung tíu cheăng xúa kŏng ngê̆.

“Á pói vâ cho rêm ngế kuăn pơlê thế rơtế tơdjuôm ivá tung roh pơhlêh xúa kŏng ngê̆ kố, ing kuăn pơlê pêi chiâk deăng xúa kŏng ngê̆, kô cho tơdroăng livestream tê tơmeăm a hngêi, rơtế tơbleăng mâu tơdroăng ki lĕm dêi pơlê xiâm dêi tơná troh ƀă rêm ngế kuăn pơlê, troh ƀă tơmối ôm hyô vâ châ ‘nâi troh ƀă vâi kô troh ƀă pin hên tâ. Rơtế ƀă  kuăn pơlê pêi chiâk deăng djâ mâu tơmeăm pêi lo ing chiâk deăng dêi tơná lo a kơchơ mơdró ƀă xuân pơhlêh chôa ‘lâng ƀă tơdroăng ki hmâ, rơtế tơdjuôm ivá vâ kuăn pơlê hriâm xúa kŏng ngê̆’’.

Ƀă tơdroăng ki mot veăng dêi khu râ kăn pơkuâ, ing kăn ƀô̆, kăn pơkuâ troh rêm kuăn pơlê, troăng pêi ‘’pơlê xúa kŏng ngê̆’’ chiâng inhên ƀă krá tơniăn. Ôh tá xê to a Ea Knuếč, hên bêng tung kong pơlê Dak Lak dế tơdjuôm ivá pêi pro troăng prôk kố. Ing mâu tơdroăng pêi môi tiah xup um tơmeăm, pro video ‘nâng ‘nâi, tiâ rơkong pơlê pơla chêh, kơxuô ƀă pơcháu tơmeăm troh tơdroăng po camera, livestream ƀă tơdah đơn tơmeăm, chiâng mâu troăng pêi ki ai khât nôkố vâ chôa ‘lâng djâ kŏng ngê̆ tung tơdroăng rêh ối pêt mơjiâng tơmeăm pêi lo ing chiâk deăng a mâu pơlê.

Pôa Bùi Thanh Toàn, Kăn pơkuâ Khu pơkuâ Khoa hok ƀă Kŏng ngê̆ kong pơlê tối ăm ‘nâi, tơdroăng ki pơkâ apoăng tung pơhlêh xúa kŏng ngê̆ cho mâu tơmeăm khoăng. Xua mê, tơdroăng rak tơniăn “kơpong ki ôh tá hrik hyôh’’ châ kong pơlê tơmâng pêi pro ƀă pơkâ 100% kuăn pơlê kô châ xúa Internet troh lâp lu rơdâ, veăng tơdroăng tê mơdró điê̆n tưh a mơ’nui hơnăm kố.

“Khu pơkuâ khoa hok kŏng ngê̆ hiăng tơrŭm ƀă mâu kơ koan ki ai tơdjâk tơbleăng ăm Vi ƀan kong pơlê vâ hnê mơhno mâu khu tê mơdró ‘na hyôh măng, kŏng ngê̆ thŏng tin rơtế dêi pó mot pêi cheăng, mơ-eăm troh tâi hơnăm 2025 mê tung kong pơlê ôh tá ai xếo “kơpong ki ôh tá châ hrik hyôh’’. Drêng ai tŭm kơmăi kơmok, tŭm Internet troh lâp lu kân rơdâ mê kuăn pơlê nếo châ xúa ƀă mâu tơdroăng rơkê tung pơhlêh xúa kŏng ngê̆’’.

Ing xiâm kối xúa kŏng ngê̆, kong pơlê Dak Lak dế xúa pơkâ cheăng kâ xúa kŏng ngê̆ ăm rêm cheăm, bêng. Rơtế ƀă tơdroăng mơnhông khoa hok, kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ tung pêi chiâk deăng, tê mơdró ƀă ôm hyô, kong pơlê dế mơjiâng môi ngiâ méa thôn pơlê nếo troh rêm pơlê. Drêng kuăn pơlê ‘nâi xúa kŏng ngê̆, mê thôn pơlê nếo ôh tá xê to ai troăng ƀê tong lơ hngêi kân lĕm rơdâ, mê ối cho tíu rêh rơkê, tơdjêp ƀă pêng păm khôi túa lĕm tro. Tung tíu ki mê, rêm to phôn râng kŏng rơkê chiâng ‘’tơmeăm pêi cheăng’’ dêi kuăn pơlê pêi chiâk deăng.