Tơbleăng a rôh hôp, pôa Trần Cẩm Tú ngế cheăng tung Khu kăn hnê ngăn Đảng tối nhên, hơnăm 2025 cho hơnăm ai pơxúa kân - cho hơnăm tâi tâng Đảng, tâi tâng kuăn pơlê, tâi tâng mâu lêng pin mơ-eăm mơnhông, tơƀrê pêi klêi mâu tơdroăng hneăng hôp hiăng pơkâ; hơnăm tơkŭm po hôp Đảng ƀô̆ rêm râ troh Hneăng hôp má 14 dêi Đảng; hơnăm apoăng pêi pro tiô pơkâ dêi khu cheăng kal kí pro rế lĕm, iâ mơngế cheăng la pêi cheăng tơƀrê, pơxúa, pro xiâm vâ tơnêi têa mot tung rơxông mơnhông mơdêk chal nếo dêi hdroâng mơngế.

Xua mê, Kăn hnê ngăn tối tung hơnăm 2025 kố, kơvâ hnê mơhnhôk kal pơtối hnê nhên tuăn mơno dêi Hồ Chí Minh, Kăn xiâm hnê ngăn tơnêi têa ki apoăng, troăng hơlâ dêi Đảng ƀă tơdroăng hnê mơhno dêi pôa Tô Lâm, Kăn xiâm pơkuâ hnê ngăn cheăng Đảng a rôh pêi cheăng nếo achê kố ‘na tơdroăng hnê mơhnhôk; kơvâ cheăng thế hlê nhên mâu tơdroăng kal, malối pơkâ pơ’lêh nếo rơdêi tơdroăng hnê mơhnhôk tơdâng tơ’mô ƀă tơdroăng cheăng tung pơla pơ’lêh nếo vâ pơtối rak ki rơdêi kuăn pơlê, ivá rơdêi môi tuăn dêi rơpó hdroâng mơngế, mơnhông djâ dêi tơnêi têa xông rơdêi tung chal nếo.

Kăn xiâm pơkuâ hnê ngăn Đảng pơkâ thế, mơnhông tâ nếo ki tơƀrê pêi pro tiô Luât pơkâ hnê mơhnhôk cheăng dêi khu cheăng kal kí. Tơdrêng amê, pơtối pơ’lêh nếo troăng hơlâ mơhnhôk kuăn pơlê; tơmâng khât a mâu pơlê cheăm, tă ‘nâi plĕng mâu tơdroăng, pro ai hên ƀâng, luât pơkâ tăng ‘nâi plĕng mâu tơdroăng, tuăn tơmiât, púi vâ ƀă tơdroăng kuăn pơlê tối ‘na trơdroăng ki xiâm “nhoăm kuăn pơlê, achê kuăn pơlê, hlê kuăn pơlê, hriâm ing kuăn pơlê, ai hnoăng cheăng ƀă kuăn pơlê”.

Kăn pơkuâ rêm râ thế đi đo trâm mâ, tơpui tơno, tơmâng, tơleăng mơnhên teăm tơdrêng tơdroăng tô tuăn tung kuăn pơlê, malối cho tơdroăng xăm phoăng, mơ’nhiê liăn, ôh tá tro, kâ kơhveăm... Pơtối pêi tro mâu tơdroăng hnê mơhnôk a kơpong kuăn ngo, mâu tiô khôp, mâu cheăm tơring ‘na tơdroăng kring tơniăn - cheăng lêng, kơpong hơngế hơngo, kơpong xơpá, ‘nâi plĕng tơdroăng kuăn pơlê pin ki rêh ối a kong têa ê.

Pôa Trần Cẩm Tú, Kăn hnê ngăn Đảng pơkâ thế, kơvâ hnê mơhnhôk kơhnâ tơbleăng mâu tơdroăng cheăng tơkŭm pêi vâ po hneăng hôp má 14 dêi Đảng, mơhnhôk mâu rôh hôp tơpui tơdroăng kal kí trâu rơdâ, hdrối, tung ƀă klêi kơ’nâi hneăng hôp, pro xiâm ki sôk ro, tơrŭm, môi tuăn, hriăn plĕng ki nếo tung kuăn pơlê. Kăn hnê ngăn tối nhên, troăng hơlâ tơtro má môi hnê mơhnhôk cheăng xiâm tơnêi têa ƀă Khu hnê cheăng kal kí xiâm tơnêi têa pơtối tơbleăng pêi kơtăng; pơkâ thế troăng hơlâ xing xoăng, pro rế lĕm mơngế cheăng tro tiô khoa hok, tơniăn tro tiô tơdroăng; mơjiâng tơbleăng pêi tro tơdroăng cheăng dêi hơnăm 2025 klêi tơrŭm ƀă: 

“Pin thế pro rế lĕm mâu ngế cheăng rơtế ƀă tơdroăng rah nếo mâu kăn ƀô̆ ki ai hiâm mơno lĕm, tuăn ngôa rơkê chiâng vâ pêi cheăng tiô pơkâ tung la ngiâ. Xua mê, kơvâ hnê mơhnhôk thế pêi tro tơdroăng hnê mơhnhôk tung Đảng, tung Măt trâ̆n ƀă mâu khu tơrŭm cheăng kal kí pơlê pơla, tung mâu kơ koan dêi tơnêi têa ƀă mâu kăn rêm râ tung kơvâ hnê mơhnhôk dêi pin, thế môi tuăn, veăng gum, ai hnoăng cheăng pêi vâ mơ-eăm, veăng pêi klêi tơdroăng pro rế lĕm, rah iâ tê mơngế pêi cheăng ăm tơnêi têa”.  

Pơtối tơmâng mâu tơdroăng tối tơbleăng hnê mơhno dêi pôa Mai Văn Chính, Kăn hnê ngăn Đảng, Ngế pơkuâ hnê mơhnhôk cheăng xiâm tơnêi têa ăm ‘nâi, hơnăm 2025 ƀă mâu hơnăm pơtối, tâi kơvâ cheăng kô pơ’lêh nếo tâi tâng mâu tơdroăng, troăng hơlâ hnê mơhnhôk ai tiô pơkâ tung rơxông nếo. Ki xiâm cho hơ’lêh nếo tơdroăng hnê, mơhnhôk kuăn pơlê, mơdêk xúa khoa hok kơmăi kơmok, pơ’lêh kơxô̆ a tơbleăng mâu tơdroăng hnê mơhnhôk:

“ ‘Na tơdroăng cheăng pêi ing nôkố ta troh Hneăng hôp má 14 dêi Đảng ối hên, tung mê ai mâu tơdroăng ki pá tơvâ tơvân, kal thế Khu hnê mơhnhôk cheăng xiâm tơnêi têa ƀă khu hnê mơhnhôk rêm râ thế mơ-eăm hên tâ nếo vâ teăm ‘nâi plĕng tơdroăng tăng ngăn, tăng ‘nâi tối ăm Khu xiâm kal kí, Khu hnê cheăng Đảng rêm râ mâu troăng hơlâ ki pơxúa tung pơkuâ hnê mơhno tơdroăng hnê mơhnhôk,  tơdroăng ‘na kuăn ngo, loi tĭng tiô khôp ƀă mơdêk tơpui tơno ƀă kuăn pơlê ƀă Đảng. Tung hơnăm 2025 Khu hnê mơhnôk xiâm tơnêi têa ƀă khu hnê mơhnhôk rêm râ kô mơ-eăm pê klêi tơdroăng cheăng”.