Rơpŏng pôa K’Phân, đảng viên ối a thôn 3, cheăm Đinh Trang Thượng, tơring Di Linh cho môi tung mâu rơpŏng djâ troăng a hdrối pêi kơphế ki dâi lĕm. Ƀă 3 ha kơphế, hơnăm kố nah gum rơpŏng hngêi pôa châ xo dêi 17 tâ̆n kloăng kơphế, kô châ xo troh a rơtal liăn. Ôh tá xê to rơkê pro kro mơdrŏng ăm to dêi tơná, pôa K’Phân ối kơhnâ veăng gum kuăn pơlê ‘mâi pêt kơphế a tơnêi ton, xiâm kơphế ki hiăng krâ, ôh tá dâi, hnê kuăn pơlê pêt hdrê nếo vâ loăng plâi xông lĕm ai plâi hên.

“Kơphế hiăng krâ ôh tá xông rơdêi, ôh tá ai plâi, thế klêp tơkâng vâ mơnhông ăm loăng xông lĕm. Tung mê, tôh têa iâ 3 hdrôh, phon rơvât 4 hdrôh, xôh pơkăng 2 hdrôh tung 1 hơnăm kơphế nếo ai plâi. Ing klep tơkâng hdrê nếo rêm hơnăm châ xo 15 tâ̆n”.

Ƀă tơdroăng pêi chiâk tơtro, mê mâu hdrê loăng plâi kơnâ liăn môi tiah kơphế, sầu riêng, krui ƀŏng, pêt loăng yâu păn hdrong... ki pơxúa tung pêi chiâk a Đinh Trang Thượng ôh tá la lâi pơtê. Hơnăm 2024 riân rêm ha tơnêi akố pêi châ xo 125 rơtuh liăn, riân rêm ngế châ 47 rơtuh liăn, châ 104% tiô pơcháu dêi Đảng ƀô̆ cheăm ai pơkâ.

Tiô pôa K’Đức, Kăn pơkuâ hnê ngăn Chi ƀô̆ thôn 2, cheăm Đinh Trang Thượng, môi tung mâu tơdroăng ki kal gum thôn mơnhông tơbrê tung hơnăm mê hía nah cho ing kơhnâ pêi cheăng dêi mâu đảng viên lâp tung thôn ai lối 200 rơpŏng kuăn pơlê, tung mê ai 17 ngê đảng viên xuân djâ troăng a hdrối tung mơnhông cheăng kâ.

“Pêi pro tiô hnê mơhno dêi Đảng ủy râ kơpêng, Chi ƀô̆ kơhnâ tơbleăng thế kơhnâ pôe tơkâng, ‘mâi hơ’lêh kơdrum kơphế, mâu đảng viên tung thôn djâ troăng a hdrối, pơtối rak hnoăng cheăng djâ troăng a hdrối tung pêi cheăng ƀă ai pơxúa khât, tơdroăng rêh ối dêi kuăn pơlê châ mơnhông tơbrê, châ vâ kum ăm dêi kuăn ‘nĕng hriâm troh tui lui. Pakĭng klep tơkâng kơphế, nôkố kuăn pơlê ối pêt hên hdrê loăng, mê cho plâi ƀơr, sầu riêng, mắc ca, ing mê ki pơxúa rế hlo tơtêk hên’’.

Pôa K’Đô, Phŏ Kăn pơkuâ hnê ngăn Đảng ủy, Kăn hnê ngăn Vi ƀan cheăm Đinh Trang Thượng ăm ‘nâi, ing yă kơphế chu rơpâ, cheăm hiăng pơkâ hnê pơhlêh pêt hdrê loăng ki nếo, mơhnhôk kuăn pơlê pêt hdrê loăng ki nếo môi tiah loăng yâu păn hdrong, pêt kơchâi, prá alâi, xúa hdrê loăng ki rĕng ai plâi. Malối, hnoăng cheăng dêi đảng viên cho kal khât tung tơdroăng hnê kuăn pơlê, gum kuăn pơlê hlê plĕng ‘na khoa hok kih thuât tung pêi chiâk deăng.

A hơnăm 2025 kố, tơdrêng ƀă mơnhông mâu tơdroăng pêi chiâk tiô troăng hơlâ krá tơniăn, cheăm mơhnhôk pêt kơphế hưh cơ vâ loăng plâi dâi lĕm, tơrŭm ƀă mâu khu mơdró rôe tơmeăm pêi lo ing chiâk deăng vâ tơniăn ăm kuăn pơlê. Mơ-eăm kơdroh rơpŏng kơtiê 2% ƀă mơdêk pê lo liăn rêm ngế châ 55 rơtal liăn. Pôa K’Đô, ăm ‘nâi:

“Ing tơdroăng hnê mơhno dêi Đảng ủy ƀă hlối veăng tơmâng tơdroăng kal kí mê hên đảng viên hiăng djâ troăng lĕm kơhnâ tung pêi cheăng. Ing mê kuăn pơlê pêi ƀối, veăng mơnhông cheăng kâ - rêh ối tơdjuôm dêi cheăm, tơring. Đinh Trang Thượng xuân kơhnâ mơhnhôk kuăn pơlê xut tah hngêi pơtân, hngêi xi kơchoh, tung hơnăm 2024 hiăng xut 16 toăng hngêi. Tung hơnăm kố kô pơtối xut tah 18 toăng hngêi, ngin mơ-eăm pê klêi hdrối hneăng hôp Đảng, tung khế 5/2025 thế pê klêi”.

Ƀă mâu troăng hơlâ tơtro, rơtế hnoăng cheăng dêi Đảng ƀô̆, mâu kăn ƀă kuăn pơlê a cheăm Đinh trang Thượng dế chôa lâng mơnhông chiâng môi tung mâu cheăm thôn pơlê nếo dêi tơring Di Linh. Nôkố cheăm Đinh Trang Thượng dế pơtối mơnhông hnoăng cheăng dêi đảng viên, thăm mơdêk hnê tối khoa hok kih thuât, mơdêk rơdêi pêt mơjiâng tơmeăm tiô túa krá ton, veăng gum mơjiâng mâu pơlê cheăm rế hía rế mơnhông, mơ-eăm pêi tơƀrê mâu tơdroăng ki vâ koh hâk Hneăng hôp lâp tơnêi têa rôh má14 dêi Đảng.