VOV4.Xơ Đăng - Tơdroăng ôm hyô tung roh Têt Nhâm Dần tối krê, pơkâ pêi cheăng dêi kơvâ ôm hyô hơnăm 2022 tối tơdjuôm a mâu kong pơlê tung kơpong Tây Nguyên xuân kal ai khu râ ki pơkuâ ngăn ‘na tơdroăng xah ôm hêi vâ pro pơro ăm vâi krâ-nhŏng o mâu tơdroăng hơniâp ro tung mâu hâi Têt kố.

*** Vêh pêi cheăng kơ’nâi mâu hâi pơtê Têt Lo hơnăm nếo, mâu ngê̆ sih, diễn viên dêi khu hơdruê xuâng  dêi mâu hdroâng kuăn ngo kong pơlê Dak Lak tơvâ tơvân hên tơdroăng cheăng pơtâp hơdruê xuâng mâu ƀai ki nếo. Pôa Y Kô Niê, Ngế pơkuâ khu hơdruê xuân ăm ‘nâi, hdrối Têt, tâi tâng khu hiăng mơdoh hên chôu pơtâp 2 tơdroăng vâ mơđah tơdah lo hơnăm nếo ƀă vâ mơđah a kơmăng tâi hơnăm ton vâ lo hơnăm nếo. Phá tâ rêm hơnăm, xua tơdjâk pơreăng mê tơdroăng mơđah bú mơđah to a Tíu xiâm mơđah hơdruê xuâng kong pơlê ƀă châ tíu mơ’no um tơvi hrik mơ’no tơdrêng tung mâu ƀang tơvi ƀă Youtube. Klêi têt, tâi tâng khu kô pơkâ chôu vâ mơđah hơdruê xuân ki kân mơđah a râ kong pơlê ƀă lăm mơđah ukố mê lăm troh a mâu tơring cheăm vâ mơđah ăm kuăn pơlê ngăn drêng tung pơla dế ai pơreăng COVID-19 châ mơdât.

“Ki hdrối cho hbrâ ăm mâu hâi  leh, hâi tơbâ kân dêi kong pơlê ƀă tơnêi têa. Ki hdrối xuân hiăng mơđah ƀă kô klêi Têt pơtối tơbleăng mơđah nếo. Tâng pơreăng xuân ối tâ tú ôh tá châ lăm mơđah mê kô thâu xup nếo mâu tơdroăng, ƀă mơđah a mâu ƀâng tung um tơvi, in a hlá tơbeăng, mơđah tung măng xah hô̆i dêi kơvâ cheăng vâ rêm ngế kuăn pơlê ƀă pú hmâ tung tơnêi têa ƀă lâp plâi tơnêi hlo, ngăn’’.

*** A kong pơlê Gia Lai, Khu pơtâng tối troh lâp lu dêi Khu hơdruê xuâng Đam San, ối tung Khu pơkuâ ‘na mơhno túa lĕm tro – Tơ’noăng ivá ƀă Ôm hyô Gia Lai xuân lo lăm pêi cheăng apoăng hơnăm ƀă mâu tơdroăng pơtâng tối, mơđah tơbleăng hơdruê xuâng ăm kuăn pơlê tung kong pơlê. Hdrối mê, rêm hơnăm, khu hiăng pêi pro hrĭng roh pơtâng tối troh lâp lu, ki hên a mâu kơpong hơngế hơngo, kơpong hdroâng kuăn ngo a kong pơlê Gia Lai. Laga, hơnăm 2021 pơla kố nah, xua pơreăng COVID 19, kơdroh tơkŭm kơdrâm mơngế, xua mê Khu dêi nâ pơ’lêh troăng pơtâng tối ƀă troăng thâu video, tơbleăng tung măng pơlê pơla Facebook, Youtube tiô mâu tơdroăng phá tơ-ê dêi pó. Tơdroăng kố rế kum tơniăn hnoăng cheăng ƀă tơdrêng amê tơdroăng pơtâng tối xuân tơ’lêi troh ƀă kơdrâm kuăn pơlê. Nâ H’Blup cho kăn ƀô̆ dêi Khu pơtâng tối troh lâp lu dêi Khu hơdruê xuâng Đam San tối:

“Ngin cho mâu ngế kăn ƀô̆ mơhno túa lĕm tro, pêi tơdroăng pơtâng tối troh lâp lu. Ngin tơrŭm ƀă tơdroăng hơdruê xuâng, pro pơro, vâ kuăn pơlê ngăn klêi kơ’nâi môi hâi pêi cheăng tơbrêi tơbrêh. Ing mê, ngin pơtâng tối mâu troăng hơlâ dêi Đảng, troăng hơlâ, luât dêi Tơnêi têa. Ing mê, vâ kuăn pơlê hlê plĕng Đảng ƀă Tơnêi têa tơmâng ngăn khât, rak ngăn tơdroăng rêh ối dêi kuăn pơlê. Pakĭng mê, pơtâng tối ăm vâi plĕng, ví tơdroăng ‘mêi môi tiah tơdroăng pro xôi tung pơlê pơla, ôh tá pro tơdjâk troh dêi tơná ƀă kuăn pơlê tung pơlê’’.

Gương - A Sa Ly tơplôu ƀă tơbleăng