Kố cho môi tơdroăng kơnâ ki kơnâ kal kí, rêh ối pơlê pơla ƀă rơkê trâu hơngế, mơhno hiâm mơno ‘’Lâp tơnêi têa tơmiêt troh ‘na tíu tơkăng kong, xua tơdroăng la ngiâ kuăn ‘nĕng mâu hdroâng kuăn ngo’’. Pôa Phạm Minh Chính, Ngế pro xiâm hnê ngăn tơnêi têa veăng leh pơxiâm po a tíu mơ’no hyôh ki xiâm: Hngêi trung ai tíu kâ koi ối pơtê râ má môi ƀă Râ má péa cheăm Yên Khương, Thanh Hóa.

Tối rơdêi Đảng, Tơnêi têa pin đi đo hnê hriâm ƀă hnê mơjiâng cho troăng hơlâ kân ki kal tơnêi têa ối má môi, ƀă hnoăng ki kal, mơjiâng chiâng ƀă mơnhông hiâm mơno lĕm, ivá tuăn ngôa rơkê dêi kuăn mơngế, cho ki xiâm pơkâ tơniăn tơdroăng châ tơƀrê, Ngế pro xiâm hnê ngăn tơnêi têa tối ăm ‘nâi, Khu xiâm kal kí hiăng môi tuăn ƀă tơkŭm pơkuâ hnê mơhno troăng hơlâ mơ’no liăn cheăng mơjiâng mâu hngêi trung phôh thong ai tíu kâ koi ối pơtê râ má môi ƀă râ má péa a 248 cheăm tơkăng kong tơ’lâng.

Vâ tơniăn djâ mâu hngêi trung nếo pêi cheăng kum tung hơnăm hriâm nếo 2026 – 2027, Ngế pro xiâm hnê ngăn tơnêi têa pơkâ thế Khu xiâm pơkuâ hnê hriâm ƀă Hnê mơjiâng tuăn ngôa rơkê, kăn pơkuâ mâu kong pơlê đi đo chu a kông trương, teăm tơleăng tơdrêng  mâu tơdroăng pá puât, tơvâ tơvân, tŏng gum mâu khu mơjiâng pro, tíu pêi cheăng mơjiâng pro, teăm tơdrêng tơleăng mâu tơdroăng pá puât, tơvâ tơvân, tŏng gum mâu khu tơdah mơjiâng pro, tíu ki mơjiâng pro, hnê mơhno séa ngăn ai tơdroăng pêi cheăng lĕm tro, mơjiâng pro hngêi trung ƀă hiâm mơno khŏm mơ-eăm, mơ-eăm hên - tâi tâng xua rơxông hok tro tuăn pâ, xua tơdroăng mơnhông dêi kuăn pơlê mâu hdroâng kuăn ngo tơkăng kong krih tơviah dêi Tơnêi têa.

A Dak Lak, pôa Mai Văn Chính, Phŏ Ngế pro xiâm hnê ngăn hnê ngăn Chin phuh hiăng veăng a leh pơxiâm pro Hngêi trung Phôh thong ai tíu kâ koi ối pơtê râ má môi – râ má péa a cheăm kăng kong Ia Rvê, kong pơle Dak Lak. A rôh leh, pôa Mai Văn Chính, Phŏ Ngế pro xiâm hnê ngăn tơnêi têa hiăng tơbleăng tơdroăng ki pro hngêi trung ƀă hbru tơmeăm ăm hok tro ƀă thái cô, mơhnhôk vâi mơ-eăm tơkâ luâ xơpá, rak ngăn hnê hriâm, tro rơkê.

Rơtế ƀă hngêi trung ki châ pro a cheăm Ia Rvê, tung rôh kố kong pơlê Dak Lak ối pro 2 toăng hngêi ai tíu kâ koi ối pơtê péa râ cho: Hngêi trung phôh thong péa râ ai tíu kâ koi ối pơtê cheăm Ia Lốp ƀă mâu kơxô̆ liăn ‘no pro cho 105 rơtal, Hngêi trung phôh thong péa râ cheăm Buôn Đôn châ ‘no lối 158 rơtal liăn pro.

A Lâm Đồng, pôa Hồ Đức Phớc, Phŏ Ngế pro xiâm hnê ngăn Chin phuh veăng leh pơxiâm pro Hngêi trung phôh thông ai tíu kâ koi ối pơtê râ má môi, râ má péa Thuận An. Toăng hngêi nếo kân lĕm rơdâ kô cho tíu hriâm tâp, păn roăng lối 1.000 ngế vâi hdrêng mâu hdroâng kuăn ngo tung cheăm tơkăng kong Thuận An, kong pơlê Lâm Đồng châ mơjiâng pro tung ƀăng tơnêi 5ha, tâi tâng kơxô̆ liăn mơ’no lối 225 rơtal liăn. Xông tơpui a leh pơxiâm mơjiâng pro, pôa Hồ Đức Phớc, Phŏ Ngế pro xiâm hnê ngăn Chin phuh mơnhên, Đảng, Tơnêi têa đi đo ngăn hnê hriâm cho troăng hơlâ ki kal tơnêi têa ối má môi, rế thăm kơpong ki pá puât mê rế thăm thế tơmâng tŏng gum.

Phŏ Ngế pro xiâm hnê ngăn tơnêi têa pơkâ thế Khu xiâm pơkuâ Hnê hriâm ƀă Hnê mơjiâng rơtế kong pơlê Lâm Đồng ƀă mâu tíu cheăng ki tơdjâk tơmâng pơkuâ, hnê mơhno, séa ngăn pro ti lâi hngêi trung châ mơjiâng tơniăn, dâi lĕm ƀă mâu tơdroăng ki tơdjâk, ki rơhêng vâ tối cho mơngế pêi cheăng, kơxô̆ liăn vâ kô chiâng xúa châ tơƀrê, krá tơniăn troh hrĭng hơnăm.