VOV4.Xơ Đăng - Ƀă tơdroăng ki tơrŭm ƀă kuăn pơlê pêi chiâk deăng chiâng ai mâu kế tơmeăm ki dâi lĕm sap ing khu ki pêt mơjiâng tá troh uâ pơliê, rế hía rế hên droh rơtăm a kong pơlê Dak Nông hiăng pơxiâm pêi cheăng ƀlêi chiâng, mơ-eăm pro kro mơdrŏng ăm dêi tơná ƀă pơlê pơla. Hâi apoăng rơnó Hơngui, pó vâi krâ nhŏng o ƀă pú hmâ rơtế ƀă Minh Huệ, ngế chêh hlá tơbeăng tơpui tơno ƀă mâu droh rơtăm – khu mơdró kâ a kong pơlê Dak Nông, hmâng vâi tơpui tơno ‘na tơdroăng ki pro kro mơdrŏng.

Tung mâu hâi Tết, mâu kuăn kơphế Enjoy a pơlê kong kơdrâm Gia Nghĩa (kong pơlê Dak Nông) dêi ngê ki mơdró hơnăm ối nếo cho Lê Văn Hoàng la lâi xuân krâm mơngế ôu. Hdrối mê, tung pơla klâ kơtăn pơlê pơla xua pơreăng COVID-19 kơdrâ tâ tú, kŏng ti hiăng pêi klêi tơdroăng pêi cheăng tiô kŏng ngê̆ kơxô̆, châ hlê ‘nâi hên tíu tê mơdró nếo ing măng internet, tí tăng ‘nâi plĕng tơ’nôm mơdêk pêi pro tơmeăm ki nếo môi tiah ca-cao sô-cô-la, bơr sô-cô-la, mắc-ca. Ki tơ-ƀrê mê hiăng kum ăm ngoh Lê Văn Hoàng, Ngế pơkuâ kŏng ti pêi cheăng tiô rơnó môi tung khu kơphế Bazan Dak Nông châ tơngăm ối tung Top 10 “Ngế mơdró hơnăm ối nếo pêi cheăng rơkê hơnăm 2021’’ tung lâp tơnêi têa.

Pơxiâm pêi cheăng ing po môi kuăn kơphế a Gia Nghĩa tơkŭm uâ pro tơphế tơpoăng, nôkố ngoh Lê Văn Hoàng hiăng mơnhông tơ-ƀrê po 10 to kuăn kơphế pơxá inâi Enjoy Coffee, tơrŭm ƀă kuăn pơlê amê pro kơpong pêt hrĭng ha kơphế hưh cơ.

“A thế ‘nâi nhên dêi tơná pin cho kơbố, ƀă tơdroăng tơmiêt tơplâ, tâng pin ôh tá kâi mơhnhôk kuăn pơlê mê thế ‘nâi pin hâi ai tŭm ivá, mê pin thế vêh pêi dêi ‘nôi. Klêi pin pêi ƀă hiăng ai tíu tê, mơnhông tơ-ƀrê ‘nôi mê pin kô kâi vâ mơhnhôk vâi. La lâi xuân kal ai tuăn tơmiât mơ-eăm mê, tá tơdroăng môi tiah á uâ pro tơpoăng xuân tiah mê. Mơni hơnăm kố ôh tá pêi lo tơmeăm mê hơnăm kơ’nâi ah, la pin hiăng hlê ‘na tơmeăm. Tơkéa vâ tối trâm hên xơpá mê pin kô ôh tá pơtê amê, thế tăng troăng pêi ki ê ki tơ’lêi tâ’’.

Ngoh Lê Văn Hoàng a leh diâp pri Top 10 “Khu mơdró kâ mơngế hơnăm ối nếo ki rơkê hơnăm 2021” (ngế ki ối má 3 ing peăng hơ-ếo)

Phá tâ ƀă tơdroăng ai hên ngế ôu a kuăn kơphế, tíu mơjiâng pro chếi mãng cầu Anna Food dêi nâ Lê Thị Ly Na rơhĭng rơhối rơngiâp lĕm a mâu kơdrum loăng, ai long ká a chêng ngo kŭn kơpong kĭng Gia Nghĩa. Ƀă ki pơxúa dêi mâu tơmeăm ki vâi ô eăng má môi a Tây Nguyên, chếi mãng cầu Anna rế troh lâp lu ƀă pơxiâm châ tê ăm kong têa ê. Mơ’nui hơnăm 2021, nâ Lê Thị Ly Na, ngế pơkuâ tíu pro chếi mãng cầu Anna Food hiăng hâk tơngăm châ ô eăng cho môi tung ngế hơnăm ối nếo a thôn pơlê ki rơkê pêi cheăng tung lâp tơnêi têa châ mơhá Pri Lương Định Của roh má 16 xua Khu xiâm Đoân droh rơtăm Kŏng sản Hồ Chí Minh diâp ăm. Ki tơ-ƀrê ing chế mãng cầu , nâ dế pơtối hriăn pro chế tâ tung tơdrong vâ râm ôu hlối, pro tơpoăng mãng cầu, têa mãng cầu râm a póu ki pin pro dêi; ƀă hriăn vâ pro hngêi kơmăi pro xup khăng ing phái Ƀuôn Choah, kơchâi plâi pôm Dak Song.

Nâ Lê Thị Ly Na ăm ‘nâi mâu tơmeăm mê xuân ai xiâm ing tơmeăm pêi lo ing chiâk deăng châ mơnhên OCOP pêi pêt hưh cơ a kong pơlê. 

“Á hlo bú ai uâ pơliê pro ăm i lĕm tâ mê nếo châ pro pơxúa tơmeăm pêi lo ing chiâk deăng dêi kuăn pơlê. Drêng pin uâ pơliê pro vâ mơdêk ki pơxúa, mê pin rôe yă apoăng dêi kuăn pơlê kơnâ iâ, pin ‘nâi kô tơniăn ki pơxúa ăm kuăn pơlê, mê mơni cho troăng rơhlâ hưh cơ dêi tơná ah vâi kô pêi ƀối’’.

Nâ Lê Thị Ly Na ƀă mâu kế tơmeăm dêi tíu cheăng Anna Food

Tiô ngoh Châu Ngọc Lương, Kăn hnê ngăn Đoân droh rơtăm kong pơlê Dak Nông, mâu hơnăm achê kố, rế ai hên ngế hơnăm ối nếo pơxiâm hriăn pêi cheăng châ tơ-ƀrê ing tơdroăng pơtối rak vế pêi pro mâu tơmeăm ki tơ-ƀrê dêi kong pơlê. Pơtối kum ăm mâu hơnăm ối nếo, Khu pơkuâ ngăn Đoân droh rơtăm hiăng krếo mâu ngế rơkê vâ troh hnê tối ăm khu droh rơtăm, tơpui tơno tơdrêng tung hyôh um tơvi ƀă mâu khu droh rơtăm ki pơxiâm tăng cheăng pêi.

Tơdrêng ƀă tơdroăng veăng kum hnê hriâm ‘na tơdroăng tơkêa bro, tơkŭm khu droh rơtăm djâ troăng tŏng kum ăm vâi droh rơtăm châ mung Liăn dêi tơnêi têa tăng mơjiâng tơdroăng cheăng pêi, Hngêi rak liăn kum mâu ngế kơtiê xahpá ƀă hên hĕng mâu tơdroăng ki ê, tâi tâng kơxô̆ liăn ki ăm mung mê vâ chê 700 rơtuh liăn. Krê to kơxô̆ liăn kum droh rơtăm pơxiâm tăng cheăng pêi dêi kong pơlê Dak Nông tung hơnăm nah hiăng tơkâ luâ 6 rơtal liăn, veăng kum ăm mâu pú hơnăm ối nếo châ tơmiât hriăn ƀă mơjiâng xêh cheăng pêi ki rơkê. Ngoh Châu Ngọc Lương tối ăm ‘nâi:

“Khu droh rơtăm kong pơlê Dak nông dế nôkố, hiâm tuăn vâi cho hâk git khât ‘nâng vâ tăng tơdroăng cheăng pêi, bố bố xuân phiu ro. Droh rơtăm ngăn ing mâu tơmeăm khoăng dêi tơná ai vâ pơtối pêi pro mâu tơdroăng cheăng ƀă ki châ tơƀrê a mơ’nui hơnăm 2021 hiăng ăm hlo, hên kế tơmeăm ki pơxiâm tăng cheăng pêi dêi Dak Nông hiăng ai pro ki mơhá ăm vâi droh rơtăm pêi cheăng kâ, xua Khu xiâm hnê ngăn Đoân tơnêi têa pơkâ thế, hên khu, hên ngế hiăng châ kâ pri ki kân, ki nhên, cho 4 kế tơmeăm, Khu droh rơtăm hiăng ‘nâi rơkê tung tơdroăng ki mơnhên ngăn ‘na hyôh kong prâi, ‘na tơnêi tíu dêi kong pơlê Dak Nông vâ mơjiâng mâu kế tơmeăm ki tơtro, ai pơxúa”.

Mơnhông ivá dêi khu hơnăm ối nếo, hloh hlê rơkê plĕng, rơkê pêi pro mâu tơdroăng ki ai pơxúa dêi kong pơlê, mê khu droh rơtăm kong pơlê Dak Nông dế thăm mơdêk ó rơdêi vâ pro kro ăm dêi rơpŏng hngêi ƀă pơlê pơla.

Minh Huệ chêh

Nhat Lisa tơplôu ƀă tơbleăng