Tơdroăng tơkêa bro tơdjâk tơdrêng troh dâng 477 rơpŏng kuăn pơlê, ƀă lối 2.000 pơ’leăng mâ mơngế a cheăm Phước Dinh. Ki xiâm tung plâ pro tơdroăng tơkêa bro cho tơniăn ăm kuăn pơlê troh a tíu ối nếo ai tơdroăng rêh ối tơ’mô tâng ôh thế lĕm tơniăn tâ a tíu ki ton, chôa lâng tơniăn cheăng kâ ton hơnăm. Tâi tâng kơxô̆ liăn ‘no pêi tơdroăng mê lối 3.200 rơtal liăn.

Vâ pro klêi hngêi kơmăi on tơhrik Ninh Thuận 1 ƀă 2 hdrối hơnăm 2031, Kuô̆k hô̆i hiăng pơkâ mâu luât, luât tŏng gum krê xêh, malối cho chêl thiăn liăn, kơjo kum, ‘mâi pro pơlê nếo a kơlo ki hôm má môi vâ tơniăn hnoăng ki pơxúa tơxâng dêi kuăn pơlê. Pôa Bùi Thanh Sơn, Phŏ ngế xiâm tơpui kâ pơkâ thế mâu khu xiâm, kơvâ cheăng, kong pơlê ki tơdjâk troh thâ tơbleăng mâu tơdroăng cheăng djâ kuăn pơlê ối tíu ê, gu tơbăng tíu, chêl thiăn liăn tro tiô pơkâ dêi luât, tơniăn ‘na cheăng kâ ton hơnăm ăm kuăn pơlê.