VOV4.Xơ Đăng - Kơxo lơ 28/3, a Hngêi Kuô̆k hô̆i, tơkŭm po Hneăng hôp Kăn teăng mâ Kuô̆k hô̆i pêi cheăng pơkuâ môi tơdroăng cheăng tơpui tơno ‘na mâu tơdroăng tơkêa bro luât tơbleăng Kuô̆k hô̆i a hneăng hôp má 3, Kuô̆k hô̆i hneăng má 15. Hneăng hôp tơpui tơno ‘na 04 tơdroăng tơkêa bro: Luât ‘mâi rơnêu, tơ’nôm mâu troăng dêi Luât pơkuâ tuăn ngôa rơkê; Luât tơ’noăng, kheăn kơdeăn (‘mâi rơnêu); Luât ‘na xup um (‘mâi rơnêu) ƀă Luât rê mơdró ƀaoh hiêm (‘mâi rơnêu). Pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi, ƀă tơdroăng hbrâ nhên, rĕng, ing hơngế, klêi kơ’nâi mơgêi Hneăng hôp má 2, Vi ƀan pơkuâ Kuô̆k hô̆i hiăng hnê mơhno mâu kơ koan pơkuâ séa ngăn tơrŭm ƀă kơ koan chêh bro luât ƀă mâu kơ koan ki tơdjâk thâ tơkŭm, kơtăng tiâ tối, tơmâng xo rơkong dêi mâu kăn teăng mâ Kuô̆k hô̆i.

Pơxiâm po Hneăng hôp kăn teăng mâ Kuô̆k hô̆i pơkuâ môi tơdroăng cheăng

Tơdroăng hbrâ nhên mâu tơdroăng tơkêa bro luât ahdrối tơbleăng Kuô̆k hô̆i tơbleăng ăm pêi pro, vâ tơniăn hôm tơtro má môi ăm mâu tơdroăng tơkêa bro luât, tơdrêng amê kô kơdĭng hên chô phut hôp păng ‘nâng dêi mâu hneăng hôp Kuô̆k hô̆i.

A Sa Ly tơplôu [ă tơbleăng