Kơxo lơ 20/10, a Hngêi Kuô̆k hô̆i, Hneăng hôp má 10, Kuô̆k hô̆i hneăng má XV păng ‘nâng pơxiâm po ƀă tiô tối hdrối mơgêi hâi lơ 11/12/2025.

Kố cho hneăng hôp má mơ’nui dêi Kuô̆k hô̆i hneăng má XV ƀă tâi tâng hâi khế pêi cheăng dâng 40 hâi, tiô tối hdrối séa ngăn, tơbleăng ăm pêi pro 49 tơdroăng tơkêa bro luât.

Klêi kơ’nâi xông tơpui pơxiâm po dêi pôa Trần Thanh Mẫn, Kăn xiâm hnê ngăn Kuô̆k hô̆i, Kuô̆k hô̆i tơmâng Chin phuh tối Tơbleăng tơdroăng châ tơƀrê pêi pro pơkâ mơnhông cheăng kâ – rêh ối pơlê pơla hơnăm 2025, 5 hơnăm 2021 – 2025 ƀă tiô tối hdrối pơkâ hơnăm 2026. Vi ƀan Xiâm Măt trâ̆n Tơnêi têa Việt Nam tối Tơbleăng tâi tâng rơkong tơpui, pâ thế dêi kuăn pơlê ƀă kuăn pơlê pơtroh troh hneăng hôp. Hneăng hôp kố ôh tá tơkŭm po kơ-êng tơdrêng a hngêi hôp kân, teăng mâ kăn teăng mâ pơtroh rơkong kơ-êng ƀă mơ-éa vâ kơ koan, ngế krê tơdjâk tiâ. Kố cho hneăng hôp ki kơnâ mơgêi hneăng cheăng, mơnhên tâi tâng tơdroăng châ tơƀrê tơdroăng pêi cheăng dêi Kuô̆k hô̆i hneăng má XV.