VOV4.Xơ Đăng - Hơnăm 2021, Lâp plâi tơnêi hâi kâi ƀlêi trâng kơ pơreăng COVID-19. Ƀă Việt Nam, thế tối hơnăm 2021 cho môi hơnăm kơdrâ. Klêi kơnâi ai tơdroăng tơplâ, tơnêi têa hâi chói hlo a lâi tơkâ luâ mâu tơdroăng hlâ kuăn mơngê  ki hên tiah mê xua tơdjâk pơreăng kân. Rơnó kơngui rơtế ƀă tơdroăng púi tơngah. Tơngah rơnó hơngui Nhâm Dần 2022 ƀă tơdroăng ki pá kô rê̆ng kâi tơkâ luâ vâ po troăng ăm mâu tơdroăng ki nếo. Tết cho vâ vêh, cho púi vâ vêh ƀă on veăng rơpŏng hngêi, ƀă pơlê pơla, ƀă tơnêi têa pâ hơ ui dêi mâu ngế ki ối hơhngế. Pơreăng kân, hlâ hía, mâu tơdroăng ki châ hlo pro ai hên tơdroăng púi vâ vêh rơdâ, ƀă ó tâ mê nếo. Vêh châ tơngah púi vâ, bú Tơngah tê hâi teăm tŭm, mê ối kal thế ai púi vâ, thế mơhno bâ eăng ăm tơdroăng púi vâ pro ăm tơnêi têa rơdêi, kuăn pơlê châ phâi tơtô, châ rêh ối hơniâp ro, tơdâng tơ’mô.

Rêh tơtro

Tung pơla riân ngăn nhên mâu chôu, mâu phut dêi hâi ki mơ’nui hơnăm ton hiăng vâ chê tâi, pin sĭng tơmiât vêh ngăn 365 hâi hiăng tơkâ luâ. Mâu tơdroăng ki lâp plâi tơnêi, Việt Nam, rêm rơpŏng hngêi, rêm mơngế krê hiăng châ trâm, châ hlo, cho tơdroăng ki ôh tá ai kơbố rơhêng vâ, xua ai tơdroăng ki xâu xía kân ó ‘nâng. Pơreăng kân hiăng tâ tú lối 5 rơtuh 500 rơpâu ngế. Krê tơnêi têa Mih, hơnăm 2021 hiăng koh pơ’lâng lối 430 rơpâu ngế hlâ. Rêm chôu tơkâ luâ, hía hĕng, koh pơ’lâng ƀă mâu ngế ki hlâ xuân pơtối ai đi đo. Ƀă tơnêi têa Việt Nam, athế tối  hơnăm 2021 cho môi roh ki kơdrâ préa kân ó. Klêi kơ’nâi tơdroăng tơplâ, tơnêi têa tá hâi la lâi ai roh ki hlâ hía mơngế hên ó tiah mê.

Việt Nam, hơnăm Tân Sửu 2021 cho hơnăm ki hơ’lêh ‘na tuăn mơno ƀă tơdroăng tơchĕng. Mê cho tơdroăng vêh ngăn hnoăng cheăng ki pin hbrâ, tơplâ, mơdât pơreăng - ki hdrối nah hiiăng vêh pro chiâng ƀlêi chiâng ki ó tung tơdroăng rak vế ivá, châ chăn dêi kuăn pơlê - hiăng ôh pá tơtro xếo. Mê cho tơdroăng ki vêh mơnhên ngăn mâu roh ki tơ’lêi la hiăng ôh tá châ ‘mâi rơnêu tung pơla hneăng tơplâ, mơdât ƀă pơreăng. Vâ ga rêh ối chiâ tơniăn, châ mơdât, tơ-ƀrê cho môi tơdroăng ki pêi pro tơtro vâ hbrâ mơdât ƀă pơreăng COVID-19. Klêi kơ’nâi hiăng châ hơ’lêh tuăn tơmiât, tuăn tơchĕng, tơdroăng khu pơkuâ cheăng kal kí hiăng pơkâ pêi pro kơtăng, tơ-ƀrê lối tâ, bố tơkôm tung pơla to lâi khế hơnăm ôh tá ton, ing tíu ki ôh tá ai pơkeăng vaccine tung lâp plâi tơnêi, Việt Nam hiăng kơdo mơ-eăm mơnhông chiâng tơnêi têa ki ai bê tŭm vaccine ki hên má môi, troh a chôu phut kố, ôh tá ai môi ngế ki lâi sap ing 18 hơnăm tơngi klêng ôh tá châ pâk vaccine. Ing tơdroăng ki châ pâk vaccine troh tung lâp lu, mâu tơdroăng pêi cheăng kâ tơdroăng rêh kâ ối dêi kuăn pơlê hiăng vêh vâ mơnhông nếo. Maluâ tơdroăng ki ‘mâi mơnhông mê hrá tâ tâng vâ ngăn ƀă tơdroăng pêi cheăng kâ tung lâp plâi tơnêi, la mê cho tơdroăng ki tơkôm hmăng, pói tơngah khât.

Prếo vêh

Têt cho roh vâ prếo vêh, cho hiâm mơno rơhêng pói vâ châ vêh ƀă dêi a rơpŏng hngêi, ƀă pơlê pơla, tơnêi têa ki mơjo pâ dêi mơngế ki rêh ối hơngế a kong ê. Pơreăng kân, tơdroăng ki hlâ hía, mâu tơdroăng ki châ trâm, châ hlo, châ ‘nâi nhên cho tơdroăng ki ôh tá xê ai liăn kâi châ rôe, mê hiâm mơno pói rơhêng vâ prếo vêh cho kân kĕng, trâu hơngế ƀă ó rơdêi luâ tâ kơ mê. Tung mâu hâi rêh ối kơtăn krê, ôh tá khoh tơlôm, trâm, tơpui tơno dêi pó, tung pơla trâm tơdroăng châi heăng, sĭng hơ’nêng xua pơreăng, rêm ngế pơrá ai roh ki vâ châ prếo ƀă dêi tơná ki păng ‘nâng, ngăn nhên tung hiâm mơno dêi tơná, vêh séa mơnhên ƀă ‘mâi rơnêu hiâm mơno, tuăn rơhêng vâ dêi tơná vâ hơ’lêh.

Ti xê to rêm ngế krê, rêm khu pơkuâ cheăng, rêm khu mơdró kâ dế séa mơnhên ngăn a roh kố, hlo nhên ki lâi cho ki kơnía khât păng ‘nâng dêi tơná, vâ ing mê ‘mâi rơnêu, ‘mâi mơjiâng. Ki nhên má môi, pơreăng kân hiăng pro pin chiâng ai túa, ai troăng hơlâ prôk ki nếo vâ kô châ ai tơdroăng rêh ối, mơnhông ki nếo, mê cho tơdroăng ki tơdjêp ‘na ki rơkê cheăng kơmăi, ki rơkê kơxô̆, cho ki kơnía dêi hơ’lêh kơxô̆. Mâu khu râ, kơvâ cheăng, khu mơdró kâ hlê plĕng nhên, hơ’lêh thâ rĕng hiăng ƀă dế châ hlo nhên mâu troăng hơlâ prôk ki châ tơ’lêi ki nếo. Pơreăng kân rơhêng vâ kuăn mơngế lâp plâi tơnêi klĭng péa, klâ kơtăn kuăn mơngế laga pro tơdroăng ki tơrŭm tơrôa, tơdjêp trâm hên tơdroăg ki thâ rĕng ó tâ nếo.

Ƀă khu râ kăn pơkuâ, khu ngăn ’na cheăng kal kí xuân ối rak vế krá tơniăn tơdroăng ki vêh séa ngăn dêi châ, ‘mâi rơnêu dêi châ. Ngăn mơnhên mâu tơdroăng ki tá hâi teăm kâi chiâng pêi pro, tơdroăng ki ối trâm pá puât. Ing plá on ki tơplâ, mơdât kâ kơluâ, mơhrê liăn ngân, tơdroăng ki ‘mêi, ki xôi xuân u ối tá hâi teăm kâi la lâi châ pơtê, châ pơto, ing mê, mơjiâng păn roăng rak ngăn hiâm mơno loi tơngah. Tung rêm kơvâ cheăng, hdroâng mơngế kố pơtối vêh ngăn nhên tâ nếo khôi túa, vêa vong xiâm dêi tơná, vâ ga tơtro tâ ƀă tơdroăng rêh kâ ối tơná, la ngăn tiô kơ tơdroăng ki hơ’lêh nếo ƀă tá tơdroăng tơrŭm cheăng, mê ngăn cho ki xiâm, ivá cheăng ƀă hnối mơnhông mơdêk ƀă đi đo châ mơnhông tơtêk. Đi đo ai mâu tơdroăng ki kal ƀă mơdêk rế to, ti xê to tơdroăng ki hía hĕng ƀă tơdroăng khéa kho.

Púi vâ

Rơnó hơngui ga prôk adrêng ƀă hiâm mơno loi tơngah. Loi tơngah rơnó Hơngui Nhâm Dần 2022 ƀă hiâm mơno dêi tơná, tơdroăng ki rơkê dêi tơná, mâu tơdroăng ki sĭng khéa kô tơkâ luâ vâ ăm tơdroăng ki ‘mâi mơnhông châ tơtêk amê. Pói tơngah tơdroăng rêh kâ ối dêi kuăn pơlê kô châ ‘mâi rơnêu hên tâ, tơdroăng pêi chieăng kâ kô thăm vêh mơnhông, krá tơniăn a torêm rơpŏng hngêi, rêm khu mơdró kâ vâ kô ai tơdroăng cheăng kâ, rêh ối tơniăn lĕm tâ.

Tung mâu hâi ki trâm hên xahpá, xâu xía xua ing pơreăng pro, hên troăng hơlâ hiăng châ hbrâ vâ tah lôi mâu tơdroăng ki mơdât tung mơnhông. Hneăng hôp Kuô̆k hô̆i ki ôh tá tối hdrối roh má 1 tơkŭm po sap ing apoăng hơnăm 2022, pakĭng mâu tơdroăng ki veăng kum mơnhông pêi cheăng kâ - rêh ối pơlê pơla ai 350 rơpâu rơtal liăn ki kân sap nah tá hâi chói ai, tơdroăng kố hiăng châ tối tơbleăng, mê tơdroăng ki ‘mâi rơnêu mê xuân hiăng châ hơ’lêh nhên vâ khoh châ pêi pro klêi mâu troăng hơlâ ki mơnhông, mê pói tơngah kô mơjiâng chiâng troăng hơlâ ki vâ mơdêk troăng prôk ki kân kơtâu hơngế ó luâ tâ 3 hdroh dêi 20 hơnăm hdrối nah akop dêi pó. Ôh tá ai kong têa ki lâi kâi châ tơtêk rĕng tâng ôh tá ai troăng prôk kân, ki kơtâu hơngế. Mâu hngêi trăng, troăng prôk châ mơjiâng, châ pro nếo, malối troăng prôk ki kân, tơdrăng mê cho tơdroăng ki vâ prôk troh a ki tơtêk. Pói tơngah tơnêi têa kô châ hlo hên, châ hlo nhên hên mâu tơdroăng ki vêh mơnhông ing tơdroăng ki xahpá vâ kô ai tơdroăng chía châ niân, kro mơdrŏng rế hía rế tơtêk khât păng ‘nâng 

Phạm Mạnh Hùng - Kăn xiâm phŏ pơkuâ ngăn Rơ’jíu Việt Nam chêh

Nhat Lisa tơplôu ƀă tơbleăng