Troh nôkố, ai lối 7.000 tơdroăng tơkêa bro dêi mâu khu ‘no liăn pro tơmeăm khoăng dêi Sinuâ bro hlá mơ-éa kĭ tơhrâ hâi tâi hâi ối châ pêi cheăng a Việt Nam, tâi tâng kơxô̆ liăn kĭ tơhrâ vâ chê 37 rơtal USD, tơmâng pêi hên a uâ pơliê, hriăn pro, mơjiâng tơmeăm khoăng, on tơhrik, điê̆n tưh ƀă kong ngê̆. A rôh trâm mâ, pôa Lê Minh Hưng, Ngế pro xiâm hnê ngăn tơnêi têa tối: Tơrŭm cheăng pơla Việt Nam - Sinuâ dế mơnhông tơbrê khât, tơniăn, rế trâu rơdâ tâ. Kong têa Sinuâ cho kong têa ki tê mơdró kân má môi dêi Việt Nam; Việt Nam cho kong têa tê mơdró kân má môi dêi Sinuâ tung ASEAN.

Tơdroăng ‘na ki tơƀrê hôm tâ tung tơdroăng nếo nôkố - pơlê pơla dêi Việt Nam tung mâu hơnăm kố hía nah, Ngế pro xiâm hnê ngăn tơnêi têa tối nhên, pơla mâu hơnăm la ngiâ ôh ti xê to pơkâ ‘na tơ rŭm cheăng, ‘no liăn pêi cheăng “hên tâ” mê thế “pêi lĕm tro tâ”, “tơ‘ƀrê tâ” ƀă “Pơxúa hên tâ nếo”.

Ngế pro xiâm hnê ngăn tơnêi têa pơkâ thế mâu khu mơdró kâ Sinuâ pơ'lêh rơdêi 'no liăn cheăng troh tơdroăng ki dâi lĕm, kŏng ngê̆, ki kơnâ ƀă pơ'lêh nếo tơmiât pêi rơkê; mơdêk tơrŭm, pro tơ'lêi hlâu ăm khu mơdró kâ Việt Nam veăng tung tơdroăng tê mơdró; 'no liăn cheăng tiô pơkâ krúa lĕm, krá tơniăn; rak ngăn tơdroăng rêh ối, hnoăng pơxúa ki tơxâng dêi mơngế pêi cheăng ƀă pêi pro tro hnoăng cheăng pơlê pơla.

Chin phuh Việt Nam kô pơtối tơmâng, rơtế prôk, kring vế hnoăng ƀă ki pơxúa tro luât, tơxâng dêi khu mơdró kâ; pro tơ'lêi hlâu vâ khu mơdró kâ 'no liăn cheăng, tê mơdró châ tơƀrê, krá tơniăn a Việt Nam.