Kố cho rôh lăm pôu râ Tơnêi têa apoăng troh a kong têa Rusi dêi Ngế ối a ko Đảng, Tơnêi têa sap hơnăm 1991, tơkŭm po klêi kơ’nâi Hneăng hôp kân XIV dêi Đảng ƀă rôh tâ phĭu Kuô̆k hô̆i hneăng má XVI. Hơnăm 2025, pêi lo liăn tê mơdró pơla Việt Nam – Rusi châ vâ chê 4,8 rơtal dollars; 5 khế apoăng hơnăm kố châ 2,16 rơtal dollars, tâk 6,4% tâng pơchông ƀă rôh kố hơnăm nah.

-Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă kơdrâi pôa rơtế Khu râ kăn xiâm Việt Nam lăm pôu râ Tơnêi têa troh a kong têa Rusi

Riân troh khế 7, Rusi ai 223 tơdroăng tơkêa bro mơ’no liăn cheăng a Việt Nam, tâi tâng kơxô̆ liăn vâ chê 1 rơtal dollars; Việt Nam ai 19 tơdroăng tơkêa bro a Rusi, tâi tâng kơxô̆ liăn kĭ 1,64 rơtal dollars. Péa tơnêi têa dế pêi pro rơdêi tơrŭm tung mâu kơvâ gâk kring tơnêi – kring tơniăn, on tơhrik, khoa hok – kŏng ngê̆, hnê hriâm, khôi túa lĕm tro ƀă ôm hyô; tung mê, ai tơdroăng tơkêa bro Tíu xiâm hriăn plĕng khoa hok ƀă kŏng ngê̆ trếo tik nik.

Rôh lăm pôu pêi cheăng châ pói tơngah mơjiâng tơdroăng ki hdró nếo, mơdêk tơrŭm cheăng ton xŏn tâi tâng Việt Nam – Rusi  mơnhông ó rơdêi, păng ‘nâng ƀă krá tơniăn; tơdrêng amê pêi pro trâu hơngế tâ ihiâm mơno loi tơngah ton xŏn ƀă tơrŭm cheăng tiô khôi vâi krâ nah pơla péa tơnêi têa.