Koh hâk Hneăng hôp kân teăng mâ mâu kăn lâp tơnêi têa roh má XIV dêi Đảng, ing mơ’nui khế 12/2025, kong pơlê Khánh Hoà hiăng tơkŭm mơjiâng pro, ƀă hiăng kêi 5 tơdroăng tơkêa ki kân. Tơdroăng pêi cheăng kâ pơlê pơla dêi kong pơlê kố xuân pơtối châ ’mâi mơnhông tiô kơ tơdroăng ki thăm pêi lo hên kế tơmeăm dêi hơnăm 2025, ing mê, pơhlêh nhên ăm tơdroăng rêh kâ ối dêi kuăn pơlê châ tơniăn klêi kơ’nâi tro têa kân lân lu. A cheăm Thuận Bắc, kong pơlê Khánh Hoà, hên rơpŏng pơtối mơnhông pêi cheăng kâ vâ châ hluăn ing kơtiê, rêh ối tơniăn ton, hiăng khên tơnôu pêi cheăng kâ, mơjiâng tơdroăng rêh ối tơniăn, phâi tơtô hên tâ. Jâ Chamaléa Thị Điêm, hdrông kuăn ngo Raglay, ối a thôn Đá Mài Dưới, cheăm Thuận Bắc ai tối tiah kố:

 “Hbrâ koh hâk Hneăng hôp kân XIV dêi Đảng, vâi krâ-nhŏng o ngin loi tơngah ƀă pói rơhêng vâ mâu kăn pơtối tŏng gum, ngăn khât troh kơpong hdrông kuăn ngo ki iâ mơngế; chêh pro kêi Hlá mơ-eá tối tơbleăng tơdroăng cheăng kal kí tro tiô tơdroăng ki ai păng ‘nâng, mơ’no liăn gum tro tơdroăng cheăng xiâm, tro mơngế. Ing mê, thăm mơdêk ó rơdêi luâ tâ kơ mê hnoăng cheăng ki vâ pêi pro dêi xêh, mơdêk dêi hnoăng cheăng, ƀă tuăn i hiâm tơrŭm, khŏm kơdo mơ-eăm pêi kâ dêi kuăn pơlê, vâ vâi krâ-nhŏng o hdrông kuăn ngo ôh tá xê to kâi châ hluăn ing kơtiê tơniăn ton, mê ối cho veăng vâ gum mơdêk ăm tơdroăng ki mơnhông tơdjuôm dêi tơnêi têa”.

Veăng a Hneăng hôp khu kăn teăng mâ lâp tơnêi têa roh má XIV dêi Đảng, mê Đảng ƀô̆ kong pơlê Khánh Hoà ai 32 ngế lăm hôp. Hnoăng cheăng ki pôu râng dêi mâu kăn teăng mâ châ mơhno tối nhên ăm hneăng ki veăng lăm hôp mê. Mâu rơkong ki tơpui tối dêi mâu kăn ƀô̆, đảng viên ƀă kuăn pơlê tung kong pơlê Khánh Hoà ƀă Kơxop hlá mơ-eá dêi Hneăng hôp mê hiăng châ chêh tối nhên, pơtroh ăm Tíu xiâm Đảng ing hdrối nah. Mâu kăn hiăng veăng mơdoh hên chôu phut, hâi khế hriăn plĕng nhên mâu tơdroăng tơkêa bro, vâ ing mê, kô veăng tơpui tối châ hên tơdroăng ki tơƀrê. Phŏ Yăo sư-Tiê̆n sih Phan Quốc Anh-Thái hnê Hngêi trung Đăi hok Văn Lang, kăn teăng mâ dêi khu kăn kong pơlê Khánh Hoà ki veăng a Hneăng hop XIV tối ăm ngin ‘nâi:

“Á hâk mơnê ‘nâng ƀă tơdroăng ki chêh tối tung kơxop hlá mơ-éa kố drêng Đảng pơtối vêh mơnhên mơnông túa lĕm tro tơdrêng ƀă tơdroăng mơnhông pêi cheăng kâ. Tơdroăng chêh tối tung hlá mơ-eá mê ai mơnhên, mơnhông cheăng chal nếo ‘na khôi túa lĕm tro, mơjiâng ki kơnía dêi tơnêi têa, mơhno túa lĕm tro dêi kuăn mơngế ƀă rơpŏng hngêi; ngăn tơdroăng pêi cheăng kâ cho tơmeăm khoăng ki kal, túa lĕm tro cho ki xiâm ki kal ăm mơnhông mơdêk. Ing tuăn i hiâm pôu râng hnoăng cheăng dêi mâu kăn, á kô thăm rế kơhnâ khât tung tơdroăng veăng tơpui tối ‘na mâu kơxop hlá mơ-eá ki chêh tối tung kơxop hlá ki kal dêi Đảng, dêi hnoăng cheăng vâ pêi pro mê”.

Tiô pôa Nghiêm Xuân Thành, Kăn pơkuâ hnê ngăn Đảng ủi, Kăn pơkuâ ngăn khu kăn pơkuâ hnê ngăn Đảng ƀô̆ kong pơlê Khánh Hoà tối, rêm ngế kăn teăng mâ tung khu kô pơtối mơdêk, pôu râng hnoăng cheăng, ing mê, veăng tơpui tối tiô kơ tơdroăng ki mơgêi tung mơnhông cheăng kâ-rêh ối dêi kong pơlê ƀă tơnêi têa. Ki rơhêng vâ tối kô tơkŭm tung kơvâ cheăng ki kong pơlê hiăng mơgêi ing mâu tơdroăng cheăng ki ai păng ‘nâng:

“Ƀă kong pơlê Khánh Hoà, kong pơlê hiăng ƀă dế hriăn plĕng, pơkâ ăm troăng hơlâ, troăng tơdjâ cheăng, ôh tá xê to tơdroăng ki tí tăng tơnăng ká xixŏng mê kô pêi pro tro a tơdroăng ki pơkuâ ngăn kơpong têa kơxĭ. Ki xiâm dêi tơdroăng mơnhông ôm hyô, tê mơdró, pêi chiâk deăng xúa kŏng ngê̆ chal nếo, malối cho păn tơnăng ká xixŏng tiô túa kŏng ngê̆ chal nếo; mơnhông cheăng logistics ƀă hnpoăng cheăng achê kĭng têa kơxĭ. Tơdrêng amê, kong pơlê xuân ối veăng gum, veăng tơpui tối mâu troăng hơlâ troăng tơdjâ, ki pơkâ a râ tơnêi têa vâ mơdêk mâu ivá cheăng ăm mơnhông pêi cheăng kâ a têa kơxĭ a mâu pơlê cheăm, ing mê, veăng gum kơhnâ khât ăm tơdroăng ki vâ mơnhông tơdjuôm dêi tơnêi têa”.

Ing tơdroăng ki ai păng ‘nâng ki rơkê plĕng dêi kong pơlê, ki rơhêng vâ tối, mê cho mâu tơdroăng ki kal khât tung vêh mơnhông pêi cheăng kâ-rêh ối pơlê pơla, rak ngăn ‘na tơdroăng rêh kâ ối dêi kuăn pơlê ƀă pơkâ mơnhên tơdroăng ki mơnhông krá tơniăn ing tơdroăng tơnăng păn ká xixŏng, mâu kăn teăng mâ dêi kong pơlê Khánh Hoà pói tơngah kô veăng gum kal kân khât tung pơkâ mâu troăng hơlâ dêi hneăng hôp. Mâu rơkong pâ thế ƀă tuăn i hiâm, pôu râng tơdroăng cheăng mê ôh tá xê to mơhno tuăn loi dêi kăn ƀô̆, đảng viên, ƀă kuăn pơlê Khánh Hoà mot tung tơdroăng ki ƀlêi trâng dêi Hneăng hôp kân Đảng má XIV, mê ối vêh mơnhên hiâm tuăn khŏm mơ-eăm dêi tâi tâng tơnêi têa pêi pro ki păng ‘nâng tiô hiâm mơno pói rơhêng vâ mơnhông rĕng, krá tơniăn, mơjiâng tơnêi têa kro mơdrŏng, hơniâp ro tung chal ki nếo.