Tung mê, pơkâ thế mơdêk hnoăng cheăng pôu râng ngế ki ối a ko mâu kơ koan, tíu pêi cheăng, kong pơlê, pro pơhlêh nhên ‘na tơdroăng ‘no liăn pêi cheăng, tê mơdró ƀă tơ’mot mơ’no liăn cheăng. Kong pơlê Quảng Ngãi mơ-eăm troh hơnăm 2030, ki rơkê tung pơkuâ ƀă tơdroăng ‘no liăn cheăng, tê mơdró dêi kong pơlê ối tung khi ki chía hên; PCI ối tung khu 20 to kong pơlê, pơlê kong kân ki ối má môi lâp tơnêi têa.

Krê PCI hơnăm 2026, ki rơkê tung pơkuâ châ pơkâ pêi ối tung khu ki tơdâng, mâu hơnăm pơtối mơ-eăm châ ối tung khu ki chía hên lơ tơniăn. Vâ châ tơdroăng pơkâ kố, Vi ƀan hnê ngăn kong pơlê Quảng Ngãi pơkâ thế ngế ki pơkuâ mâu kơ koan, tíu pêi cheăng, kong pơlê thăm mơdêk pơkuâ, hnê mơhno pêi pro hnoăng cheăng pơhlêh tơdroăng ‘no liăn cheăng, tê mơdró ƀă chiu pôu râng hnoăng a ngiâ Vi ƀan kong pơlê, Kăn hnê ngăn Vi ƀan kong pơlê ‘na tơdroăng pêi pro.