Troh nôkố, tơdroăng ki mơ’no liăn cheăng tơnêi têa dêi kong pơlê nếo châ 30% pơkâ pêi, iâ tâ kơlo tơdâng plâ hơnăm. Lâp kong pơlê nôkố ai lối 100 tơdroăng tơkêa bro kal châ tah lôi pá puât, tơvâ tơvân, tung mê 50 tơdroăng tơkêa bro ối tung hnoăng tơpui ƀă pêi pro dêi Vi ƀan kong pơlê Quảng Ngãi.

Drêng ai tơdroăng kố, kăn pơkuâ Vi ƀan kong pơlê Quảng Ngãi pơkâ mâu khu, kơvâ cheăng, khu pơkuâ tơdroăng tơkêa bro ƀă Vi ƀan mâu cheăm, bêng séa ngăn rêm tơdroăng tơkêa bro, mơnhên inhên xiâm kối hrá pêi pro, teăm tơdrêng tơpui ƀă pêi pro lơ tơbleăng mâu pá puât tơkâ hluâ hnoăng. Mâu khu pơkuâ tơdroăng tơkêa bro thế kĭ tơkêa ƀă Vi ƀan kong pơlê Quảng Ngãi kêi đeăng mơ’no liăn cheăng 100% pơkâ pêi kơxô̆ liăn tung hơnăm kố.