Kố cho tơmeăm dêi Đảng ƀô̆, mau kăn ƀă kuăn pơlê kong pơlê Quảng Ninh pơtroh ăm pái to kong pơlê ki tro lŭp ó má môi tung rôh kong mêi têa rơlêa kô nah, rêm kong pơlê 5 rơtal liăn. Pôa Nguyễn Khắc Định, Phŏ  Kăn hnê ngăn Kuô̆k hô̆i veăng hôp ƀă khĕn kơdeăn tơdroăng pêi pro ki lĕm teăm tơdrêng dêi Quảng Ninh. Ngăn mê cho mơhno ki ‘ló tro dêi tơdroăng tơrŭm, hơ-ui dêi pó, veăng mơhnhôk kuăn pơlê kơpong tro têa lu rĕng mơ-eăm tơkâ luâ xơpá.

Phŏ kăn hnê ngăn Kuô̆k hô̆i pơkâ thế mâu kong pơlê pơtối mơhnhôk tăng hên mâu lêng mơngế veăng kum kuăn pơlê vâ tơniăn tung rêh ối; hlối kơbông krếo mâu kơ koan, khu tơrŭm cheăng ƀă mâu ngế pơtối veăng kum vâ tơkâ luâ xơpá ki lŭp, ‘mai mơnhông pêi chiâk hlối tơniăn rêh ối dêi kuăn pơlê. Tơdroăng veăng kum mê châ tơngah tơbleăng troh lâp lu ing hnoăng vâ dêi kuăn pơlê tung tơdroăng hbrâ ví ƀă kơdroh kong prâi pro ôh tá tơniăn.