VOV4.Xơ Đăng - Sap ing ai pơreăng COVID-19 tâ tú, kăn ƀô̆, lêng mố dô̆i gak tơkăng kong dêi kong pơlê Dak Lak đi đo mơ-eăm tơka luâ mâu tơdroăng xơpá, pơtê dêi tơdroăng cheăng krê pêi pro tro “hnoăng cheăng pêi péa tơdroăng”: Rế rak vế hnoăng pơkuâ gak kring tíu tơkăng kong rế hbrâ mơdât pơreăng xông tâ tú. Tơdroăng kố rế pro lĕm tơ’nôm um méa ngế lêng mố đô̆i gak tơkăng kong a tíu tơkăng kong dêi Dak Lak.

Kong tô râ ó dêi khế 3 Tây Nguyên, a tíu gâk thôn Nhạp, cheăm Ia Lốp, tơring Ea Súp, kong pơlê Dak Lak, kăn ƀô̆, mâu lêng Đông mô đô̆i gak tơkăng kong Ea H’leo xuân séa ngăn gak kring krâu khât tíu tơkăng kong, pêi pro tơdroăng hbrâ, mơdât pơreăng COVID-19. Trung tă Nguyễn Thanh Tú, Phŏ đô̆i trương séa ngăn, Đông mô đô̆i gak tơkăng kong Ea H’Leo gak a thôn Nhạp tối: Ai drêng pơreăng xông tâ tú ó, kuăn kơdrâi dế cho sinh viên a Pơlê kong kân Hồ Chí Minh tro tâ COVID-19 ôh tá ai nhŏng o ối achê. On veăng ối a hngêi đi đo châi tamo, laga ngoh xuân rơtế khu plâ hâi plâ măng gâk tơkăng kong, hên khế ôh tá vêh a hngêi vâ pêi kêi đeăng hnoăng cheăng châ pơcháu.

‘’Xuân tô tuăn ‘nâng xua kuăn ‘nĕng tiah mê rơpŏng ôh tá ai nhŏng o amê. Tơdroăng klâ kơtăn dêi gá tiah lâi, lo lăm a hngêi pơkeăng pơtân môi tiah lâi, tơdroăng pơlât môi tiah lâi, troăng pêi môi tiah lâi mê á ôh tá ‘nâi, á ôh tá ối tơdrêng amê xua mê tô tuăn ‘nâng. Laga xuân ôh tá ‘nâi pro ti lâi xếo, tơdroăng pêi hnoăng cheăng dêi á cho thế apoăng klêi mê ối thế mơhnhôk kơdrâi, kuăn ‘nĕng ti lâi mơ-eăm tơkâ hneăng xua pá puât cho tơdroăng pá puât tơdjuôm’’.

Mô đô̆i gak tơkăng kong Dak Lak séa ngăn gak kring tơkăng kong

Hngêi ối kơtăn đông 40 km, laga xua hnoăng cheăng Trung ŭi Hà Văn Tân, kăn ƀô̆ Đô̆i mơhnhôk kuăn pơlê Đông mô đô̆i gak tơkăng kong Ea Hleo ai drêng vâ chê tơdế hơnăm ôh tá châ vâ vêh a hngêi. Trung ŭi tối: Nôkố kơdrâi tro F0, kuăn ối kŭn 17 khế thế pơtroh a hngêi jâ peăng nôu rak ngăn. Mơhé pâ kơdrâi laga ngoh xuân ối a đông pêi pro hnoăng cheăng.

‘’Mê kơdrâi xuân plĕng xua mê ôh tá ‘nhó veăng kum ƀă á. Á xuân pâ kơdrâi kuăn ‘nĕng mơhé kơtăn ôh tá hơngế laga ai drêng pơreăng roh troh 3 khế ôh tá vêh a hngêi. Ƀă á sap ing mot hngêi trung hriâm mê hiăng mơnhên hiâm mơno xo lêng pro hnoăng cheăng xua mê mơhnhôk dêi tơná, tơná khŏm mơ-eăm vâ kêi đeăng hnoăng cheăng châ pơcháu’’.

Mô đô̆i gak tơkăng kong Dak Lak khŏm gak kring tơniăn hnoăng pơkuâ gak kring tơkăng kong

Drêng rơtế khu pú pêi pro hnoăng cheăng a tơkăng kong, Trung ŭy Nông Văn Lợi, Đông mô đô̆i gak tơkăng kong Ia Rvê tâng tơdroăng pâ tro tâ COVID-19 a Bình Dương tung pơla pơreăng xông tâ tú ó má môi. Trung ŭi  Lợi hơ’muăn tối: Tâng tối pâ kơdrâi hlâ á châi hiâm ‘nâng. Laga drêng mê pơreăng xông tâ tú ó ƀă tơná dế pêi hnoăng cheăng xua mê ôh tá chiâng vâ vêh tiô lôi ‘mé.

‘’Drêng pêi hnoăng cheăng gak mơdât pơreăng COVID-19 tâng tối pâ hlâ a Bình Dương châm. Tung châ xuân tô tuăn, khéa ‘nâng laga á châ nhŏng o, khu hnê mơhno đông, Khu xiâm pơkuâ lêng krếo phôn mơhnhôk hiâm mơno. Ƀă á pêi cheăng hiăng ton tung khu lêng xua mê tơmiât krá, xuân mơnhên tơdroăng hiăng tiah mê châ vêh xuân kum rơpŏng, ôh tá châ vêh xuân krếo phôn pâ rơpŏng pôi tá ‘nhó’’.

Trung ŭi Hà Văn Tân krếo phôn kơ-êng kơdrâi kuăn drêng pơtê cheăng

Péa hơnăm hiăng hluâ, pêi pro hnoăng cheăng ‘’péa xôh’’, mâu đông mô đô̆i gak tơkăng kong a Dak Lak hiăng tơkŭm po lối 5 rơpâu tôh, đô̆i ƀă vâ chê 33 rơpâu roh kăn ƀô̆, mâu lêng veăng séa ngăn, gak kring tơkăng kong. Tơdrêng amê, rak đi đo 9 tíu gak hbrâ mơdât pơreăng COVID-19. Klêi kơ’nâi séa ngăn, mơdât pơreăng mô đô̆i gak tơkăng kong Dak Lak hiăng châ hlo, rup ƀă pơxâu phak 18 roh ƀă 57 ngế pro xôi gak kring tơkăng kong.

Tiô Trung tă Nguyễn Văn An, Kăn pơkuâ Đông mô đô̆i gak tơkăng kong Ia Rvê: Pêi pro hnoăng dêi Khu xiâm pơkuâ lêng, đông lêng hiăng séa ngăn, mơdât mâu tơdroăng mot ôh tá tro luât, tơdrêng amê, ôh tá ăm pơreăng COVID-19 xông tâ tú.

‘’Kăn ƀô̆, mâu lêng dêi đông đi đo mơnhên hnoăng cheăng gak kring hnoăng pơkuâ tơkăng kong ƀă hnoăng cheăng hbrâ mơdât pơreăng COVID-19 ƀă mơnhên hbrâ mơdât pơreăng môi tiah hbrâ mơdât lêng ‘mêi. Xua mê, ngin đi đo mơhnhôk, hnê hriâm vâ mơdêk hlê plĕng, hiâm mơno, pôu râng hnoăng cheăng tah lôi mâu tơdroăng pá puât. Mơhé tơdroăng rêh ối tơmeăm khoăng, hngêi trăng troăng klông mâu tíu gak tơkăng kong cho pá puât, kong tô, khăng khoăng, hngêi pơtân. Laga ƀă rêm kăn ƀô̆ mô đô̆i pơrá plĕng hiâm mơno pôu râng hnoăng cheăng pêi tơtro rêm hnoăng cheăng châ pơcháu’’.

Kong pơlê Dak Lak ai 7 đông mô đô̆i gak tơkăng kong châ pơcháu hnoăng cheăng pơkuâ, gak ngăn lối 71 km troăng tơkăng kong ƀă kong pơlê Mondulkiri, kong têa Kul. Kơpong tơkăng kong a Dak Lak ai hên troăng kŭn, troăng nếo po tơ’lêi ai ngế prôk tơkâ tơkăng kong, mot tung tơnêi têa pin ôh tá tro luât pro tâ tú pơreăng COVID-19 tơkâ tơkăng kong. Ƀă tơdroăng khŏm mơ-eăm dêi kăn ƀô̆, mô đô̆i gak tơkăng kong rơtế tơdroăng tơdjuôm ivá dêi khu râ kăn pơkuâ ƀă kuăn pơlê hnoăng pơkuâ a tơkăng kong Dak Lak đi đo châ gak kring tơniăn.

Tuấn Anh chêh

A Sa Ly tơplôu ƀă tơbleăng