Sap ing kơxo má, hên kơdrâm kuăn pơlê sap ing 11 to thôn dêi cheăm tơkăng kong Ia Đal tơkŭm a tíu ki tơkŭm po Tơdroăng “Hơngui tơkăng kong hơtôu hiâm mơno kuăn pơlê”. Akố vâi krâ nhŏng o veăng tung hên tơdroăng ki xah hêi ro Têt, môi tiah tơ’noăng kơxuô ƀă pế kơƀăn chưng ngiât, tơ’noăng hvât còn, hrot kơxái, trut loăng ƀă hên ki ê. Mâu rơpŏng ki xơpá châ kăn ƀô̆, lêng mố đô̆i gâk tơkăng kong ki “roê kế tơmeăm 0 liăn’’ vâ rah xo mâu hmân ếo, xo phái, têa rơmâ, têa măm, ƀôt ngot ƀă hên ki ê.

Nâ Lục Thị Đương, hdroâng Thái, a thôn 4, ăm nâi, 14 hơnăm lo ing pơlê xiâm Thanh Hóa ối a Kon Tum pêi cheăng, hmâ rêm rôh Têt troh, Hơngui vêh nâ châ rêh ối tung tơdroăng ki hơniâp ro Têt dêi pơlê xiâm ƀă hlo nhên hiâm mơno tŏng gum dêi mâu kăn ƀô̆ lêng mố đô̆i gâk tơkăng kong:

“Châ veăng ro Têt Hơngui tơkăng kong tơkŭm po á hlo hơniâp ro khât. Á ƀriê tung mơno xua Đông Mố đô̆i gâk tơkăng kong gum kuăn pơlê, môi tiah kuăn ‘nĕng cháu chái ngin peăng pá đông xuân păn răk ăm há’’.

Ƀă ngoh Hà Văn Tình, tối:

“Tơdah Têt Ất Tỵ 2025 châ Mố đô̆i gâk tơkăng kong kong pơlê Kon Tum tơkŭm po Hâi mơdĭng kơƀăn chưng ngiât vâi krâ nhŏng o a kơpong tơkăng kong kố ro khât. Drêng hâi mơdĭng kố châ trâm mâ xah hêi. Khu pơkuâ ngăn Mố đô̆i Gâk tơkăng kong kong pơlê Kon Tum hiăng diâp mâu tơmeăm ki ai pơxúa troh ăm vâi krâ nhŏng o kuăn pơlê. Mâu rơpŏng kuăn pơlê vâi ro khât’’.

Rôh Têt khôi hmâ hdroâng mơngế hơnăm kố, cheăm tơkăng kong Ia Đal, tơring Ia H’Drai châ Khu pơkuâ Mố đô̆i gâk tơkăng kong kong pơlê Kon Tum rah xo tơkŭm po râ kong pơlê Tơdroăng “Hơngui tơkăng kong hơtôu hiâm mơno kuăn pơlê” tro ƀă “Hâi mơdĭng kơxuô kơƀăn chưng ngiât”. A tơdroăng kố, khu mố đô̆i gâk tơkăng kong ƀă khu kăn pơkuâ kong pơlê hiăng diâp 400 to hlá cơ Tơnêi têa, lối 250 kơxuô tơmeăm, 400 to kơƀăn chưng, diâp liăn hriâm rơkê ăm 9 ngế o hok tro ối tung tơdroăng “Mơdêk hvêa chêng o troh hngêi trung”, túa “Kuăn rak đông mố đô̆i gâk tơkăng kong’’; diâp ro kăn ăm 2 rơpŏng kơtiê vâ păn. Tâi tâng kơnâ lối 350 rơtuh liăn.

Thiê̆u tă Nguyễn Văn Đại, Chính trĭ viên Đông Mố đô̆i gâk tơkăng kong Ia Đal, ăm ‘nâi, kố cho tơdroăng ki mơnê dêi kăn ƀô̆, lêng mố đô̆i gâk tơkăng kong ƀă kuăn pơlê tíu tơkăng kong rêm rôh Têt troh, Hơngui vêh:

“Ing tơdroăng kố châ tơniăn ‘na tơdroăng tơrŭm krá kâk pơla khu lêng ƀă kuăn pơlê a tơring, cheăm kơpong tơkăng kong. Ing tơdroăng kố xuân cho rôh vâ pin rak vế khôi hmâ ki kơnía lĕm tro ƀă mơnhông tơdroăng tơ’noăng vâ rơtế ƀă mố đô̆i gâk tơkăng kong rak vế krá tơniăn hnoăng pơkuâ gâk kring tơkăng kong tơnêi têa’’.

Pêi pro túa pơkâ “ôh tá lôi kơbố ki lâi pá rŏng”, tŏng gum rêm hngêi, rêm ngế a tíu tơkăng kong pơrá ai tơdroăng châ ro Hơngui, tơdah Têt, pơtối ing hâi lơ 19 troh lơ 25/1, mố đô̆i gâk tơkăng kong kong pơlê Kon Tum tơkŭm po hên hĭn tơdroăng “Hơngui Tơkăng kong hơtôu hiâm mơno kuăn pơlê’’ ƀă “Hâi mơdĭng kơxuô kơƀăn chưng ngiât” a 12 to cheăm a tíu tơkăng kong tơdjêp ƀă kong têa Lếo prếi Kul. Châ ‘nâi, tâi tâng kơnâ mâu kế tơmeăm diâp ƀă tơdroăng ki tŏng gum Têt Lo hơnăm nếo Ất Tỵ 2025 ăm kuăn pơlê 13 to cheăm tơkăng kong a kong pơlê Kon Tum cho lối 1 rơtal liăn.