Tơpui a rôh hôp, pôa Trần Trung Tính, Phŏ ngế xiâm ngăn Khoa hok ƀă kong ngê̆ ăm ‘nâi, tiô Pơkâ kơxô̆ 21/2026, Ngế pro xiâm hnê ngăn Chin phuh hiăng pơkâ Inâi kong ngê̆ tung la ngiâ ƀă tơmeăm kong ngê̆ tung la ngiâ. Việt Nam mơnhên 10 kong ngê̆ tung la ngiâ, tung mê ai kong ngê̆ kơxô̆, kong ngê̆ lươ̆ng tưh, kong ngê̆ sinh hok ƀă y sinh ki rơkê plĕng, vâ kơjo gum mâu ngế liăn ngân, tơ’mot ‘no liăn cheăng, thăm mơdêk hriăn plĕng, xúa ƀă pro ngế ki pơkuâ mâu kŏng ngê̆ ki kal xiâm.

Tung pơla pêi pro Pơkâ kơxô̆ 57 ‘na mơnhông khoa hok, kong ngê̆, pơhlêh nếo tơmiât pêi rơkê ƀă pơhlêh xúa internet, rôh hôp tối nhên tơdroăng pơkâ thế pơhlêh túa tơmiât pêi, ăm khoa hok ƀă kong ngê̆ chiâng ivá ki xiâm xúa tơdrêng tung mơnhông. Mâu khu ki hriăn ‘na khoa hok tơkŭm tơpui tơno ‘na tuăn ngoâ rơkê xúa kuăn mơngế pro, kŏng ngê̆ lươ̆ng tưh, hoă hok krá tơniăn, on tơhrik kơtâu ƀă trếo tik nik, pơhlêh xúa on tơhrik ƀă mâu tơdroăng ‘na khoa hok, kong ngê̆ dế mơ’no.