Tơdroăng kố cho môi tung mâu tơdroăng cheăng pêi tơmiât troh tơbâ 50 hơnăm tơleăng lĕm Tây Nguyên, peăng Hdroh, pro tơnêi têa tơrŭm chiâng môi, xua Khu xiâm pơkuâ ngăn lêng tơrŭm ƀă Khu pơkuâ ngăn cheăng Đảng Dak Lak tơkŭm po. A rôh hôp, mâu tươ̆ng lêng, khu ki hriăn ‘na khoa hok ƀă mâu mố đô̆i hneăng hdrối tơpui tối leăng tơdroăng ki kal chiâng châ ƀlêi trâng kố, tối nhên tơdroăng hnê mơhno rơkê plĕng dêi Khu xiâm pơkuâ tơdroăng kal kí ƀă tơdroăng ki tơmiât pêi rơkê tung tơdroăng tơplâ, pro tơdroăng kơdrâ, tơ’mot mâu khu xâ vâ khu lêng pin plâ ‘nhiê mâu tíu ki kal môi tiah Đức Lập prế Ƀuôn Ma Thuôt, Pleiku ƀă Kon Tum.

Ƀlêi trâng kố hiăng pro ivá ăm tơdroăng tơplâ tơleăng tâi tâng peăng Hdroh ƀă pro tơnêi têa tơrŭm chiâng môi. Veăng hôp ƀă hnê mơhno a Rôh hôp, Thươ̆ng tươ̆ng Lê Huy Vịnh, phŏ ngế pơkuâ ngăn lêng ăm ‘nâi, Khu tơkŭm po hiăng châ xo vâ chê 90 hlá tơbeăng chêh tối ƀă hên tơdroăng ki kal, rơkê, ai hên tíu ngăn nếo ‘na ƀlêi trâng Tây Nguyên. Rôh hôp kố cho rôh ki kal vâ Đảng ƀô̆, Khu kăn pơkuâ ƀă Kuăn pơlê kong pơlê Dak Lak tơbleăng troh mâu kăn, khu lêng-kuăn pơlê tung lâp tơnêi têa mâu tơdroăng ki ƀlêi chiâng tung tơdế chal mơjiâng ƀă mơnhông.