VOV4.XơĐăng - Kơxo lơ 11/1, a Hà Nội, Hngêi tơleăng xiâm tơkŭm po Rôh hôp khoa hok “Hơ’lêh luât a Hngêi tơleăng kuăn pơlê troh hơnăm 2030, pơkâ troăng hơlâ troh hơnăm 2045 pêi pro châ tiô tơdroăng ki rơhêng vâ mơjiâng, pêi klêi Tơnêi têa hnoăng luât xah hô̆i chuh ngiah Việt Nam”. Pôa Nguyễn Xuân Phúc, ngế cheăng tung Khu xiâm pơkuâ tơdroăng kal kí, kăn xiâm hnê ngăn tơnêi têa, kăn pơkuâ Khu hnê mơhno cheăng Hơ’lêh Luât Tơnêi têa, Kăn pơkuâ Khu hnê mơhno cheăng tơdroăng pơkâ “Tơdroăng cheăng tung la ngiâ mơjiâng ƀă pêi klêi Tơnêi têa hnoăng luât xah hô̆i chuh ngiah Việt Nam troh hơnăm 2030, troăng hơlâ pơkâ troh hơnăm 2045” veăng ƀă tơpui hnê mơhno.

Tơpui a rôh hôp, pôa Nguyễn Xuân Phúc pơkâ thế kal pơkâ mơ’no mâu troăng hơlâ hơ’lêh nếo tung hneăng hơnăm sap ing nôkố troh hơnăm 2030, troăng pơkâ troh hơnăm 2045 tơtro ƀă tơdroăng ki ai khât dêi tơnêi têa ƀă troăng mơnhông mơdêk tơdjuôm dêi lâp plâi tơnêi.

Tơkŭm tung mâu troăng hơlâ luât hơ’lêh ‘na tơrŭm ƀă pêi cheăng dêi Hngêi tơleăng kuăn pơlê; pơkâ nhên tơdroăng rak ngăn hlá mơ-éa dêi hngêi tơleăng vâ rak tơniăn pơla rêm râ tơleăng, hơ’lêh, pêi klêi hlá mơéa pơsăm tối luât ki rơkê, tơƀrê.

Katarina Nga tơplôu ƀă tơbleăng