Tơpui a Rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Pơkâ 57 thế pêi klêi troh hơnăm 2030, Việt Nam ối tung Top 3 to kong têa ki ối ahdrối Đông Nam Á, Top 50 to kong têa ối má môi lâp plâi tơnêi ‘na ivá tơxup tơbriât kơxô̆ ƀă kơlo kơxô̆ mơnhông Chin phuh diê̆n tưh.

Troh hơnăm 2045, Việt Nam ối tung khu 30 to kong têa ối a hdrối lâp plâi tơnêi ‘na pơhlêh tơmiât pêi rơkê, pơhlêh kơxô̆; ki xiâm pơkâ pêi hơnăm 2030 cheăng kâ kơxô̆ kô châ lối 30% GDP ƀă tâk 50% a hơnăm 2045. Tối nhên, ƀă tơdroăng ki khŏm mơ-eăm dêi khu pơkuâ tơdroăng kal kí ƀă tâi tâng kuăn pơlê, Việt Nam ai hlâu mâu tơdroăng ki hiăng pêi châ tung kơvâ cheăng kố, xua tơdroăng mơnhông krá tơniăn dêi rơpŏng hngêi, pơlê pơla, xua tơdroăng ki u ối dêi tơnêi têa ƀă hdroâng mơngế, Kăn xiâm hnê ngăn Kuô̆k hô̆i loi, ƀă ivá khŏm mơ-eăm, khên tơnôu, tuăn ngoâ rơkê ƀă khŏm mơ-eăm, mâu kơ koan dêi Kuô̆k hô̆i kô pêi châ mâu tơdroăng cheăng ki kal tung mơjiâng Kuô̆k hô̆i kơxô̆, veăng gum ăm tơdroăng mnhông cheăng kâ rĕng ƀă krá tơniăn dêi tơnêi têa.