VOV4.Xơ Đăng - Hâi lơ 20/9, a kong pơlê An Giang po Rôh hôp lâp plâi tơnêi bro troăng tơkăng kong Việt Nam – Kul hơniâp lĕm, tơrŭm tơroâ rơtế mơnhông mơdêk rôh má 6 hơnăm 2022. Tơpui a rôh po hneăng hôp, pôa Lê Tiến Châu, kăn phŏ hnê ngăn – Kăn chêh tôm xo rơkong Vi ƀan xiâm Măt trâ̆n Tơnêi têa Việt Nam tối nhên, klêi kơ’nâi lối 5 hơnăm kĭ tơbleăng tơdjuôm klêi kơ’nâi Rôh hôp lâp plâi tơnêi ‘na bro troăng tơkăng kong hơniâp lĕm, tơrŭm tơroâ Việt Nam – Kul, mâu tơdroăng kal ki châ tơbleăng, pêi pro rế hía rế rơdâ a rêm râ, hlo tơƀrê khât, malối cho a mâu kong pơlê ki ai troăng tơdjuôm, pêi pro rơhêng vâ tơdjuôm dêi kuăn pơlê péa tơnêi têa.

Vi ƀan pơkuâ xiâm Măt trâ̆n Tơnêi têa Việt Nam ƀă Hô̆i đong Tơnêi têa Măt trâ̆n Tơrŭm Mơnhông Tơnêi têa Kul kĭ tơkêa Tơbleăng tơdjuôm rôh má 6

A rôh hôp kố, mâu kăn rơtế ƀă dêi rơpó, tơpui tơno mơnhên tối klêi kơ’nâi tơbleăng pêi pro tơbleăng tơdjuôm a Rôh hôp má 5, veăng tơpui ối tung kơxop Hlá mơéa tơbleăng tơdjuôm ‘na Rôh hôp lâp plâi tơnêi bro troăng tơkăng kong Việt Nam – Kul hơniâp lĕm, tơrŭm tơroâ, tơrŭm rơtế mơnhông rôh má 6, hơnăm 2022” tơdrêng amê hlối pơkâ mơ’no mâu tơdroăng ki hơ’lêh nếo tá tơdroăng kal, vâ mơdêk ki khât, tơƀrê tơrŭm pơla péa pâ tung la ngiâ.

Katarina Nga tơplôu ƀă tơbleăng