VOV4.Xơ Đăng - Kơxo lơ 10/3, a Hngêi Kuô̆k hô̆i, pơxiâm po Roh hôp má 9 dêi Viƀan pơkuâ Kuô̆k hô̆i. Roh hôp kố klâ pro 2 roh, ƀă tâi tâng hâi khế pêi cheăng cho 8 hâi. Roh 1 dêi roh hôp tơkŭm po hâi kố troh hâi lơ 17/3. Tơtrŏng má môi, roh hôp kố, Viƀan pơkuâ Kuô̆k hô̆i mơdoh 1 hâi pêi cheăng vâ tơkŭm po kơ-êng ƀă tiâ rơkong kơ-êng dêi kăn teăng mâ Kuô̆k hô̆i ƀă 2 ngế kăn cheăng tung Chin phuh. Pôa Nguyễn Hồng Diên, Ngế xiâm pơkuâ Kơmăi kơmok – tê mơdró ƀă pôa Trần Hồng Hà, Ngế xiâm pơkuâ loăng pơlái kong kế ƀă kong prâi kô tiâ rơkong kơ-êng a roh hôp kơ-êng apoăng dêi Viƀan pơkuâ Kuô̆k hô̆i hneăng má 15.

Tơdroăng xiâm kơ-êng pôa Nguyễn Hồng Diên tơkŭm ‘na tơdroăng pêt mơjiâng tơmeăm, tơdroăng tê rôe têa châu têa kơxăng; tơdroăng pơkuâ yă têa châu têa kơxăng tung pơla kố nah. Tơdroăng xiâm kơ-êng pôa Trần Hồng Hà tơkŭm ‘na pêi pro pơkâ ‘na kơ-êng ƀă séa ngăn tơdroăng dêi Kuô̆k hô̆i tơdjâk troh pơkâ pêi, pơkuâ, xúa tơnêi tơníu a tíu kuăn pơlê rêh tê mơdró kơdrâm.

Roh kơ-êng tiô tối hdrối tơkŭm po a hâi lơ 16/3, châ tơkŭm po a Hngêi hôp kân Diên Hồng, Hngêi Kuô̆k hô̆i ƀă tơdjêp mơ’no tơdrêng tung um tơvi ƀă 63 khu râ kăn teăng mâ Kuô̆k hô̆i a mâu kong pơlê, pơlê kong kơdrâm ối tung tơnêi têa ƀă châ mơ’no tơdrêng tung um tơvi vâ kơdrâm kuăn pơlê ƀă kuăn pơlê séa ngăn.

A Sa Ly tơplôu ƀă tơbleăng