Drêng tơbâ 94 hơnăm Hâi mơjiâng Kong đoân Việt Nam, kơxê lơ 28/7, a Hngêi Kuô̆k hô̆i po Rôh hôp Mơngế pêi cheăng hơnăm 2023 ai inâi “Pêi klêi troăng hơlâ tŏng kum, luât tơdjâk troh mâu ngế pêi cheăng ƀă khu tơrŭm Kong đoân”. Pôa Vương Đình Huệ, Kăn xiâm hnê ngăn tơnêi Kuô̆k hô̆i pơkuâ po rôh hôp.

Rôh hôp kố ai tơdroăng ki veăng dêi dâng 500 ngế kăn teăng mâ ăm kŏng nhân, ngế pêi cheăng tung lâp tơnêi têa. Kố cho tơdroăng tơmiât rơkê dêi Tổng Liên đoân Việt Nam ƀă Ƀơrô cheăng Kuô̆k hô̆i tơrŭm tơkŭm po. Rôh hôp kố cho rôh vâ đoân viên kong đoân, mâu ngế pêi cheăng tung lâp tơnêi têa tối ‘na hiâm mơno, tơdroăng ki púi vâ, pơkâ mơ’no ƀă Kuô̆k hô̆i, kăn pơkuâ Kuô̆k hô̆i ‘na troăng hơlâ, luât tơdjâk troh mâu ngế pêi cheăng ƀă tơdroăng cheăng Kong đoân, pơkâ mơ’no túa tơmiât, troăng hơlâ mơdêk cheăng kâ rêh ối pơlê pơla, pêi klêi mâu tơdroăng pơkâ, hnoăng cheăng hơnăm 2023 ƀă hneăng hơnăm 2021 – 2026, kum mơdêk tơdroăng rêh ối kuăn pơlê ƀă pêi pro tơdroăng rơhêng vâ hdroâng mơngế kro mơdrŏng, hơniâp ro.