Rôh hôp tơkŭm tơno ‘na mâu troăng hơlâ mơdêk hnoăng cheăng dêi tơpui kâ Đảng, mơdêk ki tơƀrê tơpui kâ kuăn pơlê, thăm mơnhông tơrŭm cheăng pơla pái tơdroăng ki xiâm tơpui kâ mê cho tơpui kâ Đảng, tơpui kâ Tơnêi têa ƀă tơpui kâ kuăn pơlê, tơdrêng amê hlối mơdêk hnoăng cheăng dêi mâu kơ koan teăng mâ Việt Nam a kong têa ê. Tơpui hnê mơhno, pôa Trần Cẩm Tú pơkâ thế mâu khu xiâm, kơvâ cheăng, kong pơlê ƀă mâu khu tơrŭm cheăng kal kí – rêh ối pơlê pơla pơtối mơdêk ki hlê plĕng ‘na tíu ối, hnoăng cheăng dêi rêm ngế xiâm tơpui kâ, rak tơniăn tơbleăng pêi tơdâng tơ’mô, tro ‘ló vâ gum tơƀrê mâu tơdroăng pơkâ cheăng tung la ngiâ dêi tơnêi têa.

Pôa xuân tối nhên hnoăng cheăng ‘mâi mơnhông, pro trâu hngế tơrŭm cheăng ƀă mâu Đảng xiâm, malối cho mâu Đảng pơkuâ a mâu kong têa ki achê, mâu kong têa ki kân ƀă mâu khu tơrŭm cheăng hiăng mơjiâng tơrŭm cheăng, tơdrêng amê hlối pơtối pơhlêh nếo, tơbleăng pêi rơkê mâu troăng hơlâ tơrŭm cheăng tung kơvâ cheăng Đảng.