A rôh trâm mâ, péa ngế kăn tối nhên ƀă tối khât tơdroăng ki kal troăng hơlâ dêi tơdroăng mơdêk tâ nếo troăng ki xiâm tơrŭm cheăng ki kal ‘na lêng, kring tơniăn ƀă tơpui kâ, vâ rak tơniăn kal kí, kring tơniăn pơlê pơla; ngăn mê, cho môi tung mâu tơdroăng ki kal dêi tơdroăng tơrŭm cheăng krê xêh pơla Việt Nam - Lếo.

Péa pâ tối, kô pơtối rak vế ki tơƀrê dêi luât pơkâ tơrŭm cheăng nôkố, hlối pơtối pơ’lêh nếo ƀă mơdêk tơƀrê tơrŭm cheăng tung tŭm tơdroăng. Ing mê, péa tơnêi têa kô tăng ngăn ‘na mơjiâng mâu luât tơrŭm cheăng ki nếo tơtro, vâ mơdêk tâ nếo tơrŭm môi tuăn pơla Việt Nam Lếo, ai pơxúa khât ăm kuăn pơlê tơrêm tơnêi têa ƀă hlối veăng ‘no hnoăng pro hơniâp, tơrŭm ƀă mơnhông dêi kơpong xuân môi tiah lâp plâi tơnêi.