VOV4.Xơ Đăng - Kơxo lơ 11/2, a 58 Quán Sứ, Hà Nội, Rơ’jíu Việt Nam tơkŭm po Leh tơbâ Hâi mơjiâng Rơ’jíu lâp plâi tơnêi ƀă dó inâi ‘’Mơjiâng rơ’jíu ƀă tơdroăng loi tơngah’’ ƀă tơpui tơno ‘na hnoăng ƀă troăng prôk dêi Rơ’jíu tung rơxông nếo vâ rơ’jíu đi đo tíu ki mơ’no tơdroăng kal loi tơngah ƀă mơngế ki tơmâng. A roh tơpui tơno, mâu ngế rơkê tung tơnêi têa ƀă lâp plâi tơnêi mơnhên, rơ’jíu xuân cho tíu tơbleăng tơdroăng kal rĕng, loi tơngah, troh rơdâ, laga kal pơtối mơnhông mơdêk ki rơdêi krê, vâ pro ăm mâu ngế tơmâng hâk vâ.

Ƀă tơdroăng mơnhông mơdêk kŏng ngê̆, Rơ’jíu ối cho tơdroăng mơnhên ki ai tơdroăng, hên nâl ƀă hên tơdroăng a mâu ngế ki rah chêh, tơpui pơchuât tung Rơ’jíu. Mâu ngế ki rơkê ‘na rơ’jíu tối hlá tơbeăng tối tơdjuôm ƀă rơ’jíu kal ai tơdroăng pơhlêh nếo xêh, mơnhông mơdêk mâu tơdroăng rơdêi ki krê dêi hlá tơbeăng ki phá tơ-ê, djâ tơdroăng rĕng, tơtro, loi tơngah ƀă ki rơhêng vâ tối pro mơngế tơmâng hâk vâ vâ mơdêk tơdroăng loi tơngah dêi kuăn pơlê.

A Sa Ly tơplôu ƀă tơbleăng