*** Hơnăm 2025, Dak Lak pơcháu lối 3.030 tơdroăng pơkâ, tung mê ai 2.550 tơdroăng pơkâ kơxô̆ lăm pro lêng mot tung lêng ƀă lối 480 tơdroăng pơkâ pro lêng ki veăng pêi cheăng ƀă mâu kŏng an kuăn pơlê. Tung rôh rah xo mot pro lêng dêi mâu rơtăm ki lăm pro lêng hơnăm 2025 kố, Y Ra Ni Byă (kuăn ngo Rơđế) kot mâ hơnăm 2005, ối a buôn Cư Phiăng, cheăm Hòa Phong, tơring Krông Bông, kong pơlê Dak Lak hiăng pleăng tơná chêh hlá đơn pâ mot pro lêng. Klêi mâu hâi têt sôk ro, Y Ra Ni hiăng hbrâ vâ lăm pro lêng.

“A sôk ro drêng châ mâu kăn kong pơlê pro tơ’lêi ăm á châ lăm pro lêng. A kô mơ-eăm hbrâ rơnáu i tro tŭm tơdroăng vâ lăm pro lêng pêi cheăng tung lêng kơhnâ khât, rak vế pêi pro tro hnoăng cheăng râ kơpêng pơcháu. Drêng hiăng pê klêi hnoăng cheăng á kô vêh a pơlê vâ gum rơpŏng hngêi ƀă pêi mâu tơdroăng ki pơxúa ăm pơlê pơla”.

Tiô pơkâ, tung pơla tơkŭm po leh pơcháu, xo mơngế pro lêng hơnăm 2025 po a hâi lơ 13/2/2025 po a hâi lơ 13/2 hơnăm 2025 (tơkéa vâ tối hâi lơ 16/1 hơnăm Ất Tỵ). Ƀă hên mâu hơnăm ối nếo, châ khăm rah pro mố đô̆i, pro lêng ôh tá xê to hnoăng cheăng, mê ối cho tuăn loi, hâk tơngăm khât.

*** “Khế pái tơkăng kong’’ cho tơdroăng tiah hmâ rêm hơnăm dêi mâu khu tơrŭm cheăng Đoân, Hô̆i tung kong pơlê Gia Lai vâ pêi pro mâu tơdroăng “Á hâk vâ Tơnêi têa á’’. Khế 3/2024, Khu pơkuâ Đoân Droh rơtăm tơring Đức Cơ hiăng tơrŭm tơkŭm po tơdroăng ‘’Khế pái tơkăng kong’’, diâp hngêi tuăn pâ, on trâ kơtâu ƀă mâ hâi ƀă hnoăng liăn ăm droh rơtăm phô̆m xông kân tơring, tơdrêng amê khăm pơlât ƀă xing xoăng pơkeăng tê kơtê ăm kuăn pơlê.

Pơtối mê, cho tơdroăng ‘’Rơxông ối nếo Gia Lai xua tơkăng kong Tơnêi têa’’ a cheăm Ia Pnôn, tơring Đức Cơ vâ mơdêk hlê plĕng ‘na Luât Tơkăng kong tơnêi têa vâ kơdroh tơdroăng xo on veăng tá hâi tro hơnăm tung đoân viên, droh rơtăm. Đoân Droh rơtăm ối thăm veăng mâu tơdroăng pleăng hnoăng cheăng, mơgrúa plông kuât, hngêi trung hriâm. Đoân viên Siu H’Thanh tối, tơdroăng kố hiăng mơnhên hnoăng djâ troăng ahdrối dêi Đoân Droh rơtăm kum troh lâp lu hiâm mơno tơrŭm môi tuăn, pôu râng hnoăng cheăng tung pơlê pơla.

“Á cho ngế droh ai ivá, châ tơniăn lĕm mê cheăm pin kố cho cheăm tơkăng kong xua mê á thế mơ-eăm pleăng ăm pơlê pơla, pêi cheăng ăm cheăm dêi tơná vâ châ tơƀrê lĕm ƀă hên tơdroăng phiu ro. Kăn ƀô̆ râ kơpêng tơmâng tŏng gum pin ƀă diâp kơxuô tơmeăm phiu ro rơnó Hơngui ăm kuăn pơlê, lăm khăm ivá ăm kuăn pơlê ƀă xing xoăng pơkeăng tê kơtê nếo, ai châi tamo mê thế pơlât hlối. Nôkố têt hiăng troh, vâi tơmâng tŏng gum ƀă cheăm tơkăng kong kố ƀă hên kơxuô tơmeăm diâp ăm kơnâ vâ kum ƀă mâu tơdroăng pá puât dêi pin a kố’’.