VOV4.Xơ Đăng - Kơxo lơ 7/3, a pơlê kân Plây Kần, tơring tơkăng kong Ngọc Hồi, Khu pơkuâ cheăng Đoân droh rơtăm Kon Tum tơkŭm po Leh mơhnhôk Khế droh rơtăm ƀă Tơdroăng Khế 3 tơkăng kong – kơpong tơkăng kong tơnêi têa á hơnăm 2022. A roh leh, Khu pơkuâ cheăng Đoân droh rơtăm kong pơlê Kon Tum krếo thế kăn ƀô̆, đoân viên, droh rơtăm phô̆m xông kân  tung khế 3 - Khế droh rơtăm hơnăm 2022, mơnhông hiâm mơno djâ troăng ahdrối, pleăng hnoăng cheăng dêi rơxông ối nếo tơdah hnoăng cheăng, mơjiâng mâu kế tơmeăm, tơdroăng cheăng droh rơtăm koh phiu ro Hneăng hôp Đoân droh rơtăm mâu râ ƀă 91 hơnăm Hâi mơjiâng Đoân droh rơtăm Kŏng san Hồ Chí Minh.

Diâp theh đoân viên ƀă huy hiê̆u đoân ăm đoân viên nếo

Pêi pro châ tơƀrê mâu tơdroăng hbrâ mơdât pơreăng COVID-19; kum tung tơdroăng rêh ối pơlê pơla, ‘’Ô têa pâ kơnhŏng - Pâ mơnê mâu ngế ai hnoăng’’; mâu tơdroăng tŏng kum droh rơtăm pơxiâm tăng cheăng pêi; tơdroăng rak ngăn ăm đoân viên, droh rơtăm, hok tro, sinh viên, vâi hdrêng ai tơdroăng rêh ối pá puât ƀă hía hé.

Diâp kơxuô tơmeăm ăm droh rơtăm ai tơdroăng rêh ối pá puât

Roh kố, Đoân droh rơtăm ƀă Khu pơkuâ vâi kơdrâi Khu xiâm pơkuâ Kŏng an diâp 10 túa pêi mơnhông mơdêk cheăng kâ mê cho ai 1 rơpâu to í ki ai kơtâ hên ăm 10 rơpŏng ai hnoăng tơnêi têa, rơpŏng ai tơdroăng rê ối pá puât, mâu ngế pơkuâ tơdroăng khôp kơpong hdroâng kuăn ngo, mâu ngế tiêu khôp; rơtế hên kơxuô tơmeăm ăm hok tro pá puât kơpong tơkăng kong Kon Tum.

A Sa Ly tơplôu ƀă tơbleăng