Kơmăng hâi lơ 18/3, Khu xiâm Đoân Droh rơtăm Kŏng sản Hồ Chí Minh tơkŭm po leh tơbâ 94 hơnăm Hâi mơjiâng Đoân droh rơtăm Kŏng sản Hồ Chí Minh ƀă diâp pro Lý Tự Trọng hơnăm 2025. Tơbleăng a rôh leh, pôa Nguyễn Trọng Nghiã, Ngế pơkuâ cheăng kal kí ƀă hnê mơhnhôk dêi Tíu xiâm pơkâ thế rơxông nếo ƀă mâu lêng djâ troăng ahdrối tung tơdroăng tăng ‘nâi plĕng, xúa kơmăi kơmok, mơnhông khoa hok, kơmăi kơmok.

Pôa Nguyễn Trọng Nghiã pơkâ thế Khu droh rơtăm Kŏng san Hồ Chí Minh thế tơmâng nhoăm tơdroăng hnê tuăn loi troăng hơlâ kăch măng, tơdroăng rêh ối ăm rơxông  nếo, hnê hriâm ƀă tơbleăng troh lâp lu ing tuăn vâ pêi pro dêi, khên tơnôu, mơ-eăm, hâk tơngăm hdroâng kuăn ngo ƀă púi vâ pleăng ăm tơnêi têa; pơtối rak vế ki rơdêi ƀă hnoăng cheăng dêi droh rơtăm tung veăng rak vế tuăn mơno dêi Đảng, tơplâ tah lôi tơdroăng ki ôh tá tro kơneăm khu ‘mêi; mơjiâng hnê ăm mâu kăn ƀô̆ Đoân thế ai hiâm mơno lĕm, rơkê.

A rôh leh tơbâ, 100 ngế kăn ƀô̆ đoân hiăng hâk tơngăm châ diâp ăm pri Lý Tự Trọng. Kố cho mâu ngế ki kơhnâ rơkê tung droh rơtăm ai hiâm mo hâk vâ, hriăn plĕng vâ tơbleăng pêi tơƀrê tơdroăng cheăng Đoân ƀă tơdroăng mơhnhôk pêi pro dêi mâu vâi o.