-Ô pôa, mơ’nui hơnăm 2024, Sinuâ hiăng mơdrếo mâu tơmeăm cho plâi sầu riêng dêi Việt Nam xua tro tâ pơreăng Auramine (tơkeá vâ tối cho têa pơkeăng trĭng O). Pôa ai tối tiah lâi ‘na tơdroăng kố ƀă Khu ngăn ‘na mơdró plâi sầu riêng Dak Lak hiăng ai tơdroăng ki ti lâi vâ rak vế ki tơniăn dêi kơvâ mơdró kố?

Pôa Vũ Đức Côn: Hdrối mâu hâi Têt nah ngin hiăng hôp mơ’no tơdrêng tung um Khu pơkuâ hnê ngăn, mâu ki hôp mê cho mâu pơkuâ cheăng a Dak Lak. Ngin hiăng pâ thế kơ koan ki ngăn ‘na Khu ki pơkuâ ‘na pêi pêt ƀă Rak vế tơmeăm pêt rơtế hôp. Kơ’nâi mê, vâ môi tuăn mâu tơdroăng ki vâ pơkâ thế. Ki má môi, tơdroăng ki lu lêa ‘na mah kơxô̆ tung kơpong ki pêt ƀă tíu ki tâp kơđu pơkeăng. Ki má péa cho cadimin ƀă têa pơkeăng trĭng O, ai lối hên trếo meăm cho tơdroăng ki kal xiâm, hmâ vâ hmâ ôh xuân athế tah lôi mâu trếo ki lối hên mê. Ki má pái, thăm athế séa mơnhên ngăn ki dâi lĕm. Peăng Việt Nam pin mơnhên tối, tơdrêng amê, peăng kong têa ki rôe vâ vêh mơnhên ƀă mâu tơdroăng ki mê athế cho kơ koan ki hriăn cheăng ƀă khu kăn xiâm tơnêi têa athế ai tơdroăng kring vế ăm tơdroăng pêi pêt, tê mơdró mê.

-Drêng ai mâu tơdroăng ki vêh mơnhên rế hía rế kơtăng, maluâ ing kơchơ ki rôe, mê tiô pôa, ulâi cho mâu troăng hơlâ ki kal vâ kring vế tơniăn ăm plâi sầu riêng Dak Lak tối krê ƀă plâi sầu riêng Việt Nam tối tơdjuôm châ rak vế ki tơ’lêi hlâu vâ mơ’no tê plâi?

Pôa Vũ Đức Côn: Troăng hơlâ ki xiâm mê xuân athế thăm mơdêk tơdroăng hbru mah kơxô̆ kơpong ki pêt ƀă mah kơxô̆ ki vâ tâ, kơxu tơmeăm. Ki xiâm dêi tơdroăng dế nôkố, mê mah kơxô̆ ki châ hbru ăm bu iâ tâng vâ pơchông ngăn ƀă tơdroăng pêt mơjiâng, xua mê, ôh tá hluăn ing tơdroăng ki mơdrếo tơvêh. Ki ê nếo, athế vêh séa mơnhên ngăn ki dâi lĕm lơ ôh drêng peăng khu ki rôe pơkâ thế séa ngăn plâi mê ai lối trếo, vâ ing mê, ôh tá ai tơdroăng ki pơloi, lu lêa. Ki má péa, trếo cadimin ƀă têa pơkeăng trĭng O, lối ai hên trếo meăm, hmâ vâ hmâ ôh xuân athế tah lôi. Kơ koan tơnêi têa athế pêi pro nhên tiah lâi khoh chiâng ai tơdroăng mê, la lâi nah, mâu trếo ki lâi chiâng xúa, xúa kơlo to lâi vâ tối tơbleăng, ing mê, kô kơdroh tơdroăng i xúa trếo pơkeăng. Tung pơla pin ta hâi teăm châ gum vâ tah lôi mâu trếo ki mê, ki ahdrối tâ pin athế pêi pro 2 tơdroăng mê. Ki má pái, tơdroăng ki châ mơ’no tah lôi trếo ‘mêi, mê cho râ kơvâ cheăng dêi khu xiâm, kơvâ xiâm tơnêi têa xua ga ai tơdjâk troh mâu kong têa ki rôe ‘mot kế tơmeăm. Laga, mâu kong pơlê, pơlê kong kân, tơring, cheăm xuân athế pêi pro kơhnâ khât tâ vâ mơnhên hnoăng cheăng rơkê dêi mâu kong pơlê ki tê mơ’no hên, tiah mê pin ôh tá chiâng tơkôm to ki pơkâ tơdjuôm.

-Ki păng ‘nâng, tơdroăng ki rak vế ‘na mâu pơkeăng xôh ki mâu khu mơdró mơ’no tê plâi sầu riêng ga ti lâi, ô pôa?

Pôa Vũ Đức Côn: Á xuân bu ‘nâi to tơdroăng ki hnê tối dêi mâu khu mơdró ki veăng tung khu râ. Mâu khu mơdró mê veăng tung khu tơrŭm cheăng, vâi hiăng hlê plĕng nhên tơdroăng ki mê sap ing ton nah ƀă tung pơla pêi mâu tơdroăng cheăng vâi xuân hiăng tí tăng hlê plĕng nhên mâu tơdroăng ki vâ pêi pro, mâu hnoăng ki kal, ƀă ôh tá xê nôkố, mê vâi athế hbrâ hên tơdroăng cheăng vâ rak vế, pêi pro tro tiô tơdroăng ki pơkâ ing mâu kong têa ki pói thế vâ rôe mê.

-Tơdroăng ki mơjiâng mâu tíu ki mơnhên tối ki dâi lĕm a Dak lak châ ngăn cho troăng hơlâ ki gum ăm khu mơdró kâ hbrâ rơnáu hên tâ tung tơdroăng ki pêi pro tro tiô tơdroăng ki tơxâng vâ châ tê mơ’no dêi plâi. Xuân ai mâu khu mơdró pâ thế kuăn pơlê ƀă khu pơkuâ cheăng veăng pêi tơdjuôm ‘na hnoăng ki kố. Mê pôa ai tối ki klâi ‘na tơdroăng kố, ƀă Khu tơrŭm cheăng ngăn ‘na pêt plâi ai troăng hơlâ pơkâ pêi pro ki klâi ‘na kơvâ cheăng kố?

Pôa Vũ Đức Côn: Mê cho tơdroăng ki pói rơhêng vâ hiăng ton sap nah, hiăng ai mâu tơdroăng pâ thế ing koơ koan ngăn cheăng ƀă khu râ pơkuâ. Laga, vâ châ pơkâ pêi pro rĕng hnoăng cheăng kố, trâu rơdâ tâ mê athế ai troăng hơlâ pơkâ thế, djâ troăng ing khu xiâm tơnêi têa, ing khu râ ngăn ‘na pêt tơmeăm, klêi mê, mơhnhôk thế pơlê pơla veăng pêi, mơhnhôk thế. La mâu tíu ki kơxu tâ plâi, hngêi kơmăi uâ modiê mê ai troăng hơlâ. Ga trối tơdroăng ki lăm kŏng chư̆ng hlá mơ-eá roh hdrối nah, bu tơkôm to tơnêi têa tê ga chiâng, nôkố, ulâi ulâ xuân hiăng chiâng, thăm nếo thế po rơdâ. Tíu pêi cheăng, hngêi kơmăi ki têng, uâ, mơdiê xuân hiăng ai dêi troăng hơlâ ki vâ pêi. La tơdroăng kố athế mơhnhôk, ai drêng ‘nâ athế tŏng gum vâi hên tơdroăng vâ rĕng kêi. Pro ti lâi vâ kơvâ ngăn ‘na tê rôe plâi sầu riêng, tâi tâng chiâk deăng pơrá châ rak ngăn krâu, ƀă xúa mâu pơkeăng tro tơdroăng, ing mê, kơvâ pêi pêt, tê mơdró plâi sầu riêng nếo tơngah châ mơnhông hên tâ hdrối nah.

Hôm, mơnê kơ pôa!