VOV4.Xơ Đăng -  Drêng ai pơreăng COVID-19 xông tâ tú ó, kơxô̆ ngế F0 tâk rĕng tung pơlê pơla, sap ing hâi lơ 1/3, tâi tâng hok tro khô̆i 9 ƀă 12 a pơlê kong kơdrâm Ƀuôn Ma Thuột, kong pơlê Dak Lak pơtê troh hngêi trung ƀă vêh hriâm mơ’no tơdrêng tung um tiô troăng măng internet.

Tâi tâng hok tro pơlê kong kơdrâm Ƀuôn Ma Thuột pơtê hriâm tơdrêng

Mâu hâi achê kố, kơxô̆ mơngế tro tâ COVID-19 tung pơlê kong kơdrâm Ƀuôn Ma Thuột pơtối tâk, kơxô̆ mơngế F0 pơlât a hngêi châ lối 99% tung tâi tâng ngế tro tâ, Ƀơrô hnê hriâm Hnê mơjiâng tuăn ngôa rơkê pơlê kong kơdrâm hiăng tơbleăng Viƀan pơlê kong kơdrâm pơhlêh troăng hriâm tơdrêng mê hriâm mơ’no tơdrêng tung um tiô troăng măng internet ƀă tâi tâng mâu râ hriâm, tá hok tro khô̆i lâm 9 ƀă 12 sap ing hâi lơ 1/3 troh drêng ai tơbleăng nếo. Vâ mơdât châ tơƀrê tơdroăng pơreăng xông tâ tú ƀă tơniăn tơdroăng hnê – hriâm, Viƀan pơlê kong kơdrâm Ƀuôn Ma Thuột pơkâ Ƀơrô hnê hriâm – Hnê mơjiâng tuăn ngôa rơkê pơlê kong kơdrâm tơkŭm tâi tâng tơbleăng kơxô̆ kăn ƀô̆, thái cô ƀă hok tro tro tâ COVID-19 hdrối 17h rêm hâi. Rơtế pơkuâ, tơrŭm ƀă mâu kơ koan ki tơdjâk, tơbleăng pơhlêh troăng hbrâ mơdât pơreăng tung mâu hngêi trung tơtro ƀă tơdroăng nếo nôkố.

A Sa Ly tơplôu ƀă tơbleăng