Phŏ Ngế pro xiâm hnê ngăn tơnêi têa pơkâ thế mâu khu râ pơkuâ cheăng ƀă tŭm tơdroăng, tungkơhâi, thế djâ kuăn pơlê a thôn 1, thôn 2, thôn 3, lăm ối a tíu tơniăn; hbrâ rơxế, plong, tơmeăm xúa drêng kong mêi kân pơtối hlo ôh tá tơniăn. Pôa tối nhên, ôh tá  ăm kuăn pơlê châ klâ krê drêng têa tâk đik; hlối pâ thế cheăm  mơhnhôk tăng tơ’nôm ca-nô, plong tuk vâ tŏng xo mâu ngế xía vâ.  

Hdrối tối tơbleăng kong mêi kân kô ối ton a Khánh Hòa, Dak Lak ƀă Gia Lai, Phŏ Ngế pro xiâm  hnê ngăn tơnêi têa ăm ‘nâi, tíu xiâm hiăng thế mâu cheăm, kong pơlê mơjiâng troăng hơlâ hbrâ ví, tơniăn tíu kuăn pơlê ối; hlối hnê mơhno ăm Kuân khu 5 veăng kơjo kum hên phái, tơmeăm khoăng, kế kâ, tung mê ai xup kơxŏng khăng.  

-Troh kơhâi dế lơ 19/11, mê têa kân a peăng tơdế Tơnêi têa, Tây Nguyên hiăng pro 15 ngế hlâ ƀă hía, 19 ngế tro rong. Tơdroăng ki kong mê têa kân dế cho tơdroăng ki xiâm kal pêi pro tơdrêng. Mâu kong pơlê Gia Lai ƀă Dak Lak tro kong mê kân ó khât, ai tíu ki ‘nâ hiăng troh 660mm. Lŭp kế tơmeăm, hngêi trăng tro tơ’nhiê hên ƀă lối 20.400 toăng  hngêi tro têa lân, ki hên cho a Gia Lai ƀă Khánh Hòa. Cheăng hbrâ ví dế châ tơbleăng pêi kơtăng khât.

Troh nôkố, tâi tâng 5.634 rơpŏng ƀă vâ chê 16 rơpâu ngế hiăng châ xĕn troh ối tíu tơniăn. Kơ koan ki ai tơdjâk hiăng pơtroh tơdroăng kal pêi pro tơdrêng (malối cho kân khât) a kroăng Pa a Dak Lak ƀă têa kroăng Kôn a Gia Lai, ƀă kơdró têa nôkố pơrá a kơlo rơ-iêo râ má 3 ing hngế.

Tiô tối troh kong măng lơ 20/11, kơpong ing Đà Nẵng troh Khánh Hòa ƀă Tây Nguyên xuân pơtối ai mê kân, ai tíu ki ‘nâ lối 400mm. Vâi krâ kuăn pơlê kal pêi pro kơtăng tơdroăng hnê mơhno xĕn kuăn pơlê tíu tơniăn dêi kăn pơkuâ kong pơlê.

-Kơpong peăng mâ hâi Lo kong pơlê Dak Lak hlo ai kong mêi kân sap hâi lơ 15 troh 19/11, xua tơdjâk khía peăng mâ hâi lo. Nôkố 34 to cheăm, bêng peăng mâ hâi lo ƀă hên cheăm kơpong klong, thông dêi kơpong MDrăk, Krông Bông, Ea Súp, Krông Ana…  dế tro têa lu trâu sap 1-1,5m, hên tíu têa hiăng lân lu tâ tá. Lối 1.000 ha loăng plâi tro têa lu, lối 300 to ro, chu ƀă dâng 5,000 to í pêap tro têa mơhiu; mâu troăng prôk ki ‘nâ tro têa lu, tơnêi tơhnâp, tơ’nhiê ó.

Mâu kăn cheăm hiăng djâ kuăn pơlê ki ối a kơpong rơ-iô tơnêi tro têa rơlêa, têa lu châ hdâ lăm ối tíu tơniăn. Kơxo hâi lơ 19/11, a bêng Sông Cầu, ai ngo tơhnâp tâu hngêi kuăn pơlê pro nâ V.T.U (33 tuổi), Kăn pơkuâ hnê ngăn Chi đoàn kơphô̆ Dân Phú 2, hlâ. Mâu ngế cheăng gak plâ hâi măng tung lâp kong pơlê pơtối séa ngăn vâ ‘nâi kong mêi têa lân lu ƀă tơbleăng tơdroăng pêi pro, rak tơniă, kring vế kuăn pơlê a mâu tíu ôh tá tơniăn, khu râ pơkuâ cheăng ƀă kuăn pơlê djâ mâu ngế hlâ a Sông Cầu lo ing kơpong tơnêi tơhnâp.

-Kong mêi kân ton hâi hiăng pro têa lân lu a hên kơpong, pro 38 to hngêi trung ƀă lối 26 rơpâu ngế hok tro a Gia Lai athế pơtê hriâm pơtân vâ rak tơniăn ăm vâi o. Hdrối mê, a rôh hôp ‘no tơdrêng ing troăng hyôh internet troh a mâu tíu hnê hriâm, kơvâ cheăng ƀă 135 to cheăm, bêng vâ tơbleăng tối mâu troăng hơlâ hbrâ ví ƀă kong mê kân, têa lân lu ƀă tơnêi tơhnah tơhnâp, pôa Nguyễn Tuấn Thanh, Phŏ kăn hnê ngăn UBND kong pơlê pâ thế kơvâ hnê hriâm séa ngăn tơdroăng ki ôh tá tơniăn dêi kong prâi vâ ‘nâi ăm hok tro pơtê hriâm.

Klêi kơ’nâi hnê mơhno, Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai pơtroh hlá mơ-éa pơkâ thế mâu tíu pêi cheăng ối tung kong pơlê pôi tá tơngôu; hbrâ rơnáu ƀă tơdroăng ki kong mê têa lân lu, ví vâ pôi tá tro kơdrâ. Mâu hngêi trung châ pơkâ thế séa ngăn kơtăng tơdroăng tơbleăng ‘na kong mê, têa lân lu; tơdroăng ki ai têa mơhiu, tơnêi tơhnâp; tơbleăng teăm tơdrêng ăm thái cô, hok tro vâ ‘nâi hbrâ ví.