VOV4.Xơ Đăng - Dak Lak dế cho tíu ki ai pơreăng Covid-19 tâ tú rơ-iêo má môi Tây Nguyên ƀă kơxô̆ ngế tâ hiăng tâk lối 36.200 ngế, tung mê ai 2.153 ngế tâ nếo tung hâi lơ 28/2. A pơlê kong kơdrâm Ƀuôn Ma Thuột, tíu ki ai pơreăng tâ tú rĕng má môi kong pơlê, Kăn hnê ngăn Vi ƀan pơlê kong kơdrâm nếo ai hlá mơéa pơkâ thế sap ing lơ 1/3, mâu hngêi trung pơtê tơkŭm po hriâm tơdrêng ƀă râ hriâm cho sap ing râ má môi troh râ má pái Phôh thong, hơ’lêh mâu râ hriâm kố chiâng hriâm tơdrêng ing troăng hyôh internet.

Bêng Tự An

Tiô hlá mơéa kố, kơxô̆ ngế tâ Covid-19 a pơlê kong kơdrâm dế pơtối tâk rĕng, kơxô̆ F0 pơlât a hngêi châ lối 99% kơxô̆ ngế, mê tơdroăng ki pơtê hriâm tơdrêng cho tơdroăng ki pơklât thế, vâ kơdroh iâ pơreăng tâ tú. A Lâm Đồng xuân ối rak vế ki tâ tú sap ing 700 troh vâ chê 800 ngế rêm hâi. Troh hâi lơ 28/2, tâi tâng mâu cheăm, bêng dêi pơlê kong kơdrâm Đà Lạt prếi Đơn Dương hiăng ối a kơpong mơngiơk khêi iâ. Hlo tơdroăng pơreăng tâ tú rơ-iêo, sap ing hâi lơ 28/2 vâi hdrêng hriâm mầm non a pơlê kong kơdrâm hiăng pơtê troh hngêi trung; hok tro sap ing lâm 1 troh lâm 6 hơ’lêh hriâm ing hriâm tơdrêng chiâng hriâm ing troăng hyôh internet ƀă tiô túa ki ê.

Katarina Nga tơplôu ƀă tơbleăng