Kơ’nâi 40 hơnăm pơ’lêh nếo, mâu tơdroăng hiăng châ pêi tơƀrê kân, ai pơxúa sap ing nah ‘na mơnhông cheăng kâ - rêh ối pơlê pơla, rak tơniăn kal kí, kring vế tơniăn tơkăng kong  tơnêi têa ƀă tơrŭm cheăng ƀă mâu kong têa tung lâp plâi tơnêi rơdâ tâ, hiăng pro xiâm ki krá kak, ‘mâi mơnhông tuăn loi dêi Kuăn pơlê ƀă Đảng.  Ki khât a Tây Nguyên cho vâ mơhno ki lĕm ro troăng hơlâ tro ‘ló. Kuăn pơlê kơpong kuăn ngo tơngah ƀă hnoăng pêi châ tơƀrê dêi hneăng Hôp 14, mâu troăng hơlâ pêi ki kân ton hơnăm kô châ tơbleăng rĕng pêi. Ngoh Y Sắc Ly Arul, ối a bêng Buôn Ma Thuột, kong pơlê Dak Lak tối púi vâ, mâu pơkâ ki kal dêi Đảng kô rĕng châ pơ’lêh tung pêi pro, pơ’lêh nhên tung tơdroăng mơnhông cheăng kâ -  pơlê pơla, malối cho ƀă kơpong kuăn ngo.

“A púi vâ Đảng ƀă tơnêi têa pơtối tơmâng hên tâ troh kuăn pơlê hdroâng kuăn ngo, tung mê ai kuăn ngo Rơđế ngin; tơmâng khât troh tơdroăng  pơtối rak vế, pơtối rak túa lĕm tro ton nah, rơtế ƀă mơnhông ôm hyô, vâ tơdroăng rêh ối dêi kuăn pơlê rế châ mơnhông”.

Tung mâu hơnăm hdrối mê hía nah, tơdroăng tơmâng ngăn dêi Đảng ƀă Tơnêi têa ing mâu troăng hơlâ tŏng gum tơtro hiăng pro chiâng mâu tơdroăng pơhlêh khât tung tơdroăng rêh kâ ối dêi kuăn pơlê hdroâng kuăn ngo. Sap ing troăng klông, hngêi trung hriâm, hngêi pơkeăng pơlât ƀă hên ki ê troh tơdroăng tŏng gum mơjiâng pro tơmeăm, kơdroh kơtiê krá ton, rak vế túa lĕm tro ƀă hên ki ê, hên troăng hơlâ tŏng gum hiăng xúa tung tơdroăng rêh kâ ối, pro pơxúa tơƀrê nhên, châ Kuăn pơlê môi tuăn. Tung tơdroăng ki phiu ro ƀlêi chiâng Hneăng hôp 14, pôa Hmên, a pơlê Tuơh Ktu, cheăm Đak Đoa, kong pơlê Gia Lai ăm ‘nâi:

“Á hlo phiu ro khât, ro tung tuăn mơno xua kăn pơkuâ Tơnêi têa đi đo tơmâng ngăn mơ’no mâu troăng hơlâ tŏng gum ki kal, malối cho mâu troăng hơlâ tŏng gum ăm kơpong kuăn pơlê hdroâng kuăn, hiăng tŏng gum tŭm mâu kơvâ cheăng ăm vâi krâ kuăn pơlê ngin. Á loi tiah kố: la ngiâ ah Đảng Tơnêi têa pơtối tơmâng ngăn, pơtối pơkuâ tơnêi têa mơ-eăm mơnhông, vâi krâ kuăn pơlê môi hiâm mơno. Đảng kô ai mâu troăng hơlâ tŏng gum tơtro vâ tơnêi têa rế hía rế mơnhông krá rơdêi tâ”.

Sap ing tơdroăng ki ai khât tung rêh kâ ối, kăn ƀô̆, đảng viên ƀă Kuăn pơlê mâu kong pơlê Tây Nguyên – Nam Trung bộ loi Đảng pơtối pêi klêi troăng hơlâ tŏng gum hdroâng kuăn ngo tiô troăng mơnhông ivá, xo kuăn pơlê pro xiâm tung pơla mơnhông, sap ing mơjiâng pro ôm hyô pơlê pơla troh thăm mơnhông ‘no liăn pro troăng klông, tŏng gum tơdroăng rêh kâ ối krá tơniăn tung pơla kong prâi pro pơhlêh.

Jâ Rơ Châm H’Yéo, Kăn hnê ngăn Vi ƀan Măt trâ̆n Tơnêi têa Việt Nam kong pơlê Gia Lai hneăng hdrối tối rơdêi, tơdroăng loi a Đảng hiăng châ pêi pro sap ing hên rơxông ƀă nôkố pơtối châ mơnhông:

“Kuăn pơlê Tây Nguyên đi đo môi hiâm mơno tiô Đảng, tiô Pôa Hồ. Rơhêng vâ Đảng pin pơtối tơmâng ngăn, pro tơ’lêi hlâu ăm Tây Nguyên mơnhông cheăng kâ, túa lĕm tro, hnê hriâm, tiô túa ki mơjiâng Tây Nguyên kro mơdrŏng ‘na cheăng kâ liăn ngân, kro mơdrŏng ‘na tuăn mơno rơkê”.