Kơxô̆ tơmối ôm hyô kong pơlê Dak Lak tung hneăng pơtê Têt Lo hơnăm nếo Ất Tỵ hơnăm kố tâk 1,3 xôh tâng pơchông ƀă roh kố, djâ tâi tâng pêi lo châ dâng 60 rơtal liăn. Lâp kong pơlê hiăng tơdah 180 rơpâu roh tơmối ôm hyô, tâk 24% tâng pơchông ƀă roh kố hơnăm nah, tung mê 98% cho tơmối tung tơnêi têa.

Mâu tíu ôm hyô mơhno khôi túa lĕm tro, cho hơnăm ki tơmối troh lăm ôm hyô kơdrâm hên má môi. Môi tiah a Tíu chôu ‘măn tơmeăm khoăng ton nah Dak Lak, hiăng tơdah 280 khu ƀă rơpâu roh tơmối. Mâu kơpong ôm hyô ngăn loăng pơlái kong kế, khôi túa lĕm tro, xah hêi ro, xah hêi a têa kroăng, long têa, xí têa xuân môi tiah hên tơmối rah xo, châ xah hêi ngăn kong kế rơngiâp lĕm, mâu tơdroăng mơhno khôi túa lĕm tro; châ tâ mâu tơdroăng ôm hyô ki rơxxiâp, vo plong, tơkâ hluâ xí.

Tơniăn ăm tơmối, mâu tíu cheăng tê mơdró ôm hyô hiăng hbrâ lĕm tro ‘na rơxế, khu ki tŏng gum, tŏng xo mơngế hliăng tiâ; xing xoăng mơngế pêi cheăng plâ hâi plâ măng tung mâu hâi hdrối, tung ƀă kơ’nâi Têt Lo hơnăm nếo. Pêi tiô kơtăng mâu pơkâ ‘na kĭ, tĕm yă vĕ ƀă yă tê mơdró; tê tro yă ki tĕm, tơniăn krúa lĕm kong prâi.

Kơxê lơ 2/2, Vi ƀan hnê ngăn kong pơlê Lâm Đồng tơbleăng, rôh Têt Lo hơnăm nếo Ất Tỵ kố, kơxô̆ tơmối troh ôm hyô, ối pơtê a Lâm Đồng tâk vâ chê 36% tâng vâ pơchông ƀă khế kố hơnăm nah. Tung lâp kong pơlê tơdah dâng 380 rơpâu ngế tơmối lăm troh hyôu ngăn, ối pơtê, tâk vâ chê 36% tâng vâ pơchông ƀă Têt hơnăm nah.

Tung mê, tơmối kong têa ê dâng 27 rơpâu ngế, tâk 35%; tơmối ối pơtê châ 270 rơpâu ngế, tâk vâ chê 70% tâng vâ pơchông ƀă khế kố hơnăm nah. Kơxô̆ tơmối ôm hyô tơkŭm troh hên sap ing hâi má 2 ƀă má 4 Têt. Ki rơhêng vâ tối, tung pơla tơmối ôm hyô troh a Lâm Đồng tâk hên tâng vâ pơchông ƀă khế kố hơnăm nah la tơmối troh a Pơlê kong kơdrâm Đà Lạt kơdroh.

Pơlê kong kơdrâm bu tơdah lối 100 rơpâu ngế tơmối troh ôm hyô, kơdroh lối 33 rơpâu ngế tơmối ômn hyô tâng vâ pơchông ƀă rôh Têt Lo hơnăm nếo hơnăm nah. Tung rôh Têt Lo hơnăm nếo 2025, khu ki ai tơdjâk troh kong pơlê Lâm Đồng chêh pro hlá mơ-éa pơxâu phak lối 1 rơpâu ngế pro xôi ‘na ôh tá tơniăn a troăng prôk.