*Mot tung hơnăm hriâm nếo, kong pơlê Dak Lak tiô tối hdrối kơdroh 51% kơxô̆ tíu hnê hriâm tơnêi têa klêi kơ'nâi xing xoăng nếo troăng hơlâ hngêi trung, lâm a kong pơlê. Troăng hơlâ kố châ Khu pơkuâ hnê ngăn Đảng kong pơlê Dak Lak ăm rơkong veăng tơpui tối a Hneăng hôp roh má 27. Tiô tối hdrối, kơxô̆ hngêi trung mầm non kơdroh sap ing 356 chu ối 150 hngêi trung; râ má môi sap ing 450 chu ối 134 hngêi trung; râ má péa sap ing 284 chu ối 92 hngêi trung. Tung pơla mê, túa hngêi trung ki hriâm todjuôm môi to hngêi trung râ má môi - má péa tâk sap ing 63 tâk 159 hngêi trung.

A râ má pái, kơxô̆ hngêi trung tiô tối hdrối kơdroh 10 hngêi trung, chu ối 68 hngêi trung. Khu ngăn hnê hriâm - hnê mơjiâng tuăn ngôa rơkê xuân châ xing xoăng sap ing 24 chu ối 5 tíu xiâm hnê hriâm - hnê mơjiâng tuăn ngôa rơkê ƀă 4 hngêi trung hnê cheăng pêi. Tiô pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak tối, tơdroăng xing xoăng, 'mot tơkŭm hngêi trung hriâm ôh tá tơdjâk troh hok tro.

“Hdrối nah, ngế pơkuâ ngăn hngêi trung bu pơkuâ ngăn 1 to hngêi trung tê, nôkố ai 5 to hngêi trung ai 5 phân hiệu mê hâi chôu hnê kô  kơdroh hnê a mâu hngêi trung tiah lâi vâ tơkâ luâ tơdroăng ki ôh tá tŭm thái cô. Thái cô kô prôk lăm hnê a mâu phân hiệu ki tơdjuôm tung môi to hngêi trung dêi 1 to cheăm mê athế xing xoăng môi tiah lâi ăm tơtro,  tơdroăng kố cho vâ ngăn ivá hnoăng pôu râng, xoăng râ, hnoăng hnoăng ƀă ivá pơkuâ ngăn hôm rơkê dêi ngế xiâm ki pơkuâ ngăn hngêi trung".

*Mot tung hơnăm hriâm nếo, kong pơlê Lâm Đồng kơdroh ối 825  to hngêi trung dêi tơnêi têa. Tơdroăng tơkŭm pro nếo tíu hnê hriâm tơnêi têa châ pêi pro tơtro ƀă kơxô̆ pơ’leăng mâ kuăn pơlê, kơpong kuăn pơlê ối ƀă tơdroăng pơkuâ nếo. Troăng pêi tơdjuôm tơkŭm tíu hnê hriâm mầm non, phôh thong, hngêi trung yăo yuk thường xuyên dêi tơnêi têa tung kong pơlê Lâm Đồng châ hên ngế môi tuăn dêi khu kăn pơkuâ.

Cô Phạm Thị Ngọc Bích, Ngế pơkuâ Hngêi trung Mầm non Dà Tông, cheăm kơtiê xahpá Dam Rông 4, ăm 'nâi, Khu pơkuâ ƀă thái cô tung hngêi trung môi tuăn ƀă troăng rơhlâ tơ'mot Hngêi trung Mầm non Dà Tông ƀă Hngêi trung Mầm non Dà Long:

"Troăng hơlâ 'mot tơkŭm ngăn tơdjuôm tâi tâng hiâm mơno dêi khu xuân môi tiah tơná á mê rah xo ing Ngế pơkuâ troh Ngế phŏ pơkuâ lơ troh thái cô mê ngin xuân ối hmiân tuăn pêi cheăng ôh tá ai tơdroăng klâi ôh. Sap ing nếo lo ing hngêi trung hiăng ối akố mê cho kơlo ki hmâ tơrŭm xuân môi tiah tơdroăng ki hơ-ui khíu pâ ăm hok tro gá hên khât ‘nâng. Xua mê tơdroăng tíu pêi cheăng kố lơ tíu ki ê vâ tối xuân ôh tá tơdjâk klâi ôh. Xuân cho kum ăm tơdroăng cheăng rak ngăn, hnê hriâm vâi hdrêng mầm non".

*Hơnăm hriâm 2026-2027 dế vâ chê troh. Tung hên kơxô̆ liăn ki athế hrê ăm kuăn 'nĕng hdrối hâi pơxiâm mot hriâm, hlá mơ-éa hriâm kô ôh tá xê kơxô̆ liăn ki kân má môi. La gá, ƀă mâu rơpŏng ki pêi lo liăn iâ, hên kuăn 'nĕng lăm hriâm lơ ai tơdroăng rêh ối pá puât, kố xuân ối cho 1 kơxô̆ liăn ki kân. Xua mê, tơdroăng ki pơkâ thế dêi Vi ƀan hnê ngăn kong pơlê Gia Lai 'na troăng hơlâ pêi pro troăng hơlâ ăm tê kơtê hlá mơ-éa hriâm ƀă mâu hok tro ối tung mâu khu ki châ kơjo kum a kong pơlê cho môi tơdroăng ai pơxúa khât. Gia Lai tiô tối hdrối ai lối 180.000 ngế hok tro phôh thong ối tung khu ki châ xúa tơdroăng châ tŏng gum, ƀă tâi tâng kơxô̆ liăn lối 42 rơtal liăn.

Rơtế ƀă tơdroăng ki ôh tá êa rôe hlá mơ-éa ăm kuăn 'nĕng, tơdroăng ki sôk ro kân má môi dêi vâi krâ nhŏng o pơlê Kon Sơ Lăl, cheăm Ia Khươl, kong pơlê Gia Lai cho hngêi trung ki nếo kân rơdâ, krúa lĕm châ mơjiâng pro a chê hngêi. Vâi o hok tro ôh tá êa hrăng kơmăng riu má, ôh tá ối tô tuăn xâu têa lu mơhiu rêm roh kong mêi khía kân têa lân lu. Troăng prôk troh a hngêi trung nôkố bu to lâi phut prôk chêng tê hlối tơniăn. Ngoh Wat, 38 hơnăm, pơlê Kon Sơ Lăl, cheăm Ia Khươl, tối:

"Drêng ối a pơlê ton nah, ngin lăm hriâm athế lăm sap ing 5 chôu kơxo má mê nếo teăm tro chôu mot tung lâm. Nôkố hngêi trung achê pơlê, hiăng tơ'lêi hlâu. Maluâ ối xơpá, la kô mơ-eăm rak ngăn tơmâng gum ăm péa ngế kuăn châ hriâm. Hơnăm hriâm nếo kố, roê ăm  kuăn ‘hmân ếo nếo, kơtong nếo, hlá mơ-éa tŭm vâ lăm hriâm, vâ kuăn 'nĕng 'nâi pơchuât, 'nâi chêh, púi vâ tơdroăng rêh ối vâi muăn kuăn cháu kơ'nâi ah kơdroh pá puât. Mơnê Đảng, Tơnêi têa hiăng tơmâng ngăn ăm ngin tâi tâng".