Tiô mâu kăn ƀô̆, đảng viên ƀă kuăn pơlê a Tây Nguyên - Duyên Hải Nam Trung ƀô̆, tơdroăng ki kal má môi klêi hneăng Hôp 14 dêi Đảng cho tơdroăng tơkŭm po tơbleăng tơdroăng pơkâ thế rĕng pêi, pêi kơtăng ƀă thế tiô tơdroăng ki ai khât. Ngoh Bùi Viết Tiệm, tôh 7, cheăm Chư Sê, kong pơlê Gia Lai tối tiah kố, mâu troăng hơlâ ki kân bú ai xúa tung tơdroăng rêh ối drêng châ nhên ƀă mâu tơdroăng cheăng pêi pro ăm kuăn pơlê hlo ƀă tâ khât:

“Mâu khu xiâm, kơvâ cheăng séa tăng ngăn, ‘mâi hơ’lêh mâu pơkâ ối tơvâ tơvân, pro pá mơnhông tơbrê; hlối pơkâ troăng hơlâ nhên khât vâ kong pơlê tơbleăng môi tuăn. Mâu troăng hơlâ kong pơlê pơ’lêh nếo tơdroăng pơkâ ƀă mâu tơdroăng cheăng pêi pro ăm kuăn pơlê hlo, tâ môi tiah ai khât. Ing ‘mâi hơ’lêh tơdroăng pro hlá mơ-éa, mơdêk cheăng tơƀrê ‘na pro hlá mơ-éa ‘na mơdró kâ troh cheăng kâ rêh ối krá ton mơdêk pê lo liăn ngân hên”.

Ing mâ ngăn dêi mâu khu mơdró, jâ Nguyễn Thị Diễm Kiều, môi ngế mơdró kâ a Đak Đoa, kong pơlê Gia Lai tối tơngah klêi Hneăng hôp 14 dêi Đảng, mâu cheăm bêng kô ai pơkâ pêi tơdroăng tŏng gum ki pơxúa khât ƀă khu mơdró, malối tung tơdroăng xúa khoa hok - kơmăi kơmok ƀă pơ’lêh kơxô̆:

“A tơngah klêi Hneăng hôp mê kong pơlê kô ai mâu troăng hơlâ pơkâ tŏng gum troh ƀă khu mơdró, malối xúa khoa hok kơmăi kơmok, ai mâu tơdroăng kơjo kum ‘no liăn pêi cheăng ‘na kong ngê̆, kum ăm hriâm pêi cheăng ‘na kong ngê̆ kơxô̆. Xuân tung tơdroăng tơngah mê, tơnêi têa hiăng kơjo kum tơ’nôm ăm khu mơdró pơtối châ tê mơdró điê̆n tưh ki nhoăm vâi rôe hên vâ ví mâu khu mơdró pêi tơbrêi la tơbriêt tê ôh tá châ ƀă mâu tơmeăm rơpâ tơmeăm bro bu bối ki tê mơdro hên a kơchơ’’.

A mâu cheăm hơngế hơngo, kơpong kuăn ngo, púi vâ kân má môi klêi hneăng hôp kân 14 dêi Đảng xuân dế tơmâng pêi pro ai pơxúa khât, tơtro ƀă kuăn tơdroăng ai khât. Pôa Hmê, kuăn ngo Bơhnéa ối a pơlê Tuơh Ktu, cheăm Đăk Đoa, kong pơlê Gia Lai tối:

“Á loi khât la ngiâ kố ah, Đảng, Tơnêi têa pơtối tơmâng khât tâ, pơtối pơkuâ hnê ngăn tơnêi têa mơnhông ăm tơƀrê, kuăn pơlê veăng môi tuăn. Đảng ai mâu pơkâ tơtro vâ tơnêi têa rế xông tơƀrê krá rơdêi tâ”.

Tiô jâ H’Hương ɃKrông, kuăn ngo Rơđế ôi a bêng Ea Kao, kong pơlê Dak Lak, hneăng hôp 14 dêi Đảng pơkâ thế mâu kăn ƀô̆ thế achê kuăn pơlê, hlê kuăn pơlê, tơmâng kuăn pơlê tơpui ƀă teăm tăng troăng tơleăng mơnhên mâu tơdroăng pơkâ rah tro luât ing cheăm bêng.

“Tơngah ƀă rêm ngế veăng a veăng pêi cheăng pro kăn kô pơtối rak hnoăng cheăng pêi dêi tơná, hnoăng cheăng tơná pêi ki rơkê tơƀrê tung tơdroăng ti tăng ‘nâi plĕng mâu tơdroăng, ‘nâi tơmâng tối ƀă hlối tơniăn ăm hnoăng ki pơxúa, tuăn mơ-eăm, ki púi vâ khât dêi kuăn pơlê”.

Tiô pôa Võ Chí  Vương, Ngế pơkuâ ngăn mâu ki êi cheăng dêi kong pơlê Khánh Hòa tối, vâ tơtro ƀă mâ ngăn hơngế, ki púi vâ kân ing hneăng hôp 14 dêi Đảng, tuăn ngôa rơkê pêi cheăng dêi mâu kăn ƀô̆, mâu kăn kal pơtối châ mơnhông tâ nếo.  Tơƀrê tung pêi pro ƀă kơlo ki vâ môi tuăn dêi kuăn pơlê, khu mơdró kô cho tơdroăng pơkâ ki kal vâ tối nhên tơdroăng cheăng dêi mâu kăn tung pêi cheăng pro hlá mơ-éa.

“Tơdroăng cheăng kăn ƀô̆ tung tơdroăng pêi cheăng nếo nôkố, mâu troăng hơlâ ki kal, mê cho: thế pơtối mơhông khu kăn ƀô̆ rơtế ƀă pro rế lĕm, iâ mơngế pêi cheăng la, tơniăn ai pơxúa, tơƀrê’ hơ’lêh nếo rơdêi tung tơdroăng rah xo mơngế, mơhno hnoăng cheăng pêi, xúa kăn ƀô̆ pêi cheăng tro tơdroăng; hlối tơmâng hnê mơhno ăm hriâm tơ’nôm ƀă mâu kăn ƀô̆, mâu ngế pơkuâ, vâ ai mâu ngế pêi cheăng rơkê tiô tơdroăng púi vâ pêi tung mâu hơnăm pơtối”.

Ing tơdroăng ai khât Tây Nguyên kơpong Kĭng têa kơxĭ Nam Trung bộ kô hlo, tơngah kân klêi hneăng hôp 14 dêi Đảng ôh ti xê to troăng hơlâ ki vâ pêi, mê ối cho mâu tơdroăng mơhno nhên, hleăng ƀă tơƀrê khât tung tơdroăng tơkŭm pêi pro. Drêng tơdroăng pêi pro dêi Chin phuh, mâu khu xiâm, kơvâ cheăng ƀă kong pơlê châ tơbleăng pêi tơdrêng, pêi nhên ƀă xo kuăn pơlkê, khu mơdró pro xiâm, ing tơdroăng dêi hneăng hôp má 14 kô tơbleăng troh lâp lu ƀă hlối xúa pêi tung rêh ối, pro ki xiâm ăm tơnêi têa mơnhông rĕng ƀă krá ton tung mâu hơnăm la ngiâ.