*Tơdroăng kong mêi têa kân lân lu a kơpong peăng mâ Lo kong pơlê Dak Lak dế hlo ôh tá tơniăn, kal châ teăm tŏng gum tơdrêng, drêng kong mê kân mê ton hâi tung lâp lu, tung pơla mâu hngêi kơmăi on tơhrik vâi mơ’no têa hên troh a peăng hdroh. Lăm ngăn hnoăng cheăng hbrâ ví a mâu cheăm peăng Kơnhŏng kơxê lơ 19/11, pôa Hồ Quốc Dũng, Phŏ Ngế pro xiâm hnê ngăn tơnêi têa pơkâ thế mâu khu ki ai tơdjâk troh rĕng xĕn kuăn pơlê drêng hdrối kong vâ măng, pơkâ hnoăng cheăng tŏng xo kuăn pơlê cho tơdroăng kal pêi apoăng.

Têa kân a têa kroăng Pa ƀă mâu têa kroăng kơpong peăng Kơnhŏng Dak Lak hiăng luâ tơdroăng ki sap nah hâi chói ai cho hơnăm 1993. Troăng kân 1A ƀă hên troăng kân ki ê tro têa lân lu, pro pá khât ăm cheăng tŏng xo mơngế. Kong mê kân pơtối ton pro têa rĕng tâk đik a mâu cheăm dro têa kroăng Tam Giang, Sông Cái, têa kroăng Pa ƀă Bàn Thạch, mơnhâu troh ki tơniăn dêi lối rơpâu rơpŏng kuăn pơlê. Mâu khu ki ai tơdjâk troh châ pơkâ thế tơbleăng túa pơkâ rak vế tơniăn châ chăn ƀă tơmeăm ăm kuăn pơlê.

*Troh kơmăng lơ 19/11, Khánh Hòa pơtối ai kong mêi kân. Hên kơpong lân lu trâu, ôh tá châ prôk lăm a dêi pó, kơdró têa a mâu têa kroăng hluâ tơdroăng ki pơtâng tối, tơ’lêi tơhnah tơhnâp kân. Drêng ai tơdroăng ôh tá tơniăn kố, Khu hnê mơhno má môi Tĭnh ủi Khánh Hòa tơbleăng tối thâ, pơkâ mâu khu cheăng tơkŭm hbrâ ví, tơniăn ăm kuăn pơlê. Tiô tơbleăng, kơxo má lơ 20/11, kong mêi kân nếo, têa hiu tâk hên pro lân lu rơdâ.

Tung 48 chôu la ngiâ, lâp kong pơlê mơni ai tơ’nôm kong mêi kân; têa lân lu a mâu têa kroăng Cái Nha Trang, têa kroăng Cái Phan Rang, têa kroăng Dinh (Ninh Hòa)... pơtối rĕng. Khu hnê mơhno má môi Tĭnh ủi pơkâ Khu hnê mơhno hbrâ ví, gum kuăn pơlê ƀă khu lêng xo plong tuk, thâ xĕn kuăn pơlê lo ing kơpong rơ-iô.

*Kong măng lơ 19/11, Gia Lai tro tơ’nhiê hên kế tơmeăm ing rôh kong mê têa kân lân lu sap nah tá hâi chói ai drêng bu tung môi hâi măng hiăng ai 3 ngế hlâ; lối 10.400 toăng hngêi tro têa lu. Hlo tơdroăng ki kal pêi pro tơdrêng, pôa Phạm Anh Tuấn, Kăn hnê ngăn Vi ƀan kong pơlê Gia Lai pơkâ thế kŏng an, mố đô̆i ƀă kăn pơkuâ ‘mâi xĕn kuăn pơlê troh tíu tơniăn.

Khu kŏng an hiăng ‘mâi xĕn lối 3 rơpâu ngế kuăn pơlê, tŏng xo 184 ngế lo ing kơpong ki tro têa lân trâu. A mâu cheăm bêng môi tiah Ia Tul, Ia Pa, Pờ Tó, Ia Rsai, Uar…, khu ki tŏng xo athế kơto ca-nô, hnhâng kơxái tŏng xo kuăn pơlê, thăm nếo prôk tơkâ luâ têa vâ lăm troh a tíu ki tro têa lân. Drô têa kroăng Pa, lối hrĭng rơpŏng kuăn pơlê a mâu pơlê, cheăm hiăng châ xĕn troh a tíu tơniăn.

Xuân a kong măng lơ 19/11, a văng Mimosa, ối tung bêng Xuân Hương – Đà Lạt, kong pơlê Lâm Đồng hiăng ai rôh tơnêi tơhnah ki rơ-iêo. Tâi tâng ngâ troăng tro mơdât tâi tâng. Tung tơdroăng ki kal pêi pro tơdrêng, khu ki tŏng xo Kŏng an kong pơlê Lâm Đồng hiăng hrăng plâ măng prôk tơkâ luâ mâu tíu ki rơ-iêo, vâ tŏng xo ƀă xĕn tâi tâng 12 ngế kuăn pơlê lo ing kơpong ki rơ-iêo.