Tơbleăng rôh tơ’noăng tung tâi tâng Đoân pro chiâng tơdroăng ki ƀlêi chiâng koh hâk Hneăng hôp Đảng rêm râ ƀă Hneăng hôp Đảng lâp tơnêi têa rôh má 14, Kăn pơkuâ hnê ngăn má môi Khu xiâm Đoân – pôa Bùi Quang Huy tối nhên: Rêm râ ƀô̆ Đoân ƀă tâi tâng đoân viên, droh rơtăm khŏm mơeăm pêi pro tơƀrê mâu tơdroăng tơ’noăng, mê cho: Hnê tối ‘na tơdroăng ki khên tơnôu dêi Đảng Kŏng san Việt Nam; tối nhên  hnoăng cheăng, tơdroăng ki loi nhuô̆m, ivá khên tơnôu, tuăn ngoâ rơkê pơkuâ, ivá pro kăn ƀă ivá tơplâ dêi Đảng tung plâ kăch măng 95 hơnăm hdrối, veăng gum ăm tơnêi têa prôk krá mot tung chal ki nếo, chal ki mơ-eăm dêi tơná dêi hdroâng mơngế; mơdêk hiâm mơno djâ troăng ahdrối, mơhnŏng pleăng dêi hnoăng cheăng dêi droh rơtăm tung tơbleăng pro mâu tơmeăm, xoăng cheăng ăm droh rơtăm.

Tơkŭm po tơbleăng rôh tơ’noăng, pơxiâm po tơdroăng, pro klêi mâu tơmeăm, xoăng cheăng ƀă tơkŭm po Hâi Droh rơtăm rơtế pêi pro koh hâk Hneăng hôp Đảng rêm râ, pêi pro troh Hneăng hôp 14 dêi Đảng; Mơjiâng ƀă rak vế Đảng; kơhnâ veăng tơpui tối ‘na kơxop hlá mơ-éa Hneăng hôp 14 dêi Đảng. Bí thư má môi Khu xiâm pơkuâ Đoân Droh rơtăm – pôa Bùi Quang Huy tối nhên:

“Khu pơkuâ hnê mơhno krếo thế đoân viên droh rơtăm mâu phô̆m vâ xông kân tung lâp tơnêi têa ƀă tâi tâng hiâm mơno lĕm bâ dêi tơná athế pơxiâm ƀă mâu tơdroăng cheăng pêi maluâ kŭn la kơhnâ vâ khât, pơxúa ăm pơlê pơla vâ veăng gum pro chiâng ivá hâk vâ tơ’noăng tung rêm râ ƀô̆ Đoân. Tung tơdroăng dêi Leh tơbleăng tơ’noăng tung tâi tâng Đoân vâ koh hâk ƀlêi chiâng Hneăng hôp Đảng ƀô̆ rêm râ, a tơnêi “Pơlê kong xiâm tơplâ”, pin rơtế ƀă dêi rơpó pêi môi tơdroăng cheăng pơxúa mê cho tơbleăng Têt pêt loăng plâ rơxông chôu pâ hnoăng Pôa Hồ. Tơdroăng cheăng kố hiăng chiâng tơdroăng cheăng pêi tiah hmâ, mơhno hiâm mơno djâ troăng troăng, pôu râng dêi rơxông ối nếo Việt Nam, dêi khu tơrŭm Đoân Droh rơtăm Kŏng san Hồ Chí Minh tung rak vế kong prâi tơnêi tơníu, hbrâ ví ƀă kong prâi pro pơhlêh”.

Tơpui a rôh leh, pôa Đỗ Văn Chiến, Kăn hnê ngăn Vi ƀan xiâm Măt trâ̆n Tơnêi têa Việt Nam khĕn kơdeăn khât, Khu xiâm Đoân hiăng hbrâ rơnáu ƀă teăm tơkŭm po rôh tơ’bleăng tơ’noăng tơmiât troh Hneăng hôp Đảng rêm râ ƀă Hneăng hôp Đảng tung lâp tơnêi têa rôh má 14. Vâ rôh tơ’noăng kố châ tơƀrê pơxúa, tơdjâk rơdêi hiâm mơno djâ troăng ahdrối, kơhnâ hâk vâ dêi hơnăm ối nếo, pôa Đỗ Văn Chiến pơkâ thế:

“Tíu xiâm Đoân kal tơmâng ngăn mơdêk rơdêi tơdroăng cheăng hnê tối, mơdêk ki hlê plĕng, hnoăng cheăng pôu râng tung rêm râ ƀô̆ Đoân, đoân viên, pro ti lâi ăm rôh tơ’noăng kố chiâng rôh pêi cheăng kal kí trâu rơdâ tung tâi tâng Đoân, ai tơdroăng ki veăng kơhnâ dêi hên hĭn đoàn viên, droh rơtăm mâu phô̆m vâ xông kân tung lâp tơnêi têa ƀă pro chiâng tơdroăng mơhnhôk tơdjâk tung pơlê pơla; mê cho mâu loăng kông, troăng prôk, tíu ‘măn pơchuât hlá mơ-éa, lâm hriâm, lơ mâu ƀai ki hriăn ‘na khoa hok, mâu tơdroăng tơkêa pơxiâm pêi cheăng tơmiât rơkê, túa pêi cheăng kâ rơkê plĕng, tơƀrê xua droh rơtăm pro ngế xiâm tơdjâ”.

rêh ối, mê ối veăng gum ăm tơdroăng ki pơkâ pêi mơnhông krá tơniăn dêi tơnêi têa ƀă pêi pro pơhlêh tơhrâ dêi Chin phuh Việt Nam a mâu hneăng hôp lâp plâi tơnêi, tung mê, ai tơdroăng pơkâ pro kơdroh troh 0 mơ’no trếo ‘mêi a hơnăm 2050, pôa Đỗ Văn Chiến pơkâ thế tâi tâng rêm râ ƀô̆ Đoân, đoân viên, droh rơtăm lâp tơnêi têa athế mơdêk hiâm mơno djâ troăng ahdrối, tơmiât rơkê ƀă pôu râng dêi hnoăng cheăng tơná vâ pêi pro pơhlêh mâu tơdroăng ki kal dêi tơdroăng tơ’noăng hiăng tơbleăng.

A rôh leh, mâu kăn hiăng pôu, hbru tơmeăm ăm Jâ Nôu Việt Nam khên tơnôu; diâp 40 kơxuô tơmeăm ăm rơpŏng ki châ tơnêi têa gum; 30 hnoăng liăn hriâm rơkê ăm hok tro ai tơdroăng rêh kâ ối pá puât a tơring Sơn Dương, kong pơlê Tuyên Quang ƀă tâi tâng kơnâ 100 rơtuh liăn.

Tung rôh po tơdroăng, Khu xiâm Đoân Droh rơtăm Kŏng san Hồ Chí Minh tơbleăng kế tơmeăm droh rơtăm pro vâ koh hâk Hneăng hôp Đảng rôh má 14 mê cho: 15 toăng hngêi ăm droh rơtăm ki tro tơdjâk xua kong mê khía mơhot têa kân lân lu, 02 Toăng hngêi hơniâp, plông kơtú ƀa long tơdjuôm, toăng hngêi “Kên pâ rơnŏng khêi”, Kơdrum loăng xua droh rơtăm pêt, troăng prôk tung thôn pơlê, plông xah hêi ăm mâu vâi o phô̆m vâ xông kân, Toăng hngêi 26/6, 36 to troăng ki châ krâ pul mơ’no on ăm bâ eăng ƀă tôu mâ hâi, 20 ha kong loăng xua droh rơtăm pêt, gum 13 rơtal liăn ing kơxô̆ liăn mung dêi Khu râng liăn Tơnêi têa ‘na tơdroăng cheăng pêi Khu xiâm Đoân. Tâi tâng kơxô̆ liăn ‘no pro mâu tơmeăm khoăng ki tối a kơpêng ai 21 rơtal liăn.

Klêi kơ’nâi leh tơbleăng, mâu kăn pơkuâ Đảng, Tơnêi têa rơtế ƀă mâu kăn, đoàn viên droh rơtăm ƀă kuăn pơlê a tơring hiăng rơtế veăng pêt loăng ngiât a kơpong tơbâ mâu kăn pơkuâ kăch măng hneăng hdrối, Kơpong tíu xối tơbâ Tân Trào, tơring Sơn Dương, kong pơlê Tuyên Quang.