Tiô tối tơbleăng tơkŭm hnê tối ‘na Khu mơdró, tơvâ tơvân tung 4 tơdroăng ‘na  (tơnêi, hyôh kong prâi, tơmeăm khoăng tung kơdâm tơnêi,  xiâm tơmeăm vâ mơjiâng pro) tơkŭm tơmâng tơpui hên 5 khu ki xiâm. Mê cho ki hrá ƀă tơ ê ‘na yă tơnêi; ki klâ krê pơla hnoăng cheăng pêi pro ‘na nâp liăn tro tiô luât ƀă tơdroăng ki châ xúa tơnêi; Ki ôh tá mơhúa pêi pro tro tiô luât ƀă mâu pơkâ ‘na liăn ngân hiăng pơkâ; ôh tá ai tŭm tiô pơkâ ‘na tơdroăng pro hlá mơ-éa hyôh kong prâi ƀă pơkâ hdró; hnoăng cheăng tơmiât rak ngăn trếo ‘mêi ki mơ’no tah tiô troăng tah lôi teăng a pơ’lêh klêng tê.

Tối mơgêi a rôh hôp, pôa Hồ Quốc Dũng, Phŏ Ngế pro xiâm hnê ngăn tơnêi têa pơkâ thế mâu Khu xiâm kơvâ cheăng tiâ tơdrăng, thế tối tơdrăng khât hlối mâu tơdroăng pâ thế dêi khu mơdró, klâ mơhno hnê hnoăng cheăng pêi dêi Tíu xiâm tơnêi têa ƀă kong pơlê. Tối nhên, Chin phuh nôkố tơmâng pêi a mơjiâng luât ƀă tah ki pro pá tung tơdroăng tơbleăng xing xoăng râ, xing xoăng hnoăng ki vâ mơdêi ăm kong pơlê, Phŏ Ngế pro xiâm hnê ngăn tơnêi têa tối pơchân mâu tơdroăng tơvâ tơvân, xơpá, mâu pơkâ dêi luât ối tơvâ hên, ôh tá tơdrăng tung tơdroăng ‘na tơnêi ƀă hyôh kong prâi kal séa ngăn tung pơla ‘mâi rơnêu luât tơnêi, luât hyôh kong prâi, luât pro hnoăng mơhá tơmeăm khoăng ƀă mâu hlá mơ-éa chêh hnê mơhno pêi pro vâ pro hlâu má môi ăm khu mơdró xông tơƀrê tung pêi cheăng, veăng ‘no hnoăng a mơdêk tơdjuôm dêi lâp tơnêi têa.