Chôu hriâm nâl Ăng-glê a lâm 11A4 dêi thái Phan Mạnh Tiến hnê đi đo pêng tơdroăng hâk vâ hơniâp ro. Ƀai hriâm hlối tơrŭm ƀă xah hêi, pơtâp tơpui, tơno pơto pơtih tơdroăng ki ro... O Trần Tú Tài, lâm 11A4 ăm ‘nâi, sap ing hriâm a hngêi trung râ pá pái phôh thong Thực hành Cao Nguyên, á nếo châ veăng tung mâu chôu hriâm nâl Ănglê hơniâp ro tiah kố, kum chôa lâng rĕng chôu pâ ƀai hriâm ƀă hlối ôh tá kơxiâp kơmêi.

“Peăng hriâm mê thái klâ nhên tơdroăng hnê ƀă hnê tiô tơrêm tơdroăng ki kal vâ kum ăm ngin chôu pâ nhên tơrêm tơdroăng hriâm. Klêi mê thái kô ai ƀai pơtâp ăm hriâm pro vâ rế hlê plĕng, kum ăm á ai mâu ƀai pơtâp hriâm pro xêh vâ ăm rĕng chiâng pro chôu pâ tung tuăn ƀai hriâm ƀă thái hlối rơtế ƀă há, tăng ngăn hlối rơnêu ăm á vâ á kô pơ’lêh rế hlê plĕng rêm hâi”.

Tung pơla mâu hok tro râ má pái Phôh thong hâk vâ ƀă tơdroăng tơkŭm hnê nâl Ăng-glê dêi thái Phạm Mạnh Tiến hơnăm ối nếo xua kum kơdroh ki tơbrê tung hriâm, mơnhôk ăm vâi o rĕng chôu pâ ƀai, mê mâu sinh viên Đại học Tây Nguyên lăm pơtâp hnê a kố, hiăng hlo, ‘nâi  môi tơdroăng ki nếo tung cheăng hnê dêi tơná. O Phạm Thị Thu Hà, sinh viên khoa Ngoại ngữ, Đại học Tây Nguyên, tối:

“A hriâm tơ’nôm hên mâu tơdroăng hnê ing thái vâ xo ah hmôi kô chiâng xúa tung tơdroăng hnê ăm vâi muăn’’.

Ƀă hok tro hngêi trung râ má pái phôh thong Thực hành Cao Nguyên tối, thái Tiến ôh ti xê cho ngế hnê ăm hlê ối cho ngế ki hmâng, veăng hnê tối. Hên hok tro tăng troh thái môi tiah ngế ngoh ki kân vâ tơpui tơno, châ thái mơhno troăng  tung pơla hơnăm tuăn ngôa dế ai hên tơdroăng pơ’lêh tung tơchĕng tơmiât. O Lê Sỹ Trọng, lâm 11A5 chôu pâ dêi tơdroăng mơnúa veăng tơ’noăng pơxiâm pêi cheăng hriăn plĕng ki nếo:

“Thái Tiến cho ngế thái rơtế ƀă ngin, kum ngin pêi kơhnâ tung tơdroăng tơkêa bro păn í kơ’nêi tung kơdrum ƀă nhâ loăng pơkeăng. Thái kơhnâ tung tŭm tơdroăng, thái hnê ăm ngin lăm tăng ngăn vâ hlê, mơhnhôk ăm rêm ngế mơ -eăm. Kơ’nâi to lâi khế pêi ƀối thái hnê ƀă ngin pêi hiăng tơƀrê, rôh apoăng mê ngin hiăng chiâng pêi tơdroăng mê hâk ro ‘nâng, ai tiô pơkâ mê a tâ phiu ro tung hiâm mơno”.

Tơdrêng ƀă hnê hriâm, thái Phan Mạnh Tiến ối cho Kăn hnê ngăn Đoân dêi hngêi trung ngế ki kơhnâ khât, ƀĕng ƀeăn tung tơdroăng. Lối 10 hơnăm hnê a hngêi trung, thái hiăng tơbleăng pêi hên tơdroăng veăng tŏng gum tung hngêi trung ƀă pá kong hngêi trung. Môi tiah tung pơla dế ai tâ tú pơreăng COVID-19 pro ăm ai tơdroăng hriâm tơdrêng tiô troăng hyôh măng chiâng hngăm hngo, thái tăng ‘nâi plĕng tơkŭm po tơ’noăng chêh báo tường điê̆n tưh ƀăng nâl Ănglê pơxá “Hâi hội viên ‘mrăng mêa”, tơ’mot hên tá thái cô tung tơnêi têa ƀă kong têa ê veăng tơ’noăng. Hên tơdroăng pleăng hnoăng tơná xua thái mơhnhôk pêi pro môi tiah Têt hơ-ui pâ”, “Kum rơnó tơ’noăng”, “Têk on trĭng tơbâ hnoăng”, “Lăm prôk troh tíu tơplâ ton nah”, tơdroăng veăng kơjo kum tíu tơkăng kong ƀă hên ki ê... hiăng diâp hnoăng liăn hriâm, kum hên hok tro xơpá  hlối tơbleăng hên đoân viên ưu tú ăm Đảng. Pôa Nguyễn Tiến Chương, Phŏ pơkuâ hngêi trung râ má pái phôh thông Thực hành Cao Nguyên tối:

“Thái Tiến cho môi ngế thái hơnăm ối nếo rơkê ƀeăn tŭm 2 tơdroăng mơhnhôk pêi ki kố ki mê tá tơdroăng hnê, djâ tơdroăng cheăng đoân tối krê ƀă tơdroăng mơhnhôk cheăng dêi droh rơtăm, hok tro, sinh viên pêi cheăng kơhnâ. Thái xuân mơnhông hnê xúa AI tung hnê hriâm; pơtối rak kâu lăk ƀô̆ nâl Ănglê, tơkŭm po tơ’noăng kơ’ngrâu kơ’lêng mêa tung hngêi trung, vâ tơdroăng hriâm nâl Ăng-glê chiâng nếo, hriâm rơtế ƀă pêi, hnê ăm mâu vâi o tâ, ‘nâi, tung tơdroăng hriâm nâl Ăng-glê”.

Mâu tơdroăng mơ-eăm ôh tá la lâi pơtê dêi thái Phan Mạnh Tiến ngế hơnăm ối nếo hiăng châ tơmâng xo tơxâng khât. Hơnăm 2023, thái châ kâ pri ối má Péa thái hnê rơkê râ kong pơlê. Hơnăm 2024, thái châ Tíu xiâm Đoân khĕn kơdeăn cho thái hơnăm ối nếo kơhnâ rơkê tung lâp tơnêi têa ƀă cho môi tung mâu ngế ki hnê bro ăm chiâng rơrêk tung hiâm mơno a Hâi hôp kân “Droh rơtăm rơkê pêi pro tiô rơkong Pôa Hồ hnê” rôh má 8 hơnăm 2025.

Hriăn plĕng tơdroăng ki nếo “Mơdêk hriâm mâu hnoăng chư ki kal xúa hên tung tơpui nâl Ăng-glê ƀă ứng dụng AI” dêi thái châ kâ pri A râ hngêi trung ƀă châ kâ pri C râ kong pơlê, châ khĕn kơdeăn cho túa hnê hriâm tơtro tiô troăng pơ’lêh kơxô̆ tung tơdroăng hnê hriâm. Tối ‘na troăng hơlâ pêi tung la ngiâ, thái Phan Mạnh Tiến ăm ‘nâi:

“A thế pơ’lêh nếo tơdroăng ki vâ achê, pro ti lâi vâ ai mâu tơdroăng pêi pro la pro ăm mâu vâi o rơhêng vâ veăng hriâm ƀă hlo châ tơƀrê. Hriâm ing mâu ki ê mâu túa hnê ai mâu tơdroăng pêi pro ki mâu vâi o tơmâng, hlối hâk vâ mê a xuân tơbleăng trâu rơdâ tâ. Mơ-eăm vâ mơjiâng mâu kâu lăc ƀô̆ tung hngêi trung, vâ ai tơ’nôm kâu lăk ƀô̆ tơpui nâl Ănglê, tơpui tơno môi tơdroăng, kâu lăk ƀô̆ hnê rêh ối ƀă kâu lăk ƀô̆ hok tro 3 tơdroăng ki lĕm rơkê”.

Ƀă mâu tơdroăng cheăng pêi hlâu tê la krá kâk, thái Phan Mạnh Tiến hơnăm ối nếo dé veăng păn roăng môi rơxông hok tro ‘nâi hơ-ui pâ, ai hnoăng cheăng  ƀă púi vâ mơnhông tơná. Ing mâu chôu hriâm rơhêng hmâ kơ-êng tiâ, tơpui, tơno pơto pơtih tơdroăng ki ro, thái hiăng pro ăm vâi o tâ rơhêng vâ hriâm ƀă hriâm nâl kong ê rơkê tâ.