A ƀuôn Trắp, cheăm Čư̆ Mgar, mâu troăng kŭn lĕm hlo ngiât to loăng, mâu kơ’noăng reăng tơpo eăng lĕm ai mâ hâi trâ eăng. Malối tá um méa mâu hlá cờ khêi hơlŏng trĭng kơneăng tiô ing khía pê, mơhno ăm pơlê thăm hâk tơngăm ‘na hdroâng mơngế. H’Hằng Êban, môi ngế hơnăm ối nếo dêi buôn Trắp tối:

“Châ pơcháu chuâ hlá cờ a troăng kân dêi pơlê, a tâ hơniâp ro tung hiâm mơno. Tơdroăng chuâ hlá cờ kum á hlê tâ ‘na tơdroăng ton nah dêi kăch măng dêi hdroâng mơngế, ‘na tơdroăng ing pơxiâm ai Đảng ƀă thăm pâ khât dêi pơlê tơná”.

Troăng kân ai chuâ hlá cờ dêi ƀuôn Trắp xŏn 1km, pơxiâm ing hâi po hneăng hôp tơrŭm môi tuăn, klêi mê pơtối tơbleăng drêng troh hneăng hôp kân Đảng. Y Suinh Ƀyă kăn pơlê tối:    

“Drêng tơbleăng thế chuâ hlá cờ, kuăn pơlê ngế ki lâi xuân hâk ro. Rêm to hngêi rôe xêh hlá cờ, chuâ dêi. Hlá cờ Đảng hngêi ki lâi cho đảng viên kô chuâ, ‘na hlá cờ tơnêi têa hngêi ki lâi xuân thế chuâ, vâ pơ-eăng tơnêi têa”.

Ing buôn Trắp, túa pro troăng hlá cờ Tơnêi têa hiăng pơ-eăng troh lâp lu. Cheăm Čư̆ Mgar nôkố ai 7km troăng hlá cờ, tá mâu troăng xiâm ƀă tâi tâng 11 to thôn, pơlê. Jâ Hồ Thị Thanh Hải, Phŏ Kăn pơkuâ hnê ngăn cheăm Čư̆ Mgar, tối:

“Nôkố tâi tâng 11 to thôn xuân ‘mâi rơnêu pro, văng krúa lĕm troăng ki chúa hlá cờ dêi tơná ƀă chuâ mâu hlá cờ Tơnêi têa, hlá cờ Đảng nếo  lĕm drô troăng kân. Drêng pin prôk a mâu troăng ai chuâ hlá cờ dêi pơlê mê xuân tâ phiu ro tung hiâm mơno, mê cho môi tung mâu tơdroăng mơhnhôk mơjiâng khu tơrŭm môi tuăn dêi rơpó tâi tâng hdroâng mơngế xuân môi tiah kring vế tơnêi têa”.

A thôn Tiến Thịnh, cheăm Quảng Tiến, tơring Čư̆ Mgar, rêm rơpŏng hngêi xuân hbrâ chuâ hlá cờ a bo cheăng vâ mot a hngêi tơná tung mâu rôh leh, malối a mâu hâi Têt Lo hơnăm nếo ƀă Hâi mơjiâng Đảng. Ƀă vâ chê 400 rơpŏng, thôn Tiến Thịnh cho môi tung mâu thôn ki apoăng pêi pro túa troăng prôk chuâ hlá cờ pro túa. Pôa Nguyễn Tấn Chờ, kăn thôn Tiến Thịnh, ăm ‘nâi:

“Drêng môi thôn ai troăng chuâ hlá cờ mê cho tơdroăng hâk tơngăm dêi thôn pơlê. Troăng chuâ hlá cờ dêi thôn Tiến Thịnh cho thôn ki apoăng pro troăng ai hlá cờ, cho troăng pro túa dêi tơring. Pin nhoăm hlá cờ xuân môi tiah pin nhoăm Tơnêi têa, mê pin thế chuâ hlá cờ tá hiâm mơno pâ nhoăm”.

Túa pro troăng chuâ hlá cờ mê a thôn Tiến Thịnh, cheăm Quảng Tiến tơbleăng pêi pro sap hơnăm 2016 nah, klêi mê hiăng pro tiô troh tơdrốu to thôn tung cheăm. Jâ Nguyễn Thị Thanh Vân, Phŏ Kăn hnê ngăn Vi ƀan cheăm Quảng Tiến tối:

“Hdrối nah rêm ngế kuăn pơlê vâi chuâ hlá cờ tiô tơná ai, klêi mê cheăm hiăng mơhnhôk hên rôh thế chuâ a 6 kơpêng 6 to thôn pêi pro tiô troăng hlá cờ, troh nôkố mâu thôn xuân tơkŭm pro troăng hlá cờ ƀă kuăn pơlê xuân môi tuăn vâ”.  

Troăng hlá cờ Tơnêi têa a tơring Čư̆ Mgar hiăng veăng ‘no hnoăng tơbâ tuăn loi hâk tơngăm hdroâng mơngế, mơdêk tuăn pâ tơ’noăng mơnhông cheăng kâ, túa lĕm tro a pơlê. Pôa Nguyễn Thiên, Phŏ Kăn hnê ngăn Đảng tơring Čư̆ Mgar ăm ‘nâi:

 “Mâu cheăm, pơlê kân mơjiâng pro troăng hlá cờ sap hơnăm 2020. Ki apoăng chuâ a troăng kân xiâm dêi cheăm, nôkố mâu cheăm pơlê kân hiăng po rơdâ pro troăng hlá cờ a mâu troăng prôk tung pơlê, tôh kơphô̆. Pro troăng chuâ hlá cờ hlối vâ mơhnhôk hnê hdrối vâ po hneăng hôp kân Đảng rêm râ ƀă xuân vâ tơ’lêi hlâu tâ tung tơdroăng cheăng mơhnhôk hnê tối kuăn pơlê tung mâu rôh Leh tơbâ dêi Tơnêi têa”.

Mâu troăng prôk tơpok hlo to hlá cờ khêi hơlŏng trĭng kơneăng ‘lê ‘lêp  tiô khía rơnó hơngui pê cho vâ mơhno tơdroăng lĕm ro blêi trâng tung tơdroăng cheăng kâ rêh ối mơjiâng thôn pơlê cheăng kâ tiô túa nếo a Čư̆ Mgar, Dak Lak rế kro mơdrŏng lĕm, rơkê plĕng.